අඹ යාලුවෝ

Friday, April 30, 2010

පූසො බියර් බීපු හැටි - 2 !!


අද බලමුකො අපේ යාළුවො ටික බියර් බීපු හැටි! දැන් කට්ටිය වට පිට බල බලා හොර පූසො ටික වගේ බෝතලේට කිට්ටු වෙනවා. ඒත් එක්කෙනෙක්වත් වැඩේ පටන් ගන්න පාටක් පේන්න නැහැලු. බැරිම තැන බෝතලේ අතේ තියාගෙන හිටපු රෙජීට සුබ මොහොතින් මේ මහා සද්කාර්යය කරන්ඩ කියල පුරුපුරුගෙන් ආරාධනා ලැබුනා. එතන ඇති වුණේ මේ වගේ කතාබහක්!!

රෙජී - මචං, මට අද හවස ගණන් පංති තියනවා. පරක්කුත් වෙනව බං! උඹල බීපං, එළකිරි ආ.. අවුලක් නෑනෙ? මම යනව මචං.......

මෙහෙම කියපු රෙජී පටස් ගාල එතනින් ඌර්ධවපාතනය වුණා. දැන් ඉතුරු හතර දෙනයි! ඒ තමයි ඤාව්වා, මාළු කට්ටා, පුරු පුරු සහ වේයන්ගොඩයා.

ඔන්න ඉතිං හතර දෙනාම සූරයෝ කියල ආපහු වැඩේ පටන් ගත්තලු. දැන් බෝතලේ තියෙන්නෙ මාළු කට්ට ළඟ!

මාළු කට්ටා - මමනං මචං හැමදාම බොනවනෙ! අද උඹල බීපං
(එහෙම කිව්වට අපේ යාළුව එතිල් ඇල්කොහොල් තියන බෝතලයක් ඇල්ලුවෙත් එදාම කියලා තමයි ආරංචිය)

ඔන්න ඔහොමයි මාළු කට්ට වැඩෙන් ශේප් උනේ. දැන් ඉතුරු තුන් දෙනයි! ඒ තමයි ඤාව්වා, පුරු පුරු සහ වේයන්ගොඩයා. ඒත් බලනකොට පේන්න හිටියෙ දෙන්නයිලු! බැලින්නං වේයන්ගොඩයත් හොරෙන්ම පැනල ගිහිං සළකුණක්වත් නැතුව! ආයි ඉතිං ෂර්ලොක් හෝම්ස් ආවත් හොයන්න බෑ. ඊටපස්සෙ ඉතිං ඤාව්වයි පුරු පුරුයි වැඩේට සෙට් වුණාලු. ඤාව්වත් උගුරු දෙකක් බීල ශේප් වුණාලු. අන්තිමට පුරු පුරුට බෝතලෙන් 90%ක් විතර තනියම බොන්න වුණාලු.

ප.ලි. - මේ කතාව සිද්ද වුනේ අපේ කට්ටිය 10 වසරෙ ඉන්නකොට බව කරුණාවෙන් සලකන්න. දැන්නං සමහරු වර්ල්ඩ් ක්ලාස් බෙබාලා වී සිටිති!!!!


නමුත් පුරු පුරු නම් අමද්‍යපයි. එයා යාළු වුනෙත් ඉස්කෝලෙ අමද්‍යප සංගමයෙ සභාපති තනතුර දරපු ගෑනු ළමයෙක් එක්ක නොවැ! ඒ කතා පස්සෙ දවසක.........

Wednesday, April 28, 2010

පූසො බියර් බීපු හැටි!!


පොඩි පොඩි අකරතැබ්බ කීපයක් නිසා පළවෙනි ලිපිය ලියන්න පරක්කු වුණා. ඒ වගේම පළවෙනි ලිපිය ලියන්නෙ ඇල්කොහොල් ගැන. ඒ හින්ද මුලින්ම ඔයාලගෙන් සමාව ඉල්ලලා ඉන්නංකො.

මේ කතාව සිද්ද වුනේ අපේ කට්ටිය 10 වසරෙ ඉන්නකොට. පුරුපුරුයි, ඤාව්වයි මේ දවස් වල ගියා ඉංග්‍රීසි සාහිත්‍ය පංතියකට. පාට පාට ලස්සන පූස් නංගිල 20ක් විතර හිටියා මේ පංතියෙ. හැබැයි අද කියන්න යන්නෙ එයාල ගැනනම් නෙවෙයි, පංතියෙ හිටපු කොල්ලො කීප දෙනා එකතු වෙලා කරපු පිස්සු වැඩක් ගැන. දන්නවනෙ ඉතිං, ඔය කාලෙ පූසන්ට බියර් බෝතලයක් කියන්නෙත් මැජික් වගේනෙ. ඉතිං දවසක් මෙහෙම වැඩක් වුණා.

එක දවසක් ඤාව්වයි, මාළු කට්ටයි තවත් යාළුවෙකුයි විද්‍යාව පංති ඉවර වෙලා ඒ යාළුවගෙ ගෙදර ගිහින් තිබුණා. (මේ යාළුව වේයන්ගොඩ පැත්තෙ ඉස්කෝලෙකට ගිය හින්ද මෙයාට වේයන්ගොඩයා කියමුකො). මේ අපේ වේයන්ගොඩයගෙ ගෙදර උත්සවශ්‍රීයෙන් බැබලෙමින් තිබ්බ කාලයක්. ඉතිං උත්සවයක් වුණාම එක එක ජාතියෙ බඩු ම්ට්ටු ගෙදරට ගේනවනෙ නේද? මෙහෙම ගෙනාපු එක දෙයක් අපේ යාළුවන්ගෙ තියුණු ඇස් වලට පෙණුනා. සිංහ බැජ් ගහපු දුඹුරු පාට බෝතල් වගයක්. අපේ යාළුවන්ට ඉතිං රජ මගුල්ලු.

ඒ වුණාට ඔතන ඉදගෙන හොරෙන් බිව්වොත් කිසි ගතියක් නෑලුනෙ. (අපේ යාළුවන්ට බියර් බොන්ඩත් වඩා ඕනෙ වුණේ ඉතිං ලොකු එක දෙන්ඩ). ඉතිං ඤාව්වගෙ ටිකිරි මොළේට මරු අයිඩියා එකක් ආවා. ඤාව්වා යෝජනා කළා පහුවදා තිබුණු ඉංග්‍රීසි සාහිත්‍ය පංතියට බෝතලයක් අරන් ගිහිල්ලා කොල්ලො කට්ටිය බොමු කියල. ඒ වුණාට ප්‍රශ්නයක්! අපේ කට්ටිය ඉතිං ඔය ක්ෂේත්‍රයෙ පළපුරුදු ක්‍රීඩකයො නෙවෙයිනෙ. මෙයාලට බය හිතුන බැරි වෙලා හරි වැඩේ චාටර් උනොත් මොකද කරන්නෙ කියල. බියර් කියල කවුරු හරි දැනගන්නෙ බියර් බෝතලේ දැක්කොත්නෙ. ඉතිං වේයන්ගොඩයට උපදෙස් ලැබුණලු පහුවදාට බියර් ටික වෙන බෝතලේකට දාගෙන එන්න කියලා.

පහුවදා ඉතිං කට්ටිය පංති ආවා. ඔයවෙනකොට උදේම පංති ආපු මාළු කට්ටා කට්ටියටම සුබ ආරංචිය කියලා. කොහොම වුණත් ඔය වැඩේට රෙඩි වෙලා වෙඩි වගේ ඉදිරිපත් වුණේ කොල්ලො පස් දෙනයි. ඒ තමයි ඤාව්වා, මාළු කට්ටා, පුරු පුරු, වේයන්ගොඩයා සහ ගම්පහ පිරිමි ඉස්කෝලෙ රෙජී. ඉතිං නියමිත වෙලාවට තාත්තට හොරෙන් පන්නපු බෝතලේ බෑග් එකේ දාගෙන වේයන්ගොඩයා ආවලු. පංති පටන් ගත්තා. දැන් මැඩම් උගන්නන අතරෙ කට්ටිය නොඉවසිල්ලෙන් ඉන්නවලු පංතිය ඉවර වෙනකං.

ඔය අතරෙ වේයන්ගොඩයගෙ බෑග් එක ඩෙස් එක උඩ ඉඳං බිමට වැටුනා. බෝතලේ බිම වදින සද්දෙත් ඇහුනා. මැඩම් මොකද උනේ කියල සෝදිසි කළත් වාසනාවට අපේ යාළුවන්ව අහු වුණේ නෑලු. බෝතලේ බිදුනෙත් නෑලු. කොහොම කොහොම හරි ඉතිං පංතිය ඉවර වුණා. වෙනදට අන්තිමට පංතියෙන් යන සෙට් එක එදා මුලින්ම පංතියෙන් ගියාලු. ඊටපස්සෙ ටිකක් එහායින් තියන පාළු හරියක කට්ටිය සෙට් වුණාලු.

ඔන්න ඉතිං වේයන්ගොඩයා බෝතලේ එළියට ගත්තලු. මළ සේකරයි. කට්ටියම අඤ්ඤකොරොස් වෙලා ගියාලු. බැලින්නං අපේ මිත්‍රයා ගෙනත් තියෙන්නෙ ගල් අරක්කු බෝතලයක්!!!

ඤාව්වා - උඹට ගේන්න කිව්වෙ බියර් නේද??

වේයන්ගොඩයා - බියර් තමයි මචං ගෙනාවෙ!

ඤාව්වා - යකෝ! $%@$^$@!$%&^* උඹ ඔය අරක්කු බෝතලයක්නෙ ගෙනත් තියෙන්නෙ !$@$%*^&$. වෙරි උනොත් ගෙදර යන්නෙ කොහොමද??

වේයන්ගොඩයා - මේ බියර් තමයි තියෙන්නෙ බං. උඹල මට ඊයෙ කිව්වෙ වෙන බෝතලේකට දාගෙන එන්න කියලනෙ. මම ඉතිං වෙන බෝතලේකට දාගෙන ආව.


තව පොඩ්ඩෙන් වේයන්ගොඩයගෙ රත්තරං මොළේ හින්ද අපේ යාළුවො මැඩම්ට මාට්ටු වෙන්නෙ පංතියට බියර් ගෙනාව කියල නෙවෙයි, ගල් අරක්කු ගෙනාව කියල!

බියර් බීපු හැටි ඊළග ලිපියෙන් බලමුකො.......................

Saturday, April 10, 2010

BLOG ගඩොල් හැදුන හැටි

ඔන්න ඉතිං එකෝමත් එක කාලෙක ඈත ගමක ජීවත් වුණා යාළුවො කට්ටියක්. ඒ තමයි අපි. අපේ ජීවිත කාලෙ ඇතුලෙ වෙච්ච සිරා සිද්දි ටිකක් (ටිකක් කිව්වට ගොඩක්) ඔයාලට කියන්න තමයි මේ බ්ලොග් එක හැදුවෙ. BLOG ගඩොල් කිව්වට කාටවත් ගඩොල් පාරවත් දෙන්නනං අපේ idea 1ක් නෑ. මුලින්ම ඉතිං යාළුවො කට්ටිය අදුරගමුකො නේද? ඇත්ත නම් නං කියන්න බෑ ඉතිං, ඔයාලටත් තේරෙනවනෙ ඒක.

අපේ set එකේ මුලින්ම අදුන්නලා දෙන්නෙ 'උපාසක'. මෙයා තොරතුරු තාක්ෂණය පැත්තෙන් උසස් අධ්‍යාපනය හදාරනව. ගෑනු ළමයිගෙන් තමයි ටිකක් කරදරේ (එහෙම තමා හිතාගෙන ඉන්නෙ). බාහිර පෙනුම ගැන කියනවනම් උපාසක කියන්නෙ සුදු කෙට්ටු කොල්ලෙක්. මේ හැමෝම ගැන තව විස්තර ටිකෙන් ටික එළිය‍ට එයි.

ඊට පස්සෙ ඉන්නෙ 'ඤාව්වා'. මෙයානං ටිකක් විතර කලුයි. ඤාව්වා එක්ක දවසක් හිටියොත් අප්සට් කතා සීයක් විතර ඉබේම මතු වෙනව. මෙයත් තොරතුරු තාක්ෂණය පැත්තෙන් උසස් අධ්‍යාපනය හදාරනව. ලොකු ලොකු plan තමා ඤාව්වගෙ තියෙන්නෙ.

අන්තිමට ඉන්නෙ 'පුරුපුරු'. මෙයා ටිකක් විතර සුදු මහත කොල්ලෙක්. ජීව විද්‍යාව පැත්තෙන් ඉගෙන ගන්නෙ කොළඹ පැත්තෙ campus එකක. කාලයක් මෙයා හිතාගෙන හිටියෙ ආනෝල්ඩ් සුබසිංහ කියල. ඒ උනාට දැන්නං එහෙම නෑලු. කලින් කිව්ව වගේ තව විස්තර ටිකෙන් ටික එළිය‍ට එයි කාලයත් එක්ක.
උපාසකයි පුරුපුරුයි එකම ඉස්කෝලෙකට ගියෙ. ඤාව්වා ගියෙ ඊට එහා පැත්තෙ තිබුණ මහා නමක් තිබ්බ ඉස්කෝලෙකට. දැනට ඔය ඇති නේද? ඔයාලටත් boring වගේ. අප්සට් කතා ටික ඊළග ලිපියෙ ඉදන් පටන් ගමු.