බ්ලොග් ගඩොල් 150

බ්ලොග් ගඩොල් පටන් ගත්තේ මීට අවුරුදු දෙකයි මාස තුනකට කලින්. එදා ඉඳන් අද වෙනකම්ම පාඨක ඔයාලා බ්ලොග් ගඩොල් එක්ක රැඳිලා හිටියා. ඉතිං මුල්ම ස්තුතියි එදා මෙදා තුර මේ බ්ලොග් එකට ගොඩ වැදිච්ච හැම දෙනාටම.

දෙවෙනි ස්තුතිය මට මේ බ්ලොග් එක කරගෙන යන්න උදව් කරන අපේ උපාසක සහ ඤාව්වාට.

තුන්වෙනි ස්තුතිය බ්ලොග් එක පටන් ගන්න පිටිවහලක් වෙච්ච ටැබූ, කතන්දර, හා පැටික්කිට.

ඊළඟ ස්තුතිය හැමදාමත් බ්ලොග් ගඩොල් පෝස්ට් වලට කොමෙන්ට් දාන අපේ ආදරණීය මිතුරු කැලට.

*************************************************************************

ඔන්න ඉතිං මම ස්තුති කතා වලින් පස්සේ ප්‍රධාන වැඩේට එනවා. ඇත්තටම බ්ලොග් ගඩොල් සාර්ථකද? බ්ලොග් ගඩොල් වලින් සිංහල බ්ලොග් අවකාශයට දැනෙන යමක් වෙලා තියෙනවද? 

බ්ලොග් ගඩොල් සාර්ථකද නැද්ද කියන එක තීරණය කරන්න ඕනෙ පාඨක ඔයාලා මිසක් මම නෙවෙයි. කොහොම වුණත් ගඩොල් බ්ලොග් එකට පෝස්ට් 150ක් පිරෙන මේ මොහොතේ පොඩි ඇනලයිස් පාරක් දැම්මොත් හොඳයි කියලා මට හිතුනා. ජ්‍යාමිතික සූත්‍රයක් ආශ්‍රයෙන් තමයි මේ ගණනය කිරීම් කළේ ඔන්න.

සම්පූර්ණ පෝස්ට් - 149

මාසයකට පෝස්ට් සාමාන්‍යය - 5.52

සම්පූර්න හිට්ස්   -   211800

පෝස්ට් එකකට හිට්ස් සාමාන්‍යය  -  1421.5

ෆලෝවර්ස්ලා  -  462

මුල් මාස 17 පෝස්ට් - 128

මාසයකට පෝස්ට් සාමාන්‍යය - 7.52 

අවසාන මාස 10 පෝස්ට් - 21

මාසයකට පෝස්ට් සාමාන්‍යය - 2.1

ඉතිං මේ ස්ටැට් ටික බැලුවාම පේනවා ඉස්සර මාසෙකට සතියකට ලිපි දෙකකට කිට්ටු වෙන්න ලියපු මනුස්පයා පස්සෙ කාලෙක ලියලා තියෙන්නේ සති දෙකකටම එක ලිපියයි කියලා. විශේෂයෙන් මෑතක ඉඳලා සිංහල බ්ලොග්කරණය ගැන මට නිතර අප්ඩේට් වෙන්නේ නෑ. සමහර අලුත් බ්ලොග්කරුවන්ව මම දන්නෙත් නෑ. සමහර අලුත් බ්ලොග්කරුවෝ මාව දන්නෙත් නෑ. ඉතිං හොඳට ලිය ලියා හිටපු පුරුපුරුට ළඟදි ඉඳලා මොකද වුණේ?

ඇත්තටම පහුගිය අවුරුද්දක කාලය තමයි මගේ ජීවිතයේ ගෙවුණ කාර්යබහුලම කාල පරිච්ඡේදය.

විශ්ව විද්‍යාල අවසන් වසර පර්යේෂණ ව්‍යාපෘතිය

එහි නිබන්ධනය සැකසීම

විශ්ව විද්‍යාල අවසන් විභාගය

උපාධිධාරී වාර්තා විභාගය (GRE) 

විදේශීය භාෂාවක් ලෙස ඉංග්‍රීසි විභාගය (TOEFL)

උසස් අධ්‍යාපන ශිෂ්‍යත්ව සඳහා අයැදුම් කිරීම

විවාහය ලියාපදිංචි කිරීම

විවාහ උත්සවය

ඔන්න ඔය වැඩ වලට තමයි මගේ කාලය බොහෝදුරට වැය කරන්න සිද්ද වුණේ. ඉතිං මේ වැඩ කන්දරාවත් එක්ක බ්ලොග් එක ලියන එක කිසිසේත්ම ලේසි පාසු වැඩක් වුණේ නෑ. කොහොමහරි ඉඩ ලැබිච්ච වෙලාවක අමාරුවෙන් තමයි පෝස්ට් එකක් දෙකක් හරි ලියාගත්තේ. බ්ලොග් කියවන එකත් ඉස්සර තරම් හොඳට කරන්න බැරිවුණා. අනාගතයෙත් ආපහු ඉස්සර තරම්ම ලියන්න බැරිවෙයි. ඒත් දැනට වඩා ලියන්න මම උපරිම උත්සාහය යොදනවා.

ඒ වගේම විවාහය වෙනුවෙන් සුභපැතුව යාලුවො ඔක්කෝටම ගොඩක් ස්තුතියි. එදා උදේම උපාසකයි, ඤාව්වායි, මී කතුරායි මාව කාමරෙන් එළියට දාලා කොම්පියුටරේ මොනවද කොටන්න පටන් ගත්තා. ලිව්වේ මොනවද කියලා බලන්න දුන්නෙත් නෑ. දවස් ගානකට පස්සේ තමයි ඉතිං දැක්කේ මොනවද ලියලා තියෙන්නෙ කියලා. බැලින්නං මුන් කට්ටිය විවාහ සුබ පැතුමක් දාලා.

ඉතිං නැවත වතාවක් හැම දෙනාටම ස්තුතියි. ඊළඟට ලියන්නේ සුදුපූසි සිසන් 2 සීරීස් එක. දැන් ඉතිං එහෙම නැතුව බෑ නොවැ! හැබැයි ඊට කලින් මාලුකට්ටා සහ චාටර්මාලි සීරීස් එකේ අන්තිම ලිපිය ලියලා ඉන්න ඕනෙ. මොකද කීප දෙනෙක්ම අහලා තිබුනා ඒ සීරීස් එක ඉවර කරන්නේ නැත්තෙ ඇයි කියලා.

එහෙනං මාලුකට්ටා සහ චාටර්මාලි අවසන් ලිපියෙන් හම්බවෙනකං මම නවතින්නං.

ප.ලි - පින්තූරයට යොදාගත්තේ අරවින්ද 2003 වර්ල්ඩ් කප් සෙමි ෆයිනල් එකේදි රනවුට් වුණාට පස්සේ ඇවිදගෙන යන සීන් එක. මොකද සියවෙනි ලිපිය ලියද්දී පීක් එකේ තිබ්බ මගේ බ්ලොග්කරණය 150 ලියද්දී සෑහෙන දුරට පල්ලම් බැහැලා වගෙයි මට හිතෙන්නේ.