චංචලා - 5 ( උපාසක මාට්ටු වෙයි )

උපාසකගෙයි චංචලාගෙයි ආදර කතාව ගැන දැන් හැමෝම දන්නවනෙ නේද? මේ ලව් කේස් එක නිසා උපාසකයි, චංචලායි සමහර ප්‍රශ්න වලට වගේම ගොඩාක් රසවත් අත්දැකීම් වලටත් ෆේස් කළා. අයිස් ක්‍රීම්, දවසේ වීරයා වගේ සිද්දි ඔයාල කියවන්න ඇතිනෙ. තව රසවත් කතා ගොඩක් තිබුණත් කියවන ඔයාලගෙ පහසුව වෙනුවෙන් අපි මේ සීරීස් එක ගොඩාක් දිගට ඇදගෙන යන්නෙ නැතුව ඉක්මණට නවත්තන්න හිතුවා. ඒත් තව කතා කිහිපයක් ඉස්සරහට පල වේවි. ඔන්න අද අපි කියන්න යන්නෙ උපාසක මුලින්ම ගෙදරට මාට්ටු උන හැටි ගැන.

ඔය ගම්පහ පැත්ත ගැන දන්න අයනම් 'පුංචි පැල' සහ 'හංස ගම' කියන ආපන ශාලා දෙක ගැනත් දන්නව ඇති. එකම පාර දෙපැත්තෙ එකට ෆේස් කරලා තමයි මේ දෙක පිහිටලා තියෙන්නෙ. ඒ වගේම අති සුන්දර ඇලකුත් මේ දෙක ලගින්ම ගලාගෙන යනවලු. ඉතිං AL පටන් ගත්තු දවස් වල ඉදලම උපාසක, පුරුපුරු, ඤාව්වා, මාලු කට්ටා ඇතුලු යාලුවො සෙට් එකක්, හැම සෙනසුරාදාම දවල්ට මේ දෙකෙන් එකකට ගොඩ වැදිලා බඩවල් පුරෝගන්න පුරුදු වෙලා හිටියලු. පස්සෙ කාලෙක චංචලා එක්ක යාලු වුණාට පස්සෙ උපාසක චංචලා එක්කත් ඉතිං මේ ස්පොට් දෙකට නිතරම ආවලු.

ඉතිං මේ දෙකෙන් උපාසකගෙයි, චංචලාගෙයි ප්‍රියතම ප්ලේස් එක වෙලා තියෙන්නෙ 'පුංචි පැල' කියන තැන. සමහර සෙනසුරාදා දවස් වලටත්, හැම ඉරිදාවකම වාගෙත් මේ දෙන්නා මේකට කෑම කන්න යන්න අමතක කළේ නෑ. දැන් අපි කියන්න යන මේ සිද්දිය වෙලා තියෙන්නෙත් මේ වගෙ එක ඉරිදා දවසක.

ඔන්න ඉතිං මේ කියන ඉරිදා දවසෙත් සුපුරුදු විදිහට උපාසකයි, චංචලායි පුංචි පැලට ගියාලු ලන්ච් එකට වග කියන්න. උපාසකගෙ කෑමෙ හැටි ගැනනං මීට කලිනුත් අපි කියල තියෙන නිසා අද අපි ඒ ගැන කතා නොකර ඉමුකො නේද? කොහොම හරි අන්තිමට මේ දෙන්නා වෙනදා වගේම කෑම එකටත් වග කියලා එතනින් එළියට ආවලු. ගම්පහදි දෙන්නම අදුරන අය දකින්න ඉඩ තියෙන නිසා, පාරෙ යද්දි අතින්වත් අල්ලන්නෙ නැතුව යාලුවො වගේ කතා කර කර යන්න තමයි දෙන්නා පුරුදු වෙලා ඉදලා තියෙන්නෙ. ඒත් එදා..........

ගම්පහ ස්ටේෂන් එකේ පරණ මගී පාලම ළගදි උපාසක වාහනේකට හැප්පෙන්න ගිහින්. ඉතිං ඒ වෙලාවෙ චංචලා උපාසකගෙ අතින් ඇදල අයිනට ගත්තලු. ඒ අතින් අල්ල ගත්තු පාර සරසවි බුක් ෂොප් එක ගාව තියෙන කහ පාට මගී පාලමත් නැගලා, බස් ස්ටෑන්ඩ් එකට යනකල්ම දෙන්නා අත් අල්ලගෙනයි ගිහින් තියෙන්නෙ. ඒ ටිකට ඉතිං කවුරු දකින්නද නේද?

ඒත් හැබැයි බස් ස්ටෑන්ඩ් එකට ගොඩ වෙද්දිම උපාසකට කෝල් එකක් ආවලු. බැලින්නම් උපාසකගෙ තාත්ත තමයි කෝල් කරලා තියෙන්නෙ. මාට්ටු වීමක භයානක හැගීමක් උපාසකගෙ හයවන ඉන්ද්‍රියට දැණුනත් කෝල් එක ආන්ස්වර් නොකර බැරි නිසා උපාසක ඔන්න ඔහේ කෝල් එක ආන්ස්වර් කලාලු.

උපාසක - හෙලෝ තාත්තෙ.

තාත්තා - කොහෙද ඉන්නෙ?

උපාසක - ගම්පහ බස් ස්ටෑන්ඩ් එකේ.

තාත්තා - බස් ස්ටෑන්ඩ් එකේ මොකද කරන්නෙ?

උපාසක - දැන් මේ බස් එකට නගින්න හදන්නෙ, ඇයි ඒ??

තාත්තා - රස්තියාදු ගහන්නෙ නැතුව ගෙදර යනවා...
මෙහෙම කියපු තාත්තා ෆෝන් එක කට් කළාලු. එතකොටනං ඉතින් වැඩේ මාට්ටු බව උපාසකගෙ හයවන ඉන්ද්‍රියට විතරක් නෙවෙයි, අනිත් ඉන්ද්‍රියන්ටත් දැනිලා. ඒත් ඉතින් මොනවා කරන්නද, ගෙදර යන්නම වෙනවා නොවැ! ඉතිං බස් එකේ යනගමන් චංචලාටත් විස්තරේ කියලා, ගෙදර ගියාට පස්සෙ ඇති වෙන සිටුවේෂන් එක ගැනත්, එතනින් එහාට ගන්න ඕනෙ ආරක්ෂක උපක්‍රම ගැනත් කතා කරගත්තු උපාසක හිතින් ගැහි ගැහී, ඒත් බය පෙන්නන්නෙ නැතුව ගෙදර ගියාලු.

ගෙදරට යද්දි මෙන්න මෑන්ස්ගෙ අම්මා ඉන්නවා දොර ගාවට වෙලා බලාගෙන. වැඩේ හරි තමයි, තාත්ත අම්මටත් නිව්ස් එක දීල වගේ. උපාසක ගෙට ගොඩ වෙද්දිම........

අම්මා - තාත්ත කතා කළාද?

උපාසක - ඔව්!

අම්මා - තාත්ත මොකද කිව්වෙ?

උපාසක - මුකුත් නෑ, රස්තියාදු ගහන්නෙ නැතුව ගෙදර එන්න කිව්වෙ.

අම්මා - හ්ම්ම්!!

එතනින් එහාට අම්මත් මුකුත් කියල නෑ. ගෙදර තිබුන නිශ්ශබ්දතාවයෙ හැටියට රෑට බඩ කට පිරෙන්න අහගන්න වෙන බව තේරුණු අපේ පූසා පුංචි මී පැටියෙක් වගේ කාමරේටම වෙලා හිටියලු.

ඉතිං රෑ වෙද්දි තාත්තත් ආවලු. කට්ටියම කෑමත් කෑවලු. දෙයියනේ මොන ප්‍රශ්න තිබුනත් නොකා ඉන්න පුලුවන්ද නේද? අපේ උපාසක ඉතිං දුක යන්නත් එක්ක හොදට කෑවලු. කෑමෙන් පස්සෙ තමයි අම්මයි, තාත්තයි නඩුව විභාගෙට අරන් තියෙන්නෙ. ඒත් හැබැයි උපාසක හිතුව තරම් අවුලක් වෙලා නෑ. නඩු තීන්දුව ගොඩක්ම ෂේප්ලු.

"ඉගෙනගන්න කාලෙ ඕවා කරන්න එපා"
"ඉගෙනීමත් කඩාකප්පල් වේවි"
"ඔක්කෝටම කලින් විභාගෙ හොදට කරගෙන ඉන්න....."

මේවගේ පොඩි අවවාද කිරීමකින් පස්සෙ අම්මයි තාත්තයි උපාසකව මුදා හැරලා. ඉතිං කොහොමද තාත්තා උපාසකව දැක්කෙ කියන එකත් පොඩි බටර් ගෑමකින් පස්සෙ දැනගන්න උපාසකට පුලුවන් වුණාලු.

උපාසකගෙ තාත්තා ඒ දවස් වල වැඩ කරල තියෙන්නෙ කොටුගොඩ පැත්තෙ කොම්පැණියක. තාත්තා ගාව වැඩ කරන කොල්ලොත් ඉතිං අපේ උපාසකව හොදට දන්නවලු. ඒ වගේම සමහරු උපාසක එක්ක හොදට ෆිට්ලු. ඉතිං චංචලාගෙ සීන් එක කීප දෙනෙක්ම දැනගෙන හිටියත් ඒ කවුරුත්ම තාත්තට මේ ගැන කියල නෑ.

කොහොමහරි එදා උපාසකයි චංචලායි කෑම කන්න යද්දි තාත්තගෙ වැඩපලේ එක කොල්ලෙකුත් ඒකට ඇවිත් ඉදලා. ඒ මෑන්ස් උපාසකව අදුරගෙන, ඒත් උපාසක මෑන්ස්ව දැකලා නෑ. කොහොමහරි එවලෙම පොර තාත්තට කෝල් කරලා කියලා උපාසක කෙල්ලෙක් එක්ක කෑම කන්න ඇවිත් ඉන්න බව.

උපාසකයි, චංචලායි කෑම කාලා එළියට එද්දි තාත්තා වැඩපලේ ඉදලා වෑන් එකක ඇවිත් පුංචි පැල ගාව නවත්තගෙන බලන් ඉදලලු. පේ කපල් එක ගම්පහ ටවුන් එක පැත්තට ඇවිදගෙන යද්දි තාත්තත් වෑන් එකෙන්ම හොරෙන් ෆලෝ පාරක් දීලා. උපාසක හැප්පෙන්න ගිය හැටි, චංචලා අතින් අල්ලපු හැටි... මේ හැම දෙයක්ම තාත්තා දැකලලු. ඒ මදිවට අර මැසේජ් එක දුන්නු කොල්ලම හොරෙන් උපාසකලගෙ පිටිපස්සෙන් ඇවිත් ෆෝන් එකෙන් ෆොටෝ එකකුත් ගහලලු.

ඔන්න ඔහොමයි අපේ උපාසක ගෙදරට මාට්ටු වෙලා තියෙන්නෙ. ලොකු කෙනෙක් මෙහෙම කළානං දුක නෑ, ඒත් කොල්ලෙක්ම උපාසකව මාට්ටු කරල දීපු එකට උපාසක සෑහෙන තරහකින් තමා ඒ දවස් වල හිටියෙ. ඒ කොල්ලා වැඩ ඇරිලා එද්දි අල්ලගන්න බලාගෙන අපේ පූසො සෙට් එක දවස් කීපයක්ම බලාගෙනත් හිටියලු. හැබැයි මෑන්ස්ගෙ වෙලාවට පොරව අහුවුණේනං නෑ.....