චංචලා - 3 (අයිස්ක්‍රීම් කෑම)

ඉතිං යාලුවනේ ඔයාලට මතක ඇතිනෙ අපේ උපාසකයි චංචලායි ගොඩ ගියෙ කොහොමද කියලා. තවම ඒ ගැන කියෙව්වෙ නැති යාලුවො ඉන්නවානං ගිහින් ඒ කතා දෙක මුලින්ම කියවලා එන්නකෝ

චංචලා - 1
චංචලා - 2

ඉතිං 12 වසරෙදි පටන් ගත්ත මේ ආදර සම්බන්දෙ නිසා අපේ උපාසකට ගොඩක් රසවත් සිද්දි වලට, අප්සට් සීන් වලට ෆේස් කරන්න වුණා. අද අපි කියන්න යන්නෙ උපාසකට වෙච්ච ඒ වගේ රසවත් සිද්දියක් ගැන.

දැන් ඉතිං මේ වෙද්දි අපේ උපාසකගෙ ලව් එක හොදට නැගලා යනවා. මෑන්ස් අර තමන්ගෙ තිබුන සියලු ආඩම්බරකම් අතඇරලා දාලා මේ වෙද්දි චංචලාට බොක්කෙන්ම ලව් කරනවලු. කොටින්ම මේ වෙද්දි දෙන්නට දෙන්නා දකින්නෙ නැතුව දවසක්වත් ඉන්න බැරි තත්ත්වයක් තමයිලු තිබුනෙ. අපි කලිනුත් කිව්වා වගේ චංචලා ඒ ලෙවල් වලට කළේ කොමර්ස්. උපාසක කළේ මැත්ස්. ඉතිං මේ දෙන්නාට එකම සබ්ජෙක්ට්ස් කරන කපල් වලට වගේ ක්ලාස් වලදි මීට් වෙන්න චාන්ස් එකක් තිබුනෙ නෑ.

ඉතිං මේ ප්‍රශ්නෙට විසදුමක් විදිහට ජෝඩුව කළේ වෙනම අමතර පන්තියක් දාගත්ත එක. සතියෙ කතා කරගත්තු දවසක චංචලා එකවුන්ටින් ක්ලාස් එකකට යනවා කියලා ගෙදරින් එනවා. උපාසක ෆිසික්ස් ක්ලාස් එකකට යනවා කියලා ගෙදරින් එනවා. අන්තිමට ඉතිං දෙන්නා කරන්නේ ඉස්කෝලෙන් පස්සෙ සෙට් වෙලා ක්ලාස් එක පවත්වන එක. ඒ වගේම ගොඩක් වෙලාවට මේ ක්ලාස් එක පවත්වන්නෙ ගෝල්ෆේස් එක පැත්තෙලු.

ඉතිං මේ අමතර පන්තිය ඉවරවෙලා ගෙදර යන ගමන් පිටකොටුවෙ කඩේකින් කෑම කාලා යන්නත් මේ දෙන්නා අමතක කරන්නෙ නෑ. මොකද අපේ උපාසක මොන වැඩේ තිබුනත් කන බොන වැඩේට ඒවායින් කිසිම පාඩුවක් කරගන්නේ නැහැ නොවැ!

ඉතිං මේ වැඩේ වෙලා තියෙන්නෙත් ඔය අමතර පන්තියක් තිබුන දවසක. එදා අපේ යාලුවො දෙන්නට හිතුනලු ගෙදර යන ගමන් චිකන් ‍ෆ්‍රයිඩ් රයිස් කන්න ඕනෙයි කියලා. ඉතිං මේ දෙන්නා කරලා තියෙන්නෙ වෙනදා කෑම කන කඩෙන්ම චිකන් ෆ්‍රයිඩ් රයිස් ඕඩර් කරන එක. හැබැයි ඕඩර් කළාට මොකද, වේටර් කාරයා පිගන් දෙක උස්සගෙන එද්දි තමයි දෙන්නට තේරිලා තියෙන්නෙ බරපතල මානුෂික මෙහෙයුමක් කරන්න වෙන බව. මොකද ඒ කඩේ ෆ්‍රයිඩ් රයිස් එක්ක දෙන චිකන් කෑල්ල ගඩොල් බාගයක් වගේ මහ විසාල එකක්ලු.

අපේ උපාසකනං ඉතිං කුකුලෙක්වම දුන්නත් බෑ නොකියා කන පූසා. හැබැයි මේ චිකන් කෑල්ලෙ සයිස් එක දැකලා චංචලාගෙනං ඇස් දෙකත් උඩ ගියාලු. මේක දැකපු උපාසකට තේරුණාලු චංචලා ෆේස් කරලා ඉන්න බරපතල සිටුවේෂන් එක. ඉතිං අපේ උපාසකත් "පවුනෙ පොඩි එකී" කියලා තීරණය කළාලු චංචලාට පොඩි හෙල්ප් එකක් දෙන්න ඕනෙයි කියලා. මෑන්ස් ඊටපස්සෙ කළේ චංචලාගෙ ප්ලේට් එකේ තිබුන චිකන් කෑල්ල පොඩි පොඩි කොටස් වලට කඩලා ‍දුන්න එක. මේ අතරෙ ඉතිං පොඩි කෑලි එකක් දෙකක් උපාසකගෙ බඩටත් ගියයි කියන එක අමුතුවෙන් කියන්න දෙයක් නෑනෙ නේද යාලුවනේ?

ආ...කලින් කියන්න බැරිවුණානෙ. එදා මේ දෙන්නා කඩේට එද්දි කඩේ තිබුන හැම ටේබල් එකකම මිනිස්සු හිටියලු. ඉතිං අපේ කපල් එකට වාඩිවෙන්න වෙලා තියෙන්නෙ තව මනුස්සයෙක් හිටපු ටේබල් එකක. අපේ උපාසක අර චිකන් කෑල්ල කොටස් කීරීමේ මෙහෙයුම දිහා මේ මෑන්සුත් ඉතිං බොහොම උනන්දුවෙන් බලාගෙන හිටියලු. පස්සෙ මෑන්ස් කළේ උපාසකත් එක්ක හොද ෆ්‍රෙන්ඩ්ලි හිනාවක් දාපු එක. අපේ උපාසකත් ඉතිං මෑන්ස් එක්ක හොද හිනාවක් දාලා චංචලා එක්ක කෑම එක කන්න පටන් ගත්තලු.

ටේබල් එකේ හිටපු මනුස්සයා කාලා ඉවරවෙලා එතනින් නැගිටලා ගියෙ ඊටත් ටික වෙලාවකට පස්සෙ. තවත් ටික වෙලාවකින් කඩේ හිටපු වේටර් කෙනෙක් තඩි අයිස්ක්‍රීම් කප් දෙකක් උස්සගෙන උපාසකලා හිටපු ටේබල් එක පැත්තට එනවලු. මේක දැකපු අපේ පූසාට දවල් තරු පෙනුනලු. ඇයි දෙයියනේ බස් එකේ යන්න විතරයි සල්ලි ඉතුරු. මේ යකාට හැබෑටම පිස්සුද ඕඩර් නොකරපු අයිස්ක්‍රීම් ගේන්න???

උපාසක :- අයියා, අපි අයිස්ක්‍රීම් ඕඩර් කළේ නෑනෙ...

වේටර් :- මේ ටේබල් එකට කියලා තමයි මටනං කිව්වෙ මහත්තයා

උපාසක :- කවුද කිව්වෙ? අපිනං ඕඩර් කළේ නෑ. මට හොදටම ෂුවර්. අනික අපි බත් කාලා ඉවරත් නෑනෙ.

උපාසක මෙහෙම කියනකොටම එතනට තවත් මෑන්ස් කෙනෙක් ආවලු. බැලින්නං ඒ තමයි අර ටේබල් එකේ ඉදලා, පූසත් එක්ක හිනාවක් එහෙම දාලා, නැගිටලා ගිය මෑන්ස්.

මෑන්ස් :- මල්ලි මමයි ඔයාලා දෙන්නාට අයිස්ක්‍රීම් ඕඩර් කළේ. බිල මගේ ගානෙ දැම්මා. ඔය දෙන්නා හැමදාම ඔයවගේ සතුටින් ඉන්න. මගේ සුභපැතුම් ඔය දෙන්නාට

මෙහෙම කියපු මෑන්ස් ඉක්මනටම ආපහු හැරිලා ගියෙ උපාසකටයි චංචලාටයි එයාට ස්තුති කරන්නවත් වෙලාවක් ඉතුරු නොකර. මේ සිද්ද වෙච්ච සිද්දිය ගැන අපේ යාලුවො දෙන්නාට හරිම පුදුමයි. හැබැයි ඒ වෙද්දි හොදටම හවස්වෙලා තිබුන හින්දා, පුදුම වෙවී නාස්ති කරන්න තරම් වෙලාවක් චංචලාලට ඉතුරු වෙලා තිබුනෙ නෑ. කොහොමහරි ඉතිං ඒ මෑන්ස්ට හිතින් පින් දිදී දෙන්නා අයිස්ක්‍රීම් දෙකත් ඉවර කරලා ඉක්මනට ගෙදර ගියාලු. හැබැයි එදායින් පස්සෙ කවදාවත් අපේ කපල් එකට මේ මනුස්සයාව ආපහු මුණගැහුනෙ නෑ.

ප.ලි - අදටත් උපාසක දන්නෙ නෑ ඒ මෑන්ස් කවුද? ඇයි එහෙම කළේ? කියලා. ඒත් කොහෙහරි ඉදලා එයා බ්ලොග් ගඩොල් කියවනවානං, එදා පිටකොටුවේ නීලගිරියෙදි සිද්දවුණ මේ සිද්දිය ගැන උපාසක ගොඩක් සතුටු වෙන බවත්, එයාට ගොඩක් ස්තුති කළා කියලත් කියන්න කැමතියි. සමහරවිට සාමාන්‍ය දෙයක් වගේ පෙනුනත්, ආදරය කරන දෙන්නෙකුට ඒක විශේෂ අත්දැකීමක්............