අඹ යාලුවෝ

Friday, October 29, 2010

හොස්ටල් ලයිෆ් - සාන්ත කෙල බේරේ St.Cle Brey 3 - ස්ටාර් වෝර්ස් XVI


ඔන්න යාලුවනේ අපි අදින් සාන්ත කෙල බේරේ සීරීස් එක හමාර කරන්නයි යන්නෙ.ඒ වගේම ටික දවසකින් ලිපියක් ලියන්න බැරිවෙච්ච එක ගැන ඔයාලගෙන් සමාව ඉල්ලන්නත් ඕනෙ.හොදයි ඉතින් සාන්තගෙ පිටසක්වල කතාව කියවන්න කලින් කට්ටිය ගිහින් මෑන්ස්ගෙ පරණ කතා ටික කියවලා එන්නකෝ!

සාන්ත කෙල බේරේ 1සාන්ත කෙල බේරේ 2
මේ සිද්දිය වුණේ අපේ පූසො සෙට් එක 11 වසරෙ අන්තිම කාලෙ ඉන්නකොට.ඔය දවස්වල ඕ ලෙවල් විභාගෙත් ‍ගොඩක් කිට්ටු වෙලයි තිබුනෙ.දන්නැද්ද ඉතිං? ඔය කාලෙට කොල්ලන්ගෙ ඔලු වලට එන්නෙ අමුතු අමුතු අයිඩියාස් නොවැ!ඉතිං මේ දවස්වල ලෝඩ් කොක්ගෙ ඔලුවටත් ඔය වගේ අමුතු අයිඩියා පාරක් ඇවිල්ලයි තිබුනෙ.හැබැයි ඉතිං නෝටි අයිඩියා එකක්නං නෙවෙයි, පොඩි ෆිල්ම් එකක් හදන අදහසක්.පොර ඉතිං විභාගෙට පාඩම් කරන වැඩෙත් පොඩ්ඩක් පැත්තකින් තියලා ෆිල්ම් එක හදන වැඩේට අතගැහුවලු.

මුලින්ම ලෝඩ් කොක්ට තිබුන අභියෝගය වුණේ ෆිල්ම් එක හදන්න වීඩියෝ කැමරාවක් හොයාගන්න එක.හැබැයි වාසනාවට ඒ වැඩේ එච්චර මහන්සි නොවී කරගන්න මෑන්ස්ට පුලුවන් වුණාලු.මොකද ඒ දවස්වල තාරබාසු ළග අලුතින්ම ගත්තු විඩියෝ කැම් එකක් තිබුනා.ඉතිං ලෝඩ් පොඩි බටර් පාරක් ගෑවට පස්සෙ ෆිල්ම් එක වීඩියෝ කරන්න තමන්ගෙ කැම් එක දෙන්න තාරබාසු කැමති වුණාලු.ෆිල්ම් එකේ සහාය අධ්‍යක්ෂක වුණේ ඉතිං වෙනිං කවුරුවත් නෙවෙයි, අපේ පුරුපුරු.දැන් ලෝඩ්ටයි පුරුපුරුටයි ඊළගට තිබුනෙ ෆිල්ම් එකට ඕනෙ නළුවො ටික තෝරගන්න එක.
ඊට කලින් ෆිල්ම් එකේ කතාව කියලා ඉන්න එපායැ! කෙටියෙන් කිව්වොත් මේ ෆිල්ම් එකේ තියෙන්නෙ පෘථිවියට එල්ලවෙන ඒලියන් ඇටෑක් එකක්, එක්තරා වීරයෙක් මැදිහත් වෙලා නවත්තන හැටි.ෆිල්ම් එකේ නම තමයි "ස්ටාර් වෝර්ස් XVI".ඉතිං මුලින්ම තිබුනෙ පෘථිවිය බේරගන්න වීරයගෙ කැරැක්ටර් එකට නළු බට්ටෙක් තෝරගන්න එක.මේ කැරැක්ටර් එකට සුදුසුයි කියලා හැමෝගෙම ඒකමතික තීරණය වුණේ වෙන කවුරුත් නෙවෙයි, අපේ සාන්ත කෙල බේරේ.මොකද පිටපතේ හැටියට වීරයාට සක්වලයො විස්සක් විසිපහක් එක්ක තනියම ෆයිට් කරන්න වෙනවා.මේ ෆිල්ම් එකේ තිබුන විශේෂත්වය තමයි, ෆිල්ම් එක ඉවර වෙනකං අවසානය මොකද්ද කියලා කවුරුත් දැනගෙන නොහිටිය එක.
අපි ඉතිං කලින් කතාවලත් කිව්වා වගේ සාන්ත කියන්නෙ එච්චර දුරදිග හිතලා වැඩ කටයුතු කරන මෑන්ස් කෙනෙක් නෙවෙයි නොවැ!තමන්ව ෆිල්ම් එකක මේන් කැරැක්ටර් එකකට යෝජනා වෙලා කියලා දැනගත්ත ගමන්ම මෑන්ස් කළේ බොහොම සතුටෙන්, උඩ පැනලා කැරැක්ටර් එක බාරගත්ත එක.ඊට පස්සෙ ඉතිං පිටසක්වලයන්ගෙ චරිත වලට කට්ටිය තෝරගන්නයි තිබුනෙ.එක සක්වල සෙට් එකකට පුරුපුරු ඇතුලු රාත්‍රී ප්‍රහාරක බලකායත්, තවත් සෙට් එකකට පොන්ටින් ඇතුලු වෙන කට්ටියකුත් විදිහට පිටසක්වල සෙට් දෙකක් රගපාන්න අන්තිමේදි තීරණය කෙරුණලු.
පිටසක්වලයන්ගෙ ආයුධ විදිහට තෝරගත්තෙ හොස්ටල් එකේ ජාතික ආයුදේ වෙච්චි කොට්ටෙලු. පුරුපුරුලගෙ සක්වල සෙට් එක නයිට්වරු වගේ බෙල්ලෙ ටවල් ගැටගහගෙන, දිග කලිසමට උඩින් ජොකා ඇදගෙන පිටිපස්ස ජනේලෙන් පෘථිවියට එන්න තමයි තීරණය වුණේ.පොන්ටින්ලගෙ කට්ටිය ඔලුවට ජොක්කු දාගෙන, ටවල් ඇදගෙන ඉස්සරහ දොරෙන් පෘථිවියට එන්න තීරණය වුණාලු.ෆිල්ම් එක ෂූට් කරන්න නියමිත වෙලාව වුණේ කොටියා සර් නිදාගත්තට පස්සෙ මහ රෑ.ඒ වගේම තාක්ෂණයෙ හිගකම හින්දා, ෆිල්ම් එකට ඕනෙ කරන බැක්ග්‍රවුන්ඩ් මියුසික් යොදන්න වුණේ කටින් එක එක සද්ද දාන්න දක්ෂයෙක් වුණ හොංකොංට.
දැන් ඉතිං "ස්ටාර් වෝර්ස් XVI" චිත්‍රපටිය හදන්න ඕනෙ කරන හැමදේම ලෑස්තියිලු.ඉතිං ෆිල්ම් එක හදන්න කලින් පොඩි රියසල් පාරක් දාන්න පිටසක්වල නළුවන්ට ඕනෙ වුණාලු.අර කලින් කිව්වා වගේ පිටසක්වලයො විස්සක් විතර දොරෙනුයි ජනේලෙනුයි පෘථිවිය(ඩෝම් එක) ඇතුලට ඇවිල්ලා, පෘථිවියේ වීරයාට ලොවෙත් නැතිවෙන ඇටෑක් එකක් දුන්නට පස්සෙ තමයි වීරයාට තේරුණේ බාරගත්ත චරිතෙ තියෙන ගැඹුරු බව.
ඉතිං සාන්තට ඕනෙ වුණාලු චරිතෙන් ඉල්ලා අස්වෙන්න.ඒත් ඉතිං අවාසනාවට ඒ වෙද්දි වීරයාගෙ කැරැක්ටර් එකට ඉදිරිපත් වෙන්න තරං වෙන කවුරුත් නිර්භීත තත්ත්වෙක හිටියෙ නෑලු.ඒ හින්දා අන්තිමට අකමැත්තෙන් වුණත් සාන්තටම තමයි කැරැක්ටර් එක බාරගන්න වුණේ.ඉතිං චිත්‍රපටිය වෙනුවෙන් වීරයාගෙ එකම ඉල්ලීම වුණේ
"පෘථිවියට හෙන ගැහුවත් කමක් නෑ, මට වැඩිය නෙලන්න එපා"
කියන එක.අන්තිමේදි ලෝඩ් කොක් සාන්තගෙ ඉල්ලීම් වලට එකග වුණාට පස්සෙ එදා රෑ ෆිල්ම් එක ෂූට් කරන්න කට්ටිය තීරණ‍ය කළාලු.
*********************************************************************************************
කොහොම හරි ඉතිං එදා රෑ කාලෙත් උදාවුනයි කියමුකො.දැන් අපේ යාලුවන්ගෙ සූදානම "ස්ටාර් වෝර්ස් XVI" ෆිල්ම් එක ෂූට් කරන්න.කැමරාකරු තාරබාසු "ඇක්ෂන්" කියලා සිග්නල් එක දුන්න ගමන් ෂූටින් වැඩේ පටන් ගත්තලු.මේක ඉතිං ෆිල්ම් එකක් කිව්වට පොඩි ඩොකියුමෙන්ටරි එකක් වගේ එකක්.

ලෝඩ් කොක් :-

"ඔව් මිත්‍රවරුනි, අපි අද ඔබ වෙත ගෙනඑන්නේ තාරකා යුද්ධ‍ය, එහෙමත් නැත්තං ස්ටාර් වෝර්ස් XVIයි.බලන්න මිත්‍රවරුනි, පෘථිවිය කොයිතරම් අර්බුධයකට ලක් වෙලාද? පිටසක්වල ජීවින් පෘථිවිය ආක්‍රමණය කරන්න ඔන්න මෙන්න.දැන් මුලු ලෝකයේම ඉරණම රැදී ඇත්තේ එක් පුද්ගලයෙක් මතයි.ඔහු සාන්ත කෙල බේරේ................................." ‍චිත්‍රපටය
දැන් ඉතිං ෆිල්ම් එක නැගලා යනවලු.සාන්ත කෙල බේරේ සිනාමුසු මුහුණෙන් බලාගෙන ඉන්නෙ පිටසක්වලයො ඇටෑක් එකට එනකං.ඉතිං ටිකකින් වැස්ස පායලා මෙරු මතුවෙනවා වගේ ජනේලෙනුයි, දොරෙනුයි අමුතු ඇදුම් ඇදගත්තු පිටසක්වලයො එකා දෙන්නා මතුවෙන්න පටන් ගත්තලු.ටික වෙලාවක් යනකොට සක්වලයො ටික ඔක්කොම පෘථිවියේ වීරයා වෙච්ච සාන්ත කෙල බේරේව වට කරගෙනලු.එක පාරටම දරුණු පිටසක්වලයො ටික සාන්ත කෙල බේරේට අනුකම්පා විරහිත ඇටෑක් එකක් දෙන්න පටන් ගත්තලු.
ලෝඩ් කොක්:-

"ඔව් මිත්‍රවරුනි, අපගේ පෘථිවිය අනාතයි.අපේ ලෝකයේ ගැලවුම්කරු සාන්ත කෙල බේරේට පිටසක්වලයෝ ඉතා දරුණු ප්‍රහාරයක් දියත් කරනවා.නමුත් සාන්ත කෙල බේරේ පෘථිවිය වෙනුවෙන් අවසන් මොහොත දක්වා සටන් කරනවා.ඔව්! ඔව්!! මේ මොහොතේ සාන්ත කෙල බේරේ පිටසක්වල පුහාර හමුවේ බිම ඇදක් උඩට ඇද වැටුනා.ඇද වැටුණු සාන්ත කෙල බේරේව පිටසක්වලයන් විසින් තමන්ගේ ලෝකයට අරන් යන ආකාරයයි මේ දිස්වෙන්නේ"
අන්තිමට ඉතිං අම්බානක කොට්ට පාරවල් කාපු සාන්තව, කට්ටිය ඩෝම් එකෙන් එළියට උස්සගෙන ගිය එක ගැන තමයි ලෝඩ් එහෙම විස්තර කළේ.ෆිල්ම් එකේ අන්තිමට ඉතිං පෘථිවියට ඇටෑක් කරපු පිටසක්වලයො, මේ ලෝකෙ වීරයා වෙච්ච සාන්ත කෙල බේරේවත් කිඩ්නැප් කරගෙන ගිය එක තමයි සිද්ද වුණේ.හරිම සාම්ප්‍රදායික නොවන අවසානයක් නේද?
ප.ලි - ස්ටාර් වෝර්ස් XVI ෆිල්ම් එක විනාඩි 15ක විතර වීඩියෝ එකක්.අවාසනාවට දැන් මේක පූසන්ගෙ දත්ත ගබඩාවෙන් මැකිලා ගිහින්.ඉතිං මේ ලිපිය කියවන හොස්ටල් යාලුවෙක් ළග වීඩියෝ එක තියනවනෙං අපිට ලැබෙන්න සලස්වන්න හොදේ!
ඒ වගේම අපි සාන්ත ගැනත් වැඩි විස්තර නොකියා ඉන්නං.මොකද මෑන්ස් ඉස්සරහට රටේ ජනප්‍රිය ක්‍රීඩකයෙක් වෙයි කියලා ලක්ෂණ පේන්න තියනවා.

Monday, October 11, 2010

හොස්ටල් ලයිෆ් - සාන්ත කෙල බේරේ St.Cle Brey 2 - අක්කරේපත්තු ඇන්ටි


ඔන්න යාලුවනේ කාලෙකට පස්සෙ ආපහු බ්ලොග්අවකාශෙ පැත්තෙ එන්න ඉස්පාසුවක් හම්බවුණා.ඔයාලා අපි කලින් ලියපු සාන්ත කෙල බේරේ සිංදු අහපු කතාව රසවිදින්න ඇති කියලා හිතනවා.සාන්ත ගැන ලියනවනං ඉතිං කතා ගොඩාරියයි.ඒත් අපි මේ සීරීස් එකට තෝරගන්නෙ ඒ අතරින් කතා තුනක් විතරයි.අද කියන්න යන්නෙත් ඉතිං මෑන්ස්ට වෙච්ච නියම වැඩක් ගැන තමයි.

ඔය හොස්ටල් එකට පොඩි ළමයි ඇතුල් කරන්න, නිවාඩුවට ගෙවල් වලට ගියාට පස්සෙ ආපහු එක්කරගෙන එන්න, ගෙවල් වලට එක්ක යන්න වගේ හැම වැඩේටම ඒ අයගෙ ගෙවල් වල කට්ටිය හොස්ටල් එකට එනවා.ඒත් 10, 11 වගේ ලොකු ළමයින්ගෙ ගෙවල් වලින්නං එහෙම ලේසියෙන් එන්නෙ නෑ.ඒ අයගෙ ගෙවල් වලින් සාමාන්‍යයෙන් හොස්ටල් එකට එන්නෙ තමන්ගෙ ළමයා මොකක්හරි අංජබජල් කේස් එකකට මාට්ටු වෙලා කොටියා සර් ගෙදරින් එක්කගෙන එන්න කියලා දැනුම් දුන්නම තමයි.කොහොමහරි ඉතිං ඔය පොඩි ළමයින්ව එක්කගෙන යන්න එන්න, හොස්ටල් එකට ගොඩක් වෙලාවට එන්නෙ අම්මලා සහ සහෝදරියො තමයි.

හික්ස්...දැන් ඉතිං අමුතුවෙන් කියන්න ඕනෙ නෑනෙ, ඒ අතරෙ ටිකක් ඇහැට කනට පේන අම්මලා අක්කලත් ඉන්නවයි කියලා.ඉතිං ඔය 10, 11 වසර‍වල කොල්ලො නිවාඩු දෙන දවස්වලට එහෙම බොහොම විමසිල්ලෙන් ඉන්නෙ හොස්ටල් එකට එන ඇන්ටිලා, අක්කලා දිහා බලන්න.තරුණ කාලෙ නොවැ!

ඉතිං ඔහොම හොස්ටල් එකට ආව ගිය ඇහැට කනට විතරක් නෙවෙයි, නහයටත් පේන තරුණ ඇන්ටි කෙනෙක් තමයි අක්කරේපත්තු ඇන්ටි කියලා අපේ යාලුවො කට්ටිය හැදින්නුවෙ.ඇන්ටිගෙ පුතා හිටියෙ මතක විදිහට 6 වසරෙ.හැබැයි මේ ඇන්ටිව අක්කරේපත්තුව කියලා හැදින්නුවෙ එයා අක්කරේපත්තුවෙ හිටපු හින්දානං නෙවෙයි, පිටිපස්සෙන් බලපුවාම ඔය උඩ ෆොටෝ එකේ ඉන්න එක්කෙනා වගේ හින්දයි.දැන් ඉතිං ටියුබ් ලයිට් නැති යාලුවන්ට හිතාගන්න පුලුවන්නෙ හේතුව නේද?එක්කො අපිම කියන්නංකෝ.හේතුව තමයි පශ්චාත්භාගය අක්කරයක් විතර විශාල වෙච්ච එක.

කොහොම හරි සාන්ත හොස්ටල් එකට ඇවිත් වැඩි දවසක් යන්න කලින් මෑන්ස්ට ඔය ඇන්ටිව මීටරේට අහුවුණා.සාන්ත ඉතිං හිත හොද කොල්ලා නොවැ!ඉතිං මෑන්සුත් ඇන්ටි ගැන තමන්ට හිතෙන දේවල් හැමෝම එක්ක කියෙව්වා.මේවා ඇහෙද්දි තමයි හොංකොංටයි, පැන්ඩටයි එකතුවෙලා සාන්තට ගේමක් දෙන්න හිතුනෙ.

ඔය කාලෙ දැන් වගේ මොබයිල් ෆෝන් හැමෝම ළග තිබුන කාලයක් නෙවෙයි.ඒ දවස්වල හෑන්ඩ් ෆෝන් එකක් ළග තියෙනවයි කියන්නෙ ගෙදර බෙන්ස් එකක් තියෙනවා වගේ වැඩක් නොවැ!ඉතිං පොල්පොට් ගෙදරින් ගෙනාපු මොබයිල් ෆෝන් එකට ඒ දවස්වල ඩෝම් එකේ කොල්ලන්ගෙන් තිබුනෙ පුදුම ඉල්ලුමක්ලු.පැන්ඩලාගෙ ප්ලෑන් එක වුණේ ඔය ෆෝන් එක මාර්ගයෙන් සාන්තට නියම වැඩක් දෙන්න.

**************************************************************************************************

ඔන්න එක දවසක් ඩිනර් එක ඉවර වෙලා පොල්පොට් සාන්තට කතා කරනවලු

පොල්පොට් :- කෝ මේ කෙලබේරේ? සාන්ත.....සාන්ත.....මෙන්න උඹට කෝල් එකක්

සාමාන්‍යයෙන් සාන්තට වැඩිය කෝල් එන්නෙ නෑ.ඉතිං මෑන්සුත් බැලුවලු කවුද තමන්ට කෝල් කරන්නෙ කියලා.ඇරත් පොල්පොට්ගෙ ෆෝන් එකට?

සාන්ත කෙල බේරේ :- කවුද බං ??

පොල්පොට් :- ඉක්මනට වරෙං බං! අක්කරේපත්තු ඇන්ටි කියලා තමයි කිව්වෙ

මේක ඇහුනා විතරයි, සාන්තගෙ ඇස් දෙකෙන් හාට් විසිවෙන්න ගත්තලු.වහාම ෆෝන් එක ගත්තු මෑන්ස් කතාකරන්න පටන් ගත්තලු.ඇන්ටි ඇත්තටම තමන්ට කතා කරයිද? ඇරත් පොල්පොට්ගෙ ෆෝන් එකට කතා කරයිද? කියලා හිතන්න තරං ඉස්පාසුවක් සාන්තට තිබුනෙ නෑ.දැන් ඉතිං කට්ටිය කතාව හොරෙන් අහගෙන ඉන්නවලු.බැලින්නං ඇන්ටි වගේ කතා කරන්නෙ පැන්ඩා, දෙල්ගහ යට කොයින් බොක්ස් එකේ ඉදලලු.ඉතිං පැන්ඩගෙ ගොරහැඩි කටහඩ අක්කරේ ඇන්ටිගෙ නෙවෙයි කියලා තේරුම් ගන්නවත් සාන්තට හැකියාවක් තිබුනෙ නෑලු.

අක්කරේපත්තු ඇන්ටි (පැන්ඩා) :- අනේ සාන්ත, මම හැමදාම හොස්ටල් එකට එද්දි ඔයාව දකිනවා.ඔයා මං දිහා බලාගෙනමයි ඉන්නෙ නේද? අනේ මමත් ඔයාට කැමතියි සාන්ත

දැන් සාන්තගෙ ඇස්වල කලු ඉංගිරියාව වෙනුවට තියෙන්නෙ රතුපාට හාට් එකක්.අඩුගානෙ ඇන්ටි තමන්ගෙ නම දැනගත්තෙ කොහොමද කියලාවත් මෑන්ස්ට නිනව්වක් නෑ.

සාන්ත කෙල බේරේ :- අනේ මමත් ඔයාට කැමතියි.අපි හම්බවෙමුද?

අක්කරේපත්තු ඇන්ටි (පැන්ඩා) :-මමත් කැමතියි ළමයෝ.ඒත් ඔයාගෙ යාලු වසවර්තියො ටික හොස්ටල් එකේ ඉන්නකොට මම කොහොමද ඔයාව මීට් වෙන්නෙ.ඔයාට බැරිද හොස්ටල් එකෙන් එළියෙදි මාව මීට් වෙන්න?

සාන්ත කෙල බේරේ :- කොහෙදිද? කියන්න...කියන්න...

අක්කරේපත්තු ඇන්ටි (පැන්ඩා) :- පිටකොටුවෙ බෝ ගහ යට හොදයි නේද? අනේ මතක ඇතුව එද්දි රෝස පාට ටී ෂර්ට් එකක් ඇදගෙන එන්න.රෝස පාටට ඔයා හරී හැන්ඩ්සම් එකට ඉදී අනේ!

කොහොමහරි ඉතිං සාන්ත ඇන්ටිව හම්බවෙන්න දිනයක්, වෙලාවක් එහෙම දාගෙන කතාබහ ඉවර කළාලු.හැබැයි මේ වෙද්දි පැන්ඩගෙ පහේ කාසි සැලකිය යුතු ප්‍රමාණයක් වැඩේට වියදම් වෙලා.කොහොමහරි ඉතිං සාන්තට ඇන්ටිව මීට් වෙන්න තියෙන දවසත් උදාවුණාලු.එදා ලන්ච් එක ඉවර වෙලා ටික වෙලාවක් යද්දි මෙන්න බොලේ මෑන්ස් ෆුල් හැන්ඩියා වගේ ලෑස්ති වෙනවා.ඒ මදිවට කොහෙන්දෝ රෝස පාට‍ ටී ෂර්ට් එකකුත් හොයාගෙන.ඇන්ටිට ප්‍රසන්ට් කරන්න රෝස මලකුත් සල්ලි වලට අරගෙන.දැන් ඉතිං ඩෝම් එකේ කොල්ලොටික කොට්ට වලින් මූණූ වහගෙන බක බක ගගා හිනාවෙනවලු.ඒත් සාන්ත ඉන්නෙ ඒවා මීටර් වෙන්න තරං මෙන්ටැලිටියක නෙවෙයි.

කොහොමහරි ඉතිං ඒ වෙලාවෙ පිටකොටු ගිය සාන්ත එදා හවස හයට විතර ආපහු හොස්ටල් එකට ආවලු.රෝසමලනං පේන්න තිබුනෙ නෑ.ඉතිං ස්ටඩි එකයි, ඩිනර් එකයි ඉවර වෙලා මෑන්ස්ව අල්ලගත්තු කොල්ලො කට්ටිය ඇහුවලු මොකද සිද්ද වුණේ කියලා.දැන් ඉතිං සාන්ත ෆුල් ස්ටෝරියක් ඇදබානවා.ඇන්ටිව හම්බවෙච්ච හැටි, රෝසමල දුන්න හැටි, තව එක එක ඒවා කරපු හැටි රගපපා පෙන්නනවා.දැන් ඉතිං කට්ටියට මැරෙන්න හිනා.

ඔහොම කතා කර කර ඉන්න අතරෙ ආපහු පොල්පොට්ගෙ ෆෝන් එක රින්ග් වෙන්න පටන් ගත්තලු.බැලින්නං අක්කරේපත්තු ඇන්ටි.පොල්පොට් වහාම සාන්තට ෆෝන් එක දුන්නලු

අක්කරේපත්තු ඇන්ටි (පැන්ඩා) :- සාන්ත, මොනවද බබෝ ඔයා යාලුවන්ට බොරු කියන්නෙ? අපි අද මීට් වුණේ නෑනෙ.ඔයා පරක්කු වෙච්ච නිසා මම යන්න ගියා

සාන්ත වහාම කෝල් එක කට් කරාලු.මෑන්ස්ට තවමත් මීටර් නෑ මේක ඩෝම් එකේ සගයො තමන්ට දුන්න දිරච්ච ලණුවක් කියලා.

දැන් කොල්ලො කට්ටියට ඕනෙ සාන්තව බයිට් කරන්න.ඒත් ඉතිං ඒකට ඉස්සරවෙලාම මෑන්ස් දැනගෙන ඉන්න එපායැ තමන් රැවටුනා කියලා.ඉතිං ඩෝම් එකේ කට්ටිය සාන්තට කියලා දුන්නලු මුල ඉදලාම සිද්ද වුණේ මොකද්ද කියලා.

ඒත් අන්තිමට සිද්දවුණේ කවුරුත් නොහිතපු දෙයක්.අනිත් කට්ටිය ඔලුවෙන් හිටගෙන කිව්වත් සාන්ත පිළිගත්තෙ නෑ අක්කරේපත්තු ඇන්ටි තමන්ට කතා නොකරපු වග.කොටින්ම මෑන්ස් හොස්ටල් එකෙන් යනකම්ම හිතාගෙන හිටියෙ ඇන්ටිම තමයි තමන්ට ගේම දුන්නෙ කියලා.එක දවසක් ඇන්ටි හොස්ටල් ආපු වෙලාවක පොර එයත් එක්ක මේ ගැන කතා කරන්න යන්න හදද්දි අනිත් කොල්ලො ටික මෑන්ස්ව අමාරුවෙන් නවත්තගෙන තිබුනා.

කොහොමහරි අන්තිමට බයිට් වුණේ සාන්ත නෙවෙයි, අනිත් කොල්ලො කට්ටියලු.හැබැයි මේ වැඩේ නිසා සාන්තගෙයි,යාලුවන්ගෙයි දෙගොල්ලන්ගෙම සල්ලිනං නාස්ති වුණා...

ප.ලි - සාන්ත වගේම, ඇන්ටි කෙනෙක්ට ට්‍රයි කරපු කොල්ලෙක් ඉන්න මලීනා (MALENA) ෆිල්ම් එක හරිම ලස්සනයි.බලපු නැති කවුරුහරි ඉන්නවානං හොයාගෙන බලන්න

Sunday, October 3, 2010

හොස්ටල් ලයිෆ් - සාන්ත කෙල බේරේ St.Cle Brey - වෙජිමයිට් නිකාය


ඉතිං යාලුවනේ කොහොමද? ඔන්න අපි ඔයාලට ටික දවසකට පස්සෙ ගොඩාක් රසවත් සීරීස් එකක් අරගෙන ආවා.හික්ස්...ඒ වගේම මේ සීරීස් එක මෙගා නාට්‍ය ස්ටයිල් එකට ලියන්නෙ නැති හින්දා කලබල වෙන්න කිසිම කාරියක් නෑ ඕං!අනිත් කාරනේ තමයි මේ සීරීස් එකට මේ නම දැම්මෙ කිසිම ආගමකට අපහාස කරන්න එහෙමනං නෙවෙයි.එහෙමනං ඉතිං කියවන්න පටන් ගනිමුකො නේද?

සාමාන්‍යයෙන් කුරුදුවත්ත හොස්ටල් එකට ඇතුල් කරගන්නෙ ශිෂ්‍යත්වෙ පාස් වෙලා එන, අපේ ටැබූගෙ වචනයෙන් කියනවනං ගොඩේ බයියා ළමයින්ව විතරයි.ඒත් කලාතුරකින් එක එක හේතු උඩ, ශිෂ්‍යත්වෙන් නැතුව ඉස්කෝලෙට ආපු ළමයින්වත් හොස්ටල් එකට ඇතුල් කරගත්ත අවස්ථා තිබුනෙ නැතුවාම නෙවෙයි.එහෙම හොස්ටල් එකට ආපු ළමයෙක් තමයි සාන්ත කෙල බේරේ කියන්නෙ.

සාන්තගෙ ගම්පළාත වුණේ දකුණු පළාතෙ, ඉස්සර සත්තු වත්තක් එහෙම තිබුන පැත්තක්ලු.ඒ වගේම මෑන්ස් පොඩිකාලෙ ඉදලාම ක්‍රිකට් ක්‍රීඩාවට සෑහෙන හපන්කමක් දක්වපු බුවෙක්ලු.අධ්‍යාපනය ගැන කියනවනං ඉතිං ඒ ගැන කතා නොකර ඉන්න තරමට හොදයි.මොකද මෑන්ස්ගෙ අධ්‍යාපන මට්ටම කොච්චර විශිෂ්ටද කියනවනං පොරට ඒ දවස්වල "සාන්ත කෙල බේරේ" කියලා ලියාගන්නවත් බෑ.කොහොම වුණත් ක්‍රිකට් කෙළියට පින්සිද්ද වෙන්න අපේ යාලුවාටත් පුලුවන් වුණාලු කුරුදුවත්ත ඉස්කෝලෙට ඇතුල් වෙන්න.

සාන්ත කෙල බේ‍රේ කියන්නෙ අති විශිෂ්ට පිතිකරුවෙක්.මෑන්ස් අවුරුදු දෙකක් තෝරමාලු බිග්මැච් එක ගැහුවා.සාපෙ හරියට ගොඩදාගත්තනං තව අවුරුදු දෙකක් විතර ගහන්නත් තිබුනා.කොහොම වුණත් සාන්ත සෙල්ලං කළේ කුරුදුවත්ත ඉස්කෝලෙ ක්‍රීඩා අංශයෙන් පට්ට නසරාණි වෙලා තිබුන කාලෙක.කොටින්ම කිව්වොත් ඒ දවස්වල එක පාරක් ඉස්කෝලෙ රගර් ටීම් එක මරියකඩේ ඉස්කෝලෙටත් පැරදුනා.

ක්‍රිකට් සෙල්ලම තිබුනෙ ඊටත් වඩා ගව් ගානක් පහළින්.ඉතිං සාන්ත බිග් මැච් ගහපු පළවෙනි අවුරුද්දෙ, මැච් එක ගහන්නත් කලින්ම අම්බානක කෑමක් තමයි කියලා මුලු ඉස්කෝලෙම දැනගෙන හිටියා.ප්‍රශ්නෙ තිබුනෙ මැච් එක කන්නෙ ඉනින්ස් වලින්ද නැද්ද කියන එක.මොකද මුලු ටීම් එකටම හොද බැට්ස්මන්ලා හිටියෙ දෙන්නයි.ඒ අදාල අවුරුද්දෙ කැප්ටනුයි, සාන්ත කෙල බේරේයි.කොහොම හරි ඉතිං ඒ අවුරුද්දෙ බිග්මැච් එක හිතපු විදිහටම ඉනින්ස් වලින් පැරදුනා.සාන්තටත් හරියට ලකුණු ගන්න බැරිවුණා.ඒ වෙනුවෙන් මෑන්ස්ට හොස්ටල් බැච් මේට්ලාගෙන් හොද හූ සංග්‍රහයකුත් හම්බවුණා.

කොහොමහරි ඉතිං ඉස්කෝලෙට ඇතුලත් කරගත්තු සාන්තට කලින් කිව්වා වගේ හොස්ටල් එකේ නවතින්නත් චාන්ස් එක ලැබුනලු.ඒ වගේම මෑන්ස් ඇවිල්ලා වැඩි දවසක් යන්න කලින් බැච් එකේ ප්‍රසිද්දම චරිතෙ වුණේ සාන්ත තමයි.ඒකට ප්‍රධානම හේතුව වුණේ සාන්තගෙ විකාර හැසිරීම් රටාව.

සාන්ත හිත හොද කොලුවා.ඒ වගේම මෑන්ස් ඕනම බොරුවකට පටස් ගාලා අහුවෙනවා.බැරිවෙලා හරි ඉර හතරැස් කියලා කවුරුහරි කිව්වොත් සාන්ත කරන්නෙ කිසි හෙවිල්ලක් බැලිල්ලක් නැතුව ඒක විශ්වාස කරන එක.මේ ගතිගුණේ නිසා පොරට වුණ අප්සට් වැඩ අපි කියන්නෙ අද නෙවෙයි,සීරීස් එකේ දෙවෙනි කොටසින්.අද අපි කියන්නෙ සාන්තගෙ තිබුන එකම විනෝදාශෙ හින්දා මෑන්ස්ට වෙච්ච අප්සට් වැඩක් ගැන.

සාන්තගෙ විනෝදාංශෙ තමයි සින්දු අහන එක.හැබැයි ඒ එකම ටයිප් එකක සින්දු විතරයි.අපේ කියවන යාලුවන්ට මතක ඇතිනෙ ඒ දවස්වල "කබි කුෂි කබි ගම්" කියන හින්දි ෆිල්ම් එකේ සින්දු සිංහලට හරවලා කැසට් පීස් එකක් ගැහුවා.ඉතිං සාන්තගෙ වැඩේම ඔය කැසට් පීස් එක උදේ ඉදන් රෑ වෙනකං අහ අහා ඉන්න එක.ඒත් හොස්ටල් එකේ වැඩිපුර හිටියෙ අමරදේව, කපුගේ වගේ ගායකයන්ගෙ සින්දු අහපු කට්ටිය.(බස් අජිත් මහත්තයගෙ සින්දු අහපු අයත් හිටියෙ නැතුවාම නෙවෙයි).ඉතිං හොස්ටල් එකේ අනිත් ළමයින්ට සාන්තගෙ සිංදු ඇහිල්ල හිසරදයක් වෙන්න වැඩි කාලයක් ගියෙ නෑලු.කොටින්ම දැන් ඩෝම් එකේ හැමෝටම මේ සිංදු ටික අහලාම කටපාඩම් වෙලා තිබුනෙ.

ඉතිං හොස්ටල් ළමයි මේ සිංදු වලට කිව්වෙ සිංදු කියලා නෙවෙයි, "ගාථා" කියලා."සුරංගනා සිත්තම්" ගාථාව,"බෝලෙ චූටියා බෝලෙ හංගනා" ගාථාව වගේ සිංදු-ගාථා ඒ දවස්වල පූසො ඇතුලු ළමයි ඔක්කොටම කටපාඩම්ලු.ඒත් ඉතිං ගාථා තියෙන්නං ආගමක් තියෙන්න එපායැ! ඉතිං කට්ටිය එකතුවෙලා තීරණය කළාලු සාන්ත කෙල බේරේ කියන්නෙ වෙනම ආගමක ශාස්තෘවරයෙක් කියලා.(එහෙම තමයි සාන්ත කෙල බේරේ කියන නම වැටුනෙ) සාන්තගෙ ආගමේ නම තමයි "වෙජිමයිට් නිකාය".

ඒ නම හැදුනෙ මෙහෙමයි, ඒ දවස්වල ඔය "ඉල්ලං පරිප්පු කනවා" කියන යෙදුම වෙනුවට කට්ටිය පාවිච්චි කරපු ජනප්‍රිය යෙදුමක් තමයි "-- මාමයිට් ගාගන්නවා" කියන එක.ඒත් සාන්ත කරගන්න වැඩවල හැටියට පොරට මාමයිට් කියන වචනෙ යොදලා මදි.ඉතිං වෙජිමයිට් කියන්නෙ මාමයිට් වලට වඩා ලොකු බෝතලයක් නිසා කොල්ලො කට්ටිය සාන්තගෙ වැඩ සම්බන්දෙන් කිව්වෙ "-- වෙජිමයිට් ගාගන්නවා" කියලලු.ඔය යෙදුමෙන් ඩිරයිව් වෙලා තමයි වෙජිමයිට් නිකාය කියන නම හැදුනෙ.

කොහොමහරි, කතාකරනකොට කටේ කොනෙන් කෙල බේරෙන ගතියක් තිබුන නිසා "කෙල බේරේ" කියන කාඩ් එක වැටිලා හිටපු බුවා, වෙජිමයිට් නිකායෙ නායකයා වුණාට පස්සෙ "සාන්ත කෙල බේරේ" බවට පත්වුණාලු.

ඔය දවස්වල පුරුපුරුටනං වෙජිමයිට් ගාථා ටික උදේ ඉදන් ඇහෙද්දි වමනෙ යන්න වගේලු.ඉතිං අපේ රාත්‍රී ප්‍රහාරක බලකායෙ කට්ටිය සාන්තට පොඩි වෝනින් එකක් දුන්නලු ගාථා ටික විකාශය වෙන පැය ගාන අඩුකරන්න කියලා.ඒත් කොයි ආගම වගේම වෙජිමයිට් නිකායත් කැමති වුණේ නෑ වෙන කාටවත් සෙකන්ඩ් වෙන්න.ඉතිං සාන්ත කළේ සිංදු විකාශය වෙන පැය ගාන තවත් වැඩි කරපු එකලු.දැන් අපේ යාලුවො මහ රෑ ලේට් ස්ටඩීස් ඉවරවෙලා හොස්ටල් එකට එද්දිත් ඇහෙන්නෙ සාන්තගෙ සිංදු

"සුරංගනා සිත්තම්.....කාන්තිමත් වෙන තුරා.............."

ඉතිං මේ වැඩේ හරියන්නෙ නැති නිසා රාත්‍රී ප්‍රහාරක බලකාය තීරණය කළාලු සාන්ත කෙල බේරේට කොට්ට ගේමක් දෙන්න ඕනෙයි කියලා.මතක ඇතිනෙ, ඒ කියන්නෙ අර ලයිමෝල්ට දුන්න ජාතියෙ ගරිල්ලා කොට්ට ප්‍රහාරයක්.ඉතිං එක දවසක් රෑ කට්ටිය ඔය කොට්ට ප්‍රහාරෙ ක්‍රියාත්මක කළාලු.සාන්තට වුණේ ජීවිතේ පළවෙනි පාරට කොට්ට ඇටෑක් එකකට ෆේස් කරන්න.ඉතිං අපේ යාලුවො හිතුවෙ එදායින් පස්සෙනං සාන්තගෙ ගාථා විකාශනය අඩුවෙයි කියලා.ඒත් සිද්දවුණේ කවුරුත් නොහිතපු දෙයක්.

පහුවදා කට්ටිය ලේට් ස්ටඩීස් ගිහින් නිදිමරගාතෙ ආපහු එනකොට මෙන්න බොලේ මහා හයියෙන් සිංදුවක් යනවාලු.

"බෝලෙ චූටියා........බෝලෙ හංගනා........."

ඕක අහපු පුරුපුරු ඇතුලු බලකායෙ කට්ටියට ෆ්ලවර් එකෙත් හොදම එක ජම්ප් වුණාලු.ඉතිං කට්ටිය කතාවුණාලු එදා රෑම සාන්තට ස්පෙෂල් ගේමක් දෙන්න ඕනෙයි කියලා.

ඉතිං රාත්‍රී ප්‍රහාරක බලකායෙ යාලුවො එක තැනකට රැස්වෙලා සාන්තට දෙන ගේම් එක ප්ලෑන් කරන්න ගත්තලු.මුලින්ම කට්ටිය කළේ මුදලාලිව යවලා හොස්ටල් කිචන් එකෙන් දිග කඹයක් ගෙන්න ගත්ත එක.මුදලාලියි, කිචන් එකේ හිටපු අජියයි එකම ගමේ බුවාලා හින්දා ඒ වැඩේ එච්චර අමාරු වුණේ නෑ.ඊට පස්සෙ රාත්‍රී ප්‍රහාරක බලකාය කළේ සුපුරුදු විදිහට බඩගාගෙන, කොට්ටයි කඹෙයි අරගෙන ගිහින් සාන්තගෙ ඇද වටකරපු එක.

මේ වෙද්දි සාන්ත ඇද උඩ ඇලවෙලා හිටියත් මෑන්ස්ට නින්ද ගිහින් තිබුනෙ නෑ.ඉතිං කට්ටිය රෙඩි වුණාට පස්සෙ පුරුපුරුගෙ සිග්නල් එකට අනුව මාලුකට්ටා ඩෝම් එකේ ලයිට් එක ඕෆ් කළාලු.එතකොටම බලකායෙ අනිත් කට්ටිය පැනලා සාන්තට දැවැන්ත කොට්ට ප්‍රහාරයක් එල්ල කළාලු.දැන් සිද්ද වෙන්නෙ මොකද්ද කියලා මෑන්ස්ට හිතාගන්න බෑ.ඊටපස්සෙ පුරුපුරුයි, අමන්දානන්දයි එකතු වෙලා කළේ සාන්ත කෙල බේරේව ඇදට තියලා කඹෙන් බැදපු එක.ඊටත් පස්සෙ රේඩියෝ එක ඕෆ් කරපු අපේ යාලුවො කට්ටිය හිතේ සැහැල්ලුවෙන් නිදාගන්න ගියාලු.

මෙන්න බොලේ ටික වෙලාවකින් මහ හයියෙන් විසිල් ගහන සද්දයක් එන්න ගත්තලු.නිකං සද්දයක් නෙවෙයි, අර කැසට් පීස් එකේ තිබුන සින්දුවක තාලෙට ගහපු විසිල් සද්දයක්.බැලින්නං සාන්ත කෙල බේරේ, රාත්‍රී ප්‍රහාරක බලකායෙ කට්ටියට බයිට් එකට ඇදට වෙලා විසිල් ගහනවා.මේක අහලා ෆ්ලවර් ජම්ප් වෙච්ච අමන්දානන්ද කළේ ආපහු ගිහින් සාන්තගෙ ඇද කෙලින් අතට හිටවලා ආපු එක.එතකොට තමයි සාන්තට තරු විසිවුණේ.ඇයි ඉතිං මුලු රෑම හිටගෙන ඉන්න ඇක්ෂන් එකෙන් ඉන්න වෙනවා නොවැ!

කොහොමහරි ඩෝම් එකේ ළමයි පහුවදා උදේ නැගිටිද්දි සාන්ත අර හිටගෙන ඉන්න ඇක්ෂන් එකෙන්ම නිදාගෙන ඉන්නවලු.ඉතිං අපේ යාලුවන්ටත් දුක හිතිලා අමන්දානන්දටත් බැනලා සාන්තව ලිහලා දැම්මලු.සාන්ත කළේ ලිහපු ගමන්ම ගිහිං කැසට් එක ආපහු ඔන් කරපු එක.ඉතිං හැමදාම අහන ගාථාව එදා පුරුපුරුලාට අහන්න වුණේ වෙනදටත් වඩා උදේ පාන්දරින්.

"සුරංගනා සිත්තම්.....කාන්තිමත් වෙන තුරා.............."

එදායින් පස්සෙ රාත්‍රී ප්‍රහාරක බලකාය තීරණය කළාලු සාන්තගෙ ගාථා විකාශය නවත්තන වැඩේ අල්ලලා දාන්න.......