ඉතිං යාලුවනේ අපි කලින් ලිපියෙන් කිව්වනෙ පූසො සෙට් එක මානෙල් මැඩම්ගෙ කෙමිස්ට්රි ක්ලාස් එකට ඇතුල් වෙච්ච විදිහ. ඔන්න අද අපි කියන්න යන්නෙ පූසො ෆිසික්ස් ක්ලාස් එකට ගිය හැටි.
කලිනුත් කිව්වා වගේ අපේ යාලුවො කට්ටිය ෆිසික්ස් වලට යන්න තීරණය කළේ රොබට් ලියනගම සර්ගෙ පන්තියට. ඒ පන්තියටත් පටන් ගන්න කලින් දවසෙ ගිහින් රෙජිස්ටර් වෙමු කියලා කලින් හිතාගෙන හිටියත්, මානෙල් මැඩම්ගෙ පන්තියෙදි සිද්ද වෙච්ච අකරතැබ්බෙ නිසා පූසො තීරණය කළාලු කලින්ම ක්ලාස් එකේ රෙජිස්ටර් වෙන්න. ඉතිං කලින් බැච් එකේ කට්ටියගෙන් විස්තර අහලා බැලින්නං රොබට් සර් කියන්නෙ ගොඩක් සැර, වැරැද්ද පෙන්නන්න බැරි චරිතයක් කියලා තමයි අපේ යාලුවන්ට ආරංචි වුණේ. ඒ වගේම ක්ලාස් එකේ දිගටම ඉන්නත් පුලුවන් හොඳට බැනුම් අහන්න ටැලන්ට් එකක් තියෙන ළමයින්ට විතරයිලු.
කොහොමහරි ඉතිං අපේ පූසො කට්ටියත් මේ විස්තර අහගෙන, පන්ති පටන් ගන්න සතියකට විතර කලින් ගියාලු රොබට් සර්ගෙ ක්ලාස් එකට ඇතුල් වෙන්න. මේ පන්තිය තිබුනෙ ගම්පහ-කොළඹ පාර අයිනෙමයි. බලාගෙන යද්දි ජීවිතේට පේන්ට් පාරක් දීලා නැති, මහ පාලු පාටක් තියෙන බිල්ඩිමක තමයි ක්ලාස් එක තියෙන්නෙ. ඉතිං අපේ යාලුවො යද්දි, මානෙල් මැඩම්ගෙ ක්ලාස් එකට තරම්ම නැතිවුණත්, රොබට් සර්ගෙ ක්ලාස් එක ගාවත් සැලකිය යුතු මට්ටමේ ළමයි සෙට් එකක් රෙජිස්ටර් වෙන්න ඇවිල්ලා හිටියලු. අපේ පූසන්ටත් වුණේ ඉතිං තමන්ගෙ වාරෙ එනකං පෝලිමට වෙලා බලාගෙන ඉන්න.
මේ ෆිසික්ස් ක්ලාස් එකට සමහර ළමයි, විශේෂයෙන් ගෑණු ළමයි, ඇවිල්ලා හිටියෙ අම්මලා තාත්තලත් එක්ක. ගොඩක් කොල්ලොනං ඇවිල්ලා හිටියෙ පූසො වගේම තනියම. මේ ඇවිත් හිටපු කට්ටිය අතරෙ අඳුරන ළමයිනුත් කීපදෙනෙක් හිටියා. අපේ කතාවල ඉස්සරහට හම්බවෙන ඉස්සා, විශ්වග්රාත් මැක්නාත් වගේ කට්ටිය හිටියෙ පූසන්ට වඩා පෝලිමේ පිටිපස්සට වෙන්න.
රොබට් ලියනගම සර් හිටියෙ ක්ලාස් එක ඇතුලෙ හින්දා එලියෙ හිටපු කට්ටියට සර්ව පෙනුනෙ නෑ. හැබැයි සර්ගෙ වොයිස් එකනං ඒ අවට හිටපු හැමෝටම හොඳට ඇහුනා. ටික වෙලාවක් යද්දි අපේ යාලුවන්ට තේරුනාලු මෙතන මොකක්හරි ලොකු අප්සට් කේස් එකක් තියනවා කියලා. මොකද ආපු වෙලාවෙ ඉඳලාම කට්ටියට ඇහෙන්නෙ රොබට් සර් එක එක්කෙනාට බනින සද්දෙ. පෝලිමේ ඉස්සරහා ඉන්න කට්ටියත් බයවෙලා වගේ ඉන්නෙ. ඒ මදිවට රෙජිස්ටර් වෙලා එළියට එන කට්ටිය මූණු ඇඹුල් කරගෙන තමයි එළියට එන්නෙ. දැන් පූසන්ට හිතාගන්න බෑ මොකද්ද මේ තමන්ට කලින් පෝලිමේ ඉන්න කට්ටිය කරන වැරැද්ද කියලා.
කොහොමහරි ඉතිං ටික වෙලාවකින් අපේ යාලුවන්ට පුලුවන් වුණා රොබට් සර්ව පේන මට්ටමට ඉස්සරහට එන්න. ඒ කියන්නෙ දැන් කට්ටිය ඉන්නෙ පන්තිය ඇතුලෙ. ඉතිං පන්තිය ඇතුලට ගියාම තමයි පූසො සෙට් එක දැක්කෙ ක්ලාස් එකේ නියම ස්වභාවය. මුලු පන්තිය පුරාම දූවිලියි, හුණු කුඩුයි වලින් පිරිලා. ඒ මදිවාට වහලෙයි, හැම මුල්ලක්මයි මකුලු දැල් බැඳලා. මකුලු දැල් වල දූවිලි බැඳිලා ඒවා ඈතට පේන්නෙ දම්වැල් වගේ. හරියට නිකං හොල්මන් මන්දිරේක ලුක් එකක් තමයි ක්ලාස් එකේ තියෙන්නෙ.
ක්ලාස් එකේ ඈත කොනක රොබට් සර් ඉන්නවා ළමයින්ටයි, අම්මලාටයි බැන බැන. සර්ගෙ මූණෙ බාගයක්ම හුණු වලින් වැහිලා. හරියට වෙස් මූණක් දාලා වගේ. ඉතිං මේක දැකපු අපේ ඤාව්වාට "බකස්" ගාලා හිනා ගියාලු. හොඳ වෙලාවට රොබට් සර්ට මෑන්ස්ගෙ හිනාව ඇහුනෙ නෑ. ඇහුනනං ඉතිං ගහලා ක්ලාස් එකෙන් එලවනවා ෂුවර්. පස්සෙ තමයි සර්ගෙ මූණෙ හුණු ගෑවෙන හේතුව කට්ටිය හොයාගත්තෙ. රොබට් සර්ගෙ පුරුද්දක් තමයි හැමතිස්සෙම දකුණු අත කම්මුලට තියාගෙන ඉන්න එක. ඉතිං සර් බෝඩ් එකේ හුණු වලින් ලියන්නෙත් දකුණු අතින් හින්දා සර්ගෙ නිකටෙයි, දකුණු කම්මුලෙයි හැම තිස්සෙම හුණු ගෑවිලා තමයි තියෙන්නෙ.
මේ අස්සෙ සර්ගෙ බැනුම් සද්දෙ අහලා උපාසකයි, මාලුකට්ටායි බයවෙලා. මේ දෙන්නා දැන් පුරුපුරුටයි, ඤාව්වාටයි බර බරේ දානවලු ආපහු හැරිලා යමු කියලා. ඒ වුණාට පුරුපුරුගෙ අයිඩියා එන වුණේනං මෙච්චර වෙලා හිටපු එකේ බැනුනුත් අහලා, රෙජිස්ටරුත් වෙලාම ගියානං හොඳයි කියන එක.දැන් ඉතිං මේ වෙද්දි පූසො සෙට් එක ඉස්සරහින් ළමයි දෙන්නයි ඉන්නේ.
මුලින්ම හිටියෙ අම්මා එක්ක ආපු ගෑනු ළමයෙක්
රොබට් සර් :- දැන් බලන්න ඔය ළමයා ඇවිත් ඉන්නෙ අම්මත් එක්ක. මොකද තනියම එන්න බැරි? තමන්ගෙ පෞරුෂත්වෙ ලොකු අඩුවක්, අන්න ඒකයි. මේවට ගොඩක්ම වග කියන්න ඕනෙ අම්මලයි, ඕ ලෙවල් ගුරුවරුයි. ඇත්තටම මට ඔය ඕ ලෙවල් ගුරුවරු අහුවුණොත් මේ පන්තියට ගෙනල්ලා බාල්කෙ එල්ලනවා. හිතාගෙන ඉන්නෙ භෞතික විද්යාව හැමෝටම කරන්න පුලුවන් විශයක් කියලද? මේක දක්ෂයාගේ විද්යාව. කම්මැලි ගෑනු ළමයින්ට මොන ෆිසික්ස්ද? කුස්සියට වෙලා අම්මට උදව් දීගෙන හිටියනං මීට වඩා හොදයි.
දැන් ඉතිං සර්ගෙ ටෝක්ස් අහලා අර අම්මගෙයි දුවගෙයි මූණු බෙරි වෙලා ගිහිල්ලා. කොහොමහරි තව ටික වෙලාවක් බැනලා, විස්තර එහෙම අහලා, ඒ ගෑනු ළමයාව සර් ක්ලාස් එකට ගත්තා. දැන් ඉතිං පූසන්ගෙ හිතට ටිකක් ෆිට්. මොකද පූසො අම්මලත් එක්ක නෙවෙයිනෙ ආවෙ. ඒ කියන්නෙ අපේ යාලුවන්ගෙ පෞරුෂය ගොඩක් හොඳයි. ඉතිං ඊට පස්සෙ හිටියෙ තනියම ආපු කොල්ලෙක්. රොබට් සර් ඊටපස්සෙ කළේ මෑන්ස්ගෙ විස්තර අහලා පොරටත් බනින්න පටන් ගත්ත එක.
රොබට් සර් :- දැන් බලන්න ළමයෝ, ඔය ළමයා ඇවිත් ඉන්නෙ තනියමනෙ. මොකද ගෙදරින් හොයන්නෙ බලන්නෙ නැද්ද? දෙමව්පියන්ගෙයි, ඕ ලෙවල් ගුරුවරුන්ගෙයි කිසිම වගකීමක් නෑ ළමයි ගැන. ඔහොම කොහොමද උසස්පෙළ කරන්නෙ. මේක නිකං විද්යාව නෙවෙයි, අයින්ස්ටයින් මහත්තයගෙ භෞතික විද්යාව. දක්ෂයා කඩාගෙන ඉදිරියට යනවා. කම්මැලියා හෝදගෙන යනවා. සිංහලයා කවදත් කම්මැලියා. සිංහලයාට මොන භෞතික විද්යාවද?
දැන් ඉතිං අර මෑන්ස්ට ඇඬෙන්න වගේ. කොහොමහරි ඉතිං දීර්ඝ බණ දේසනාවකට පස්සෙ පොරවත් ක්ලාස් එකට ඇතුල් කරගත්තා. දැන් ඉතිං අපේ පූසො කට්ටියගෙ කකුල් ටික මැන්ඩලින් ගහනවා වගේලු. මොකද ඊළගට ඉන්නෙ අපේ යාලුවො කට්ටිය. එක ළමයෙක්ට අම්මත් එක්ක ආවයි කියලා බැන්නා. අනිත් ළමයාට අම්මලා නැතුව ආවයි කියලා බැන්නා. දැන් ඉතිං පූසන්ට ෆුල් නස්තාර් වෙලා ඉන්නෙ මොකද වෙන්නෙ කියලා හිතාගන්න බැරුව.
රොබට් සර් :- තමුන්ගෙ ඉස්කෝලෙ කොහෙද?
පුරුපුරු :- කුරුඳුවත්ත විද්යාලය
උපාසක :- කුරුඳුවත්ත විද්යාලය
ඤාව්වා :- ලොකුනම විද්යාලය
මාලුකට්ටා :- කුරුඳුවත්ත විද්යාලය
අපේ යාලුවො කට්ටිය බයේ ගැහි ගැහි උත්තර දුන්නලු.
රොබට් සර් :- ආ...කුරුඳුවත්ත. බලනවා තමුන් කරපු කැත වැඩේ. තමුන් මගෙ ඉස්කෝලෙ කෑවා. නොසන්ඩාල වැඩ කළා මදිවට සීඩී ගහලා ලංකාව පුරා බෙදුවා නේද? අපි ඉස්කෝලෙ ගියෙ එක්දහස් නමසිය පනස් ගනන් වල. ඒ දවස්වල ඉස්කෝලෙ ටයි එක දාලා ජොබ් ඉන්ටවීව් එකකට ගියොත් කවුරුත් නොගෙන ඉන්නෙ නෑ.
දැන් ඉතිං පූසන්ට ෆුල් අබ්ලික් මොනවද මේ මනුස්සයා කියන්නෙ කියලා. මොන සීඩීද? ටික වෙලාවකින් තමයි කට්ටියට වැඩේ මීටර් වුණේ. ඔය කාලෙ වෙද්දි ඉස්කෝලෙට බ්ලැක් මාර්ක් එකක් වෙච්ච සිද්දියක් රට පුරා ආන්දෝලනේට පත්වෙලයි තිබුනේ. රොබට් සර් මේ කතා කරන්නෙ ඒක ගැන. කොහොමහරි පූසන්ටනං කලින් දෙන්නට තරම් බැනුම් අහන්න වුණේ නෑ. ටික වෙලාවක් බණ දේසනා කරලා සර් අපේ යාලුවො කට්ටියවත් ක්ලාස් එකට ගත්තා. එදා ගෙදර යද්දි පිස්සු ඩයල් එකක් කියලා බැන බැන ගියත් පස්සෙ තමයි තේරුනේ සර් කොච්චර හොද මනුස්සයෙක්ද කියලා.
රොබට් සර්ගෙ මෙතඩ් එක වුණේ මුලින්ම පන්තියට එන ළමයි පුලුවන් තරම් බය කරලා ඒ අයව පන්තියෙන් හලන එක. එතකොට ක්ලාස් එකේ ඉතුරු වෙන්නෙ කාගෙන ඉන්න පුලුවන් ළමයි විතරයි. ඒක තමයි ක්ලාස් එකට ගනිද්දියි, මුල් දවස් ටිකෙයි සර් ළමයින්ට බනින්නෙ. කොහොමහරි ඉතිං අන්තිම වෙනකං ක්ලාස් එකේ ඉතුරු වෙන කට්ටිය හොඳට පාස් වෙනවා.
අපේ පූසො මුල් දවස්වල ක්ලාස් එකට ගියෙම ඉගෙනගන්න නෙවෙයි, සර් අපේ සමාජෙ ඉන්න එක එක්කෙනාට බනින හැටි අහගෙන ඉන්න. ඒවා මතක් කර කර පැය ගානක් වුණත් හිනා වෙන්න පුලුවන්. හැබැයි පස්සෙ පස්සෙ සර් බනින පුරුද්ද ටිකක් අඩු කළා. අපේ පූසන්ට එතකොට තමයි පන්තිය එපා වුණේ. ඊට පස්සෙ මාලුකට්ටා හිස්සැල්ල සර්ගෙ පන්තියට ගියා. අනිත් පූසො බ්ලැක්ඔෆිසර්ගෙ පන්තියට ගියා. රොබට් සර්ගෙ කතා ගැනනං ගොඩක් දේවල් ලියන්න තියනවා. ඒත් ඒවා කියවන, සර් ගැන නොදන්න යාලුවො වැරදි අවබෝධයක් ගන්න පුලුවන් හින්දා අපි මෙතනින් නවත්තන්නංකෝ...
ප.ලි - ඔන්න අපි බ්ලොග් එකට අලුත් ඇඳුමක් ඇන්දුවා. දැන් කලින්ට වඩා ඉක්මනට පේජ් එක ලෝඩ් වෙනවා වගේ තමයි පේන්නෙ. ඇඳුම ගැන ඔයාලගෙ අදහස් දැනගන්නත් පූසො ආසයි.
