අඹ යාලුවෝ

Saturday, August 28, 2010

දිලූශා සහ හංසිනී 3 - අසන්න පෙර සිතා බලනු


ඔන්න යාලුවනේ අපි ඔයාලා බලාපොරොත්තුවෙන් හිටපු දිලූශා සහ හංසිනී සීරීස් එකේ 3 වෙනි කොටසත් ගෙනාවා.මේ සීරීස් එකේ කලින් කොටස් බලලා නැති යාලු‍වන්ට පහළ ලින්ක් වලින් ගිහින් බලන්න පුලුවන්.

දිලූශා සහ හංසිනී 1
දිලූශා සහ හංසිනී 2

දැන් ඉතිං මේ වෙද්දි අපේ මාලුකට්ටා බොහොම සතුටින්ලු හිටියෙ.ඒ වගේම මීට කලින් කවදාවත් ගෑනු ළමයෙක්ගෙන් යාලු වෙන්න අහල තිබුනෙ නැති නිසා මෑන්ස්ගෙ හිතේ පොඩි චකිතයකුත් තිබුනෙ නැතුවාම නෙවෙයි.ඒ වුණාට මාලුකට්ටාට බයවෙන්න දෙයක් තිබුනෙ නෑ.මොකද දැනටමත් වැඩේ ෂුවර් වගේ තමයි.පූසන්ගෙ අදහසට අනුව මාලුකට්ටා යාලුවෙන්න අහපු ගමන් දිලූශා "හා" කියන තත්ත්වයක් තමයි තිබුනෙ.

අපේ පූසා ඉතිං හොස්ටල් එකේ ඉන්න ගමන් ප්ලෑන් කරන්නෙ යාලුවෙන්න අහන හැටි නෙවෙයි.යාලු වුණාට පස්සෙ දිලූශාට කතාකරන්නෙ කොහොමද කියලා.මාලුකට්ටගෙ අයිඩියා එක තිබුනෙ යාලු වුණාට පස්සෙ දිලූශාට "දීශා" කියල කතාකරන්න.හැබැයි පුරුපුරුනං ඔය වැඩේට එච්චර කැමති වුණේ නෑ.බැරිවෙලා හරි ඔය ස්ටයිල් එකටම දිලූශා මාලුකට්ටගෙ නම "මාකට්" කියල වෙනස් කළොත් එහෙම?

කොහොමහරි ඉතිං කාලෙ ගෙවිල ගිහිං සෙනසුරාදා දවසත් උදා වුණාලු.මාලුකට්ටාට උපදෙස් ලැබිලා තිබුනෙ උදේ පාන්දර ඇවිත් ක්ලාස් එකට එන පාරෙ රැකගෙන ඉදලා, දිලූශා ක්ලාස් එනකොට එයාගෙන් අහන්නයි කියලා.මොකද දිලූශයි හංසිනීයි වෙන් වෙන් වශයෙන් දැකගන්න පුලුවන් උදේ ක්ලාස් එද්දි විතරයි.ඒකත් දෙන්නගෙ ගෙවල් පැති දෙකක තිබුන නිසා ඇතිවෙච්ච ප්‍රතිඵලයක්.

ඔය ක්ලාස් එක තිබුනෙ පුරුපුරුලගෙ ගෙවල් ළගමයි.ඉතිං පුරුපුරුත් උදේම ක්ලාස් ඇවිල්ලා මාලුකට්ටා සුභ ආරංචිය ගේනකං බලාගෙන හිටියලු.ඒත් ටිකවෙලාවක් ගතවුණත් මෑන්ස් එන පාටක් පේන්න තිබුනෙ නෑ.ඔය අතරෙ උපාසක, ඤාව්වා, වේයන්ගොඩයා ඇතුලු පන්තියෙ අනිත් ළමයි එක්කොම ආවා.ටික වෙලාවකින් හංසිනීත් පන්ති ආවලු.ඊට පස්සෙ මැඩම් ඇවිත් පන්තියත් පටන් ගත්තලු.දැන් පන්තියෙ නැත්තෙ දිලූශයි, මාලුකට්ටයි විතරයි.

මුන් දෙන්නා ගොඩගිහින් ඇවිදින්නවත් ගියාද?

අපේ පූසො එහොම කල්පනා කර කර ඉන්න අතරෙ තමයි ටික වෙලාවකින් මූණ රතු කරගත්තු දිලූශා පන්තියට ආවෙ.ආපු ගමන් මැඩම්ට එක්ස්කියුස් කරලා වාඩි වුණා වුණාමයි, ගෑනි නෙවෙයි ආපහු ඔලුව උස්සලා වටපිටවත් බැලුවෙ.දැන් පූසන්ට මාර ප්‍රශ්නෙ.කෝ මේ මාලුකට්ටා?

ඔන්න එතකොටම තමයි ප්‍රශ්නෙට විසදුම හම්බවුණේ. මෙන්න බොලේ ඇවිදින මළමිනියක් වගේ මේකා හිමින් හිමින් පන්තිය දිහාවට ඇදෙනවා.මූණත් කලුවෙලා, ඒ මදිවට කොන්ඩෙත් හොදටම අවුල් කරගෙන.අර වතුර හිදිච්ච විලේ හිටපු කොස්වාලිහිණියා වගේ.පොර ඉතිං මැඩම්ට එක්ස්කියුස් කරන්නෙත් නැතුව ඇවිල්ලා පිටිපස්සෙම බංකුවෙ වාඩිවුණාලු.මේ වෙද්දිත් අනිත් පූසන්ට තේරුම් ගිහින් තිබුනෙ කොහෙහරි, මොකක්හරි ලොකු වැරැද්දක් වෙලා තියෙනවා කියලා.ඒ මදිවට මාලුකට්ටා කා එක්කවත් කතා කරන්නෙත් නෑ.

ඉතිං ක්ලාස් එක ඉවරවෙලා, පොරව හොදටම සන්සුන් කරලා තමයි උදේ වෙච්ච දේ අහගන්න අපේ යාලුවන්ට පුලුවන් වුණේ.බැලින්නං වෙලා තියෙන්නෙ මේකයි.

මාලුකට්ටා උදේම ඇවිත්, අර කියපු විදිහට මග රැකගෙන ඉදලා තියනවා.ඔන්න ඉතිං ටික වෙලාවකින් දිලූශාත් උදේ පාන්දර පිපිච්ච මලක් වගේ පාරෙ එනවලු.මේක දැකපු මාලුකට්ටා ඉස්සරහට ගිහින් දිලූශාත් එක්ක කතා කෙරුවලු.

මාලුකට්ටා :- ගුඩ් මෝර්නිං දිලූශා

දිලූශා :- ගුඩ් මෝර්නිං මාලු, ඇයි අද ක්ලාස් එකට ‍යන්නෙ නැද්ද මගට වෙලා ඉන්නෙ?

මාලුකට්ටා :- යනවා යනවා, ඒත් මම මේ ඔයා එනකං මගට වෙලා හිටියෙ...

දිලූශා :- මම එනකං? හික්ස්...ඒ මොකටද?

මාලුකට්ටා :- දිලූ, මට ඔයත් එක්ක වැදගත් දෙයක් කතා කරන්න තියනවා.

දිලූශා :- (මාලුකට්ටා මෙච්චරකල් කිසිම වැදගත් දෙයක් කතා කරල නැති හින්දා වික්ෂිප්ත වී)
ඒ මොකද්ද?

මාලුකට්ටා :- මම ඔයාට ගොඩක් කැමතියි...මට ඔයාව මගෙ ගර්ල් ෆ්‍රෙන්ඩ් කරගන්න ඕනෙ...

ඉතිං මේක ඇහුනා විතරයි, හොදට හිටපු දිලූශා එකපාරටම වෙනස් වුණාලු

දිලූශා :- මාලුකට්ටා, මම කවදාවත් ඔයා ගැන ඒ විදිහට හිතුවෙ නෑ.ඔයා මං ගැන එහෙම හිතයි කියලා අපි හිතුවෙත් නෑ.ඔයා මගෙ යාලුවෙක් විතරයි.එතනිං එහාට අපි අතරෙ කිසිම සම්බන්ධයක් නෑ.මම ඔයාට පොඩ්ඩක්වත් කැමති නෑ...

දිලූශා මෙහෙම පටන් අරං විනාඩි දහයක් විතර මාලුකට්ටාට ෆුල් ලෙක්චර් එකක් දුන්නලු.මෑන්ස් නිකං කරකවලා අතඇරියා වගේ.ඉතිං ඔය අප්සට් එකෙන් තමයි පොර වැනි වැනී ක්ලාස් එකට ඇවිත් තියෙන්නෙ.දැන් අනිත් පූසන්ටත් හිතාගන්න බැහැ මාලුත් එක්ක මෙච්චර ෆිට් එකේ හිටපු දිලූශා ඇයි මේ විදිහට මෑන්ස්ට කතා කළේ කියලා.ඒ ප්‍රශ්නෙට උත්තරයක් හම්බවුණේ ඊට පස්සෙ සතියෙලු.

ඊට පස්සෙ සතියෙ ක්ලාස් ඉවරවෙලා යනකොට තමයි අපේ පූසො සෙට් එක විශේෂ දර්ශනයක් දැක්කෙ.ඒ තමයි ක්ලාස් ඉවරවෙලා තනියම ගෙදර යන දිලූශා.වෙනදටනං දිලූශයි හංසිනීයි එකටම තමයි මග දුරක් යනකං යන්නෙ.ඉතිං මේකනං හොයලා බලන්නම වටින නිව්ස් එකක්.ඒක හින්දා අපේ රහස් පරීක්ෂකයො දෙන්නා මේ ගැන විශේෂ විමර්ශනයක් පැවැත්තුවලු.බැලින්නං හංසිනී තවම ක්ලාස් එක ළගලු.

මාලුකට්ටා තීරණය කළාලු හංසිනීව මුණගැහිලා දිලූශාගෙ හදිසි වෙනසටයි, මෑන්ස්ට "බෑ" කිව්ව එකටයි හේතු අහගන්න.ඉතිං අපේ පූසො ආපහු හැරිලා ක්ලාස් එක ළගට ගියාලු.මෙන්න බොලේ හංසිනී ඉන්නවා මූණත් දෙක කරගෙන.ඉතිං අනිත් පූසො පැත්තක ඉදිද්දි මාලුකට්ටා තනියම හංසිනී එක්ක කතා කරන්න ගියාලු.හැබැයි ටික වෙලාවකින් මාලුකට්ටා ආපහු ආවෙ, කලින් සතියෙ ආවටත් වඩා කොස්වාලිහිණි පාට් එකක් දාගෙන.

විනාඩි ගානක් ගිහින් මෑන්ස්ව යථා තත්ත්වෙට ගත්තට පස්සෙ තමයි කට්ටියට සීන් එකේ අග මුල තේරුම් ගියෙ.මාලු හංසිනී එක්ක කතා කරද්දි වෙලා තියන්න මෙහෙමෙ සිද්දියක්

මාලුකට්ටා :-ඇයි හංසිනී, අද මොකද දිලූශා තනියම ගෙදර යන්නෙ?

හංසිනී :- මම දන්නෙ නෑ

මාලුකට්ටා :- එයා මාත් එක්ක තරහද?

හංසිනී :- (ඕනෑවට එපාවට) මම දන්නෙ කොහොමද?

මාලුකට්ටා :- (වැ‍ලපෙමින්) ඇයි දෙයියනේ එයා මාත් එක්ක යාලුවෙන්න බැහැයි කිව්වෙ?

හංසිනී :- අපි දෙන්නා හිතුවෙ ඔයා මගෙන් යාලුවෙන්න අහයි කියලා...

මේ කතාව ඇහුවා විතරයි මාලුකට්ටා එතනම ඌර්ධවපාතනය වෙලා ගියාලු.දැන් ඉතිං මොනවා කරන්නද? කලිසමක් ඇදගෙන ගිහිං ආපහු හංසිනීගෙන් යාලුවෙන්න අහන්න පුලුවන්යැ! දැන් පොරගෙ දුක ඩබල් වෙලා.මොකද දැන් මෑන්ස්ට කෙල්ලො දෙන්නම නැහැනෙ.ඒපාර තමයි මාලුකට්ටා අර කොස්වාලිහිණි පාට් එකෙන් ඇවිල්ලා තියෙන්නෙ.

කොහොම හරි අන්තිමට වුණේ සති ගානක් යනකං ඤාව්වගෙ අහිංසක මෑණියන්ට කිඹුහුම් ගිය එක විතරවි.මොකද ඤාව්වනෙ කිව්වෙ දිලූශා වැඩිය සුදු නිසා එයාගෙන් යාලුවෙන්න අහන්නයි කියලා.

ඒ වගේම ඊට පස්සෙ මාලුකට්ටත් ආපහු දිලූශායි හංසිනීයි එක්ක වැඩි ආස්සරේට ගියෙ නෑ.....

***********************************************************************************

ප.ලි - අපි මේ සීරීස් එක කොටස් හතරකට ලියන්න හිටියට, පස්සෙ තීරණය වුණේ හතරවෙනි කතාව වෙනම කතාවක් විදිහට ලියන්න.ඔන්න ඉතිං කොහොම හරි මැච් එක පටන් ගන්න කලින් කතාව ලිව්වා.හික්ස්...පූසො කවදාවත් පොරොන්දු කඩ කරන්නෙ නෑ නොවැ!


දැන් දිලූශානං මොනවා කරනවද දන්නෙ නෑ. හංසිනීනං ඉන්නෙ මෙඩිකල් ෆැකල්ටි එකේ...

දිලූශා සහ හංසිනී 2 - ශ්‍රීමත් අගුලු භවාන්



අම්මෝ! කට්ටියට ටිකක් ෆ්ලවර් ජම්ප් වෙලාද මන්දා? හොදයි හොදයි, එහෙනං යාලුවනේ අපි මෙගා නාට්‍ය ස්ටයිල් එකට නැතුව ඉතුරු කතා දාන්නං! ඊට කලින් දිලූශා සහ හංසිනී 1 කොටස බලපු නැති යාලුවො ගිහින් බලලා එන්නකො.

අපි කතාව නැවැත්තුවෙ දිලූශා ටීන්බුක් එක ආපහු මාලුකට්ටාට දුන්න තැනින්නෙ.දැන් ඉතිං පූසො කට්ටියට මාර කුතුහලේ මේ දෙන්නා මොනවද ලි
යල තියෙන්නෙ කියලා.ඉතිං කට්ටිය වහාම පොත දිගඇරලා බැලුවලු.බැලින්නං කිසිම අප්සට් එකක් නෑ.මුතුවන් අකුරු වලින් ලස්සනට ලියලා තිබුනලු.ප්‍රශ්න ඔක්කොටම නියමෙට උත්තර දීලා.දැන්නං ඉතිං මාලුකට්ටගෙ මූණත් මුතුඇටයක් වගේ බබලනවලු.වැඩේ ගොඩ වගේ තමයි.ඉතිං එදා ඉදලා දිලූශයි සහ හංසිනීයි පූසො එක්ක, විශේෂයෙන් මාලුකට්ටා එක්ක ගොඩක් ෆිට් වුණාලු.ඒ කියන්නෙ පළවෙනි මිෂන් එක සාර්ථකයි.

මාලුකට්ටගෙ ලක්ෂණයක් තමයි කෙල්ලෙක් එක්ක ෆිට් වුණාට පස්සෙ මේ ලෝකෙ සිහියක් නෑ.වෙන මොනවත් මතකත් නෑ.මෑන්ස්ව අල්ලන්න වෙ
න්නෙ දැල් දාලා තමයි.ඉතිං මෙතනදිත් වුණේ ඒකයි.දැන් මාලුකට්ටා ක්ලාස් යන්නෙ දිලූශයි සහ හංසිනීයි එක්ක.ඒ වගේම ක්ලාස් ඉවරවෙලා ගෙදර යන්නෙත් දිලූශයි සහ හංසිනීයි එක්කලු.ඉතිං අනිත් පූසො හිතුවෙ ඒ වෙනකොට මාලුකට්ටා දෙන්නගෙන් කාවහරි තෝරගෙන ඇති කියලා.ඒත් වෙලා තිබුනෙ වෙන දෙයක්.

මාලුකට්ටා හිතාගෙන හිටියෙ ගෑනු ළමයි දෙන්නත් එක්කම ෆිට් වෙලා, වැඩියෙන් ෆිට් වුණ එක්කෙනාව යාලු කරගන්නනෙ.මේ වෙද්දි දිලූශයි සහ හංසිනීයි දෙන්නම මෑන්ස් එක්ක අම්බානට ෆිට් වෙලා.කොටින්ම දැන් මේ දෙන්නට මාලුකට්ටා නැතුව දවසක්වත් ඉන්න බැහැයිලු.හැබැයි වැඩේ කියන්නෙ දෙන්නම මෑන්ස් එක්ක එකම ගානට ෆි
ට්.දෙන්නගෙන් කවුරුත් අනික් එක්කෙනාට වැඩි යාලුකමක් මාලුකට්ටා එක්ක නෑ.ඉතිං අපේ පූසා වැටිලා හිටියෙ ලෝක අමාරුවක.දැන් කාවද යාලුවෙන්න තෝරගන්නෙ?

මේ වෙලාවෙ අපේ පුසො සෙට් එක තීරණය කළේ මාලුකට්ටා දෙන්නගෙන් කාවහරි තෝරගන්න ඕනෙ කියලා.මොකද දෙන්නගෙන් කවුරුහරි මාලුකට්ටත් එක්ක වැඩියෙන් යාලු වෙනකං හිටියනං මෑන්ස්ට කවදාවත් ඔය වැඩේ කරගන්න වෙන්නෙ නෑ.ඉතිං දැන් ප්‍රශ්නෙ තමයි වැඩිපුර සුදුසු කෙනා කවුද කියලා තීරණය කරන එක.මේ තීරණය ගන්නනං දෙන්නා ගැනම විස්තර හොදට හොයන්න ඕනෙ කියලා අපේ පූසො තීරණය කළාලු.

ඉතිං කට්ටියගෙ ඒකමතික අදහස වුණේ ඩිටෙක්ටිව් මිෂන් එකක් දෙන්න ඕනෙ කියලා.මොකද ඔය දවස්වල ශ්‍රීමත් අගුලු භවාන් මහත්තයගෙ රහස් පරීක්ෂක කතා කියවන්න ලොකු උන්මාදයක් කට්ටිය අතරෙ තිබුනනෙ.ඉතිං ඩිටෙක්ටිව් ගේම් වලට කවුරුත් කැමතියි.


මේ ගේම් එකේදි අගුලු භවාන් විදිහට ක්‍රියා කළේ පුරුපුරු.මෑන්ස්ගෙ සහායක
දොස්තර කුමනපුත්‍ර විදිහට ක්‍රියාකළේ අපේ උපාසක.ඉතිං අපේ ඩිටෙක්ටිව් ජෝඩුව ෆුල්ටයිම් වැඩේට බැස්සලු.මේ ගේම් එකට වේයන්ගොඩයගෙනුත් ලැබුනෙ ලොකු හෙල්ප් එකක්.ඇයි දිලූශයි සහ හංසිනීයි ගියෙත් මෑන්ස් ගිය ඉස්කෝලෙටම නොවැ!

මුලින්ම අපේ රහස් පරීක්ෂකයො හෙව්වෙ දෙන්නගෙ ෆැමිලි බැක්ග්‍රවුන්ඩ් කොහොමද කියලා.බලනකොට දෙන්නගෙම ෆැමිලි බැක්ග්‍රවුන්ඩ් එක වගේ.ඉතිං ඒ වැඩේ අත්ඇරලා දාන්න අපේ පූසන්ට සිද්ද වුනාලු.ඔය විදිහට දවස් ගානක් මහන්සි වුණත් පරීක්ෂණ කටයුතු වල කිසිම ප්‍රෝග්‍රස් එකක් පෙන්නුම් කළේ නෑ.මොකද හැම අතින්ම දෙන්නා එක සමානයි.

දෙන්නටම හිටියෙ අයියලා එක්කෙනා ගානෙ.( ඉන්න අයියලා ගාන අඩුවීම පොසිටිව් ලක්ෂණයක්.මොකද කන්නවෙන ගුටි ප්‍රමාණය අඩු වෙනවා නොවැ! ) ඒ වගේම දෙන්නගෙම අධ්‍යාපන හැකියාවත් එක වගේ.මාරුවෙන් මාරුවට පන්තියේ පළවෙනියයි දෙවෙනියයි මේ දෙන්නලු.ගතිගුණ අතින් බැලුවමත් දිලූශයි සහ හංසිනීයි එක වගේ.දෙන්නම ඉස්කෝලෙ ප්‍රසිද්ද වෙලා හිටියෙ ටිකක් ආඩම්බරකාරියො විදිහට.දෙන්නගෙම කොන්ඩෙත් දිගයි.දෙන්නම ඇන්දෙත් ගවුම්, සායවල් විතරයි. කලිසම් ඇන්දෙ නෑ.

දැන් ඉතිං ශ්‍රීමත් අගුලු භවානුයි, දොස්තර කුමනපුත්‍රයි ලෝක අමාරුවක වැටිලා ඉන්නෙ.ඒ වයසෙදි ඉතිං ගෑනු ළමයින්ගෙ වත් පොහොසත්කම්, දෑවැදි වගේ දේවල් හොයන්නෙ නෑ නොවැ!ඔය උඩින් කිව්ව ලක්ෂණ ගැන තමයි හොයන්නෙ. මොනවා කරන්නද ඉතිං? අපේ ඩිටෙක්ටිව් පූසො දෙන්නා තීරණය කළාලු මිෂන් එක අතඇරලා දාන්න.

දැන් ඉතිං මාලුකට්ටා විතරක් නෙවෙයි හැමෝම මේ ප්‍රශ්නෙ හින්දා අඤ්ඤකොරොස් වෙලා ඉන්නෙ.ඔය අතරෙ තමයි ඤාව්වා අපූරු යෝජනාවක් ගෙනාවෙ.අපි කලින් ලිපියෙ කිව්ව වගේ දිලූශාගෙයි හංසිනීගෙයි තිබුන එකම වෙනස ඒ දෙන්නගෙ පාටනෙ.ඒ කිව්වෙ දිලූශා හංසිනීට වඩා සුදුයි.(හැබැයි දෙන්නම එක වගේ ලස්සනයි) ඉතිං ඤාව්වගෙ අයිඩියා එක වුණේ දිලූශා සුදු හින්දා මාලුකට්ටා යාලුවෙන්න ඕනෙ එයත් එක්කයි කියලා.බැලූ බැල්මට මෝඩ අයිඩියා එකක් වගේ පෙනුනට, දවස් ගානක් කල්පනා කරලා එපා වෙලා හිටපු මාලුකට්ටා මේ අදහසට එකපයින්ම කැමති වුණාලු.

ඉතිං අන්තිම තීරණය වුණේ ඊළග සතියෙ ලිට් ක්ලාස් එකේදි මාලුකට්ටා දිලූශාගෙන් යාලුවෙන්න අහන්න ඕනෙයි කියලා.දැන් ඉතිං ප්‍රශ්නෙ ඉවරයි.මොකද මේ වෙද්දි ගෑනු ළමයි දෙන්නම හිටියෙ මාලුකට්ටා කියන ඕනම දෙයක් පටස් ගාලා කරන මට්ටමේ.ශ්‍රීමත් අගුලු භවාන් පුරුපුරු, දොස්තර කුමනපුත්‍ර උපාසක සහ ඤාව්වා ඒ සතියෙදි කළේ, ඊට පස්සෙ සතියෙ ලැබෙන්න නියමිත පාටියට සූදානම් වෙන එකලු.

************************************************************************************

දැන් ඉතිං කට්ටිය බනින්න එපා පූසො කියන්නෙ වර්ණභේදවාදියො කියලා. නෙල්සන් මැන්ඩෙලා ලොක්කා නැත්තං පූසන්ව හොයාගෙන ලංකාවට එයි.

ඔන්න අද කතාව, කලින් කතාව තරම් කුතුහලයකින් ඉවර වෙන්නෙ නෑ නේද? කොහොමත් ඊළග කතාවට වෙනම පෝස්ට් එකක් ඕන කරනවා.ඒ වගේම මේ සීරීස් එකත් කොටස් හතරක එකතුවක්.එහෙනං මාලුකට්ටා දිලූශාගෙන් අහපු හැටි ඊළග කොටසින් බලමු නේද යාලුවනේ!

ඊළග කොටස හෙට උදේ පාන්දරම දානවා

දිලූශා සහ හංසිනී - ටීන් බුක් එක


ඔන්න යාලුවනේ අද ඉඳලා අපි කියන්න යන්නෙ අපේ මාලුකට්ටා ප්‍රධාන චරිතය රඟපාන රසවත් සීරීස් එකක් ගැන.ඉතින් ඉස්සෙල්ලාම අපි කතාවේ බැක්ග්‍රවුන්ඩ් එක අහලා ඉමුකො නේද? මේ කතාවේ ප්‍රධාන චරිත දෙක තමයි දිලූශා සහ හංසිනී කියන්නෙ.මේ දෙන්නා හොඳම යාලුවොලු.ඒ වගේම දෙන්නම ඉස්කොලෙ ගියෙ අපේ වේයන්ගොඩයා ගිය වේයන්ගොඩ ඉස්කෝලෙට.(මේ ඉස්කෝලෙ මිශ්‍ර පාසලක්) ඉතින් දිලූශයි හංසිනියි මොනවා කලත්, කොහෙ ගියත්, ඒ හැමදෙම කලේ එකටමලු.කොටින්ම මේ දෙන්නා තනි තනියෙන් දැක බලාගන්න එක හරිම අමාරු වැඩක්.

දිලූශා කියන්නෙ ගොඩක් සුදු ගෑනු ළමයෙක්.හංසිනී කියන්නෙ ටිකක් තළෙලු ගෑනු ළමයෙක්.ඒත් මේ දෙන්නම එක වගේ ලස්සනයිලු.දැන් ඉතින් අපේ යාලුවො බලනවා ඇති පූසන්ගෙයි මේ ගෑණු ළමයින්ගෙයි තියෙන කනෙක්ෂන් එක මොකද්ද කියලා.ඕක ඇතිවුනේ මෙහෙමයි.

අපේ යාලුවන්ට මතක ඇතිනෙ අර පූසො බියර් බීපු ඉන්ග්ලිශ් ලිට් ක්ලාස් එක.අපි කිව්වනෙ ඔය ක්ලාස් එකෙ ලස්සන ලස්සන ගෑනු ළමයි විස්සක් විතර හිටියයි කියලා.ඒ අතරෙ හිටපු ලස්සනම ගෑනු ළමයි දෙන්නෙක් තමයි මේ දිලූශයි හංසිනියි.ඉතින් අපේ මාලුකට්ටගෙ මීටරේට මේ දෙන්නව අහු වෙන්න වැඩි කාලයක් ගියෙ නෑලු.

දැන් මාලුකට්ටට ප්‍රශ්න ගොඩයි.එක ප්‍රශ්නයක් තමයි මේ දෙන්නත් එක්ක කතා කරන එක.අනිත් ප්‍රශ්නෙ තමයි මේ දෙන්නගෙන් කෙනෙක්ව යාලු කරගන්න එක.හැබැයි මේ ඔක්කොටම වඩා මෑන්ස්ට තිබුන ලොකුම ප්‍රශ්නෙ තමයි, යාලුවෙන්න මේ ගෑනු ළමයි දෙන්නගෙන් එක්කෙනෙක්ව තෝරගන්න එක.මොකද දවස් ගානක් කල්පනා කළත් අපේ යාලුවට තීරණය කරන්න බැරිවුණාලු කාවද යාලුකරගන්න වැඩිය සුදුසු කියලා.

මාලුකට්ටගෙ හිතේනං දෙන්නම යාලු කරගන්නත් පොඩි කැමැත්තක් තිබුනා.ඒත් ඉතිං එහෙම කරන්න බෑ නොවැ! දැන් ඉතිං මේක මෑන්ස්ට බොන්න ඕනෙ මට්ටමේ ප්‍රශ්නයක්ලු.කොච්චර කල්පනා කළත් හැම ලක්ෂණයකින්ම මේ ගෑනු ළමයි දෙන්නා සමානයි.එකම වෙනස හමේ පාට විතරයි.ඉතිං ඔහොම දවස් ගානක් කල්පනා කරපු මාලුකට්ටා අන්තිමට තීරණය කළාලු එක ගෑනු ළමයෙක් තෝරගන්න අදහස අත්ඇරලා දෙන්නත් එක්කම ෆිට් වෙන්න. එතකොට ඉතිං ඊටපස්සෙ දෙන්නගෙන් මෑන්ස්ට කැමති ගෑනු ළමයෙක් එක්ක යාලුවෙන්න බැරියැ!

ඉතිං ඔහොම ටික ටික කාලෙ යනකොට පන්තියෙදි දැක්කම යන්තම් හිනාවෙන්න, මගදි දැක්කම වචනයක් දෙකක් කතාකරන්න, වගේ මට්ටමට මේ දෙන්නත් එක්ක ෆිට් වෙන්න මාලුකට්ටට පුලුවන් වුණාලු.ඒත් දැන් මෑන්ස් ඇතුලු අපේ පූසො සෙට් එකගෙ හිතට ඔය මට්ටම හොදටම මදි. මේ වේගෙන් ගියොත්නං ඉතිං අවුරුදු හැටක් හැත්තෑවක් ගිහිං තමයි ගෑනු ළමයින්ගෙන් යාලු වෙන්න අහන්න වෙන්නෙ.ඉතිං කට්ටිය ප්ලෑන් කරලා තීරණය කළාලු වහාම දිලූශයි හංසිනියි එක්ක මාලුකට්ටාව ෆිට් කරවන්න ඕනෙ කියලා.

අපේ යාලුවන්ට මතක ඇතිනෙ ඔය කාලෙ හැම "ටීන්" කෙනෙක්ටම තියනවනෙ "ටීන් බුක්" කියලා පොතක්.ඒ කියන්නෙ ඔය සමරු පොත කියන සංකල්පෙම ටිකක් දුර දිග ගිය අවස්ථාවක්.ඔය පොතේ මුලින්ම ප්‍රශ්න 50ක් විතර අහලා තියෙනවා.ඉතිං ඕක කාටහරි යාලුවෙකුට දුන්නම එයා ඒ හැම ප්‍රශ්නෙටම උත්තර දීලා, ඊට පස්සෙ තව මොකක් හරි විශේෂ සමරු සටහනකුත් ලියලා ආපහු බාරදෙන්න ඕනෙ.හැබැයි දැන්නං ඕවා තියනවද දන්නෙත් නෑ.ෆේස්බුක් තියෙන රටේ ටීන්බුක් අහවල් කාරියකටයැ නේද?


ඉතිං හැමෝටම ටීන්බුක් එක ගානෙ තිබුන ඒ කාලෙ පුරුපුරුයි, මාලුකට්ටයි එකතු වෙලා දෙන්නටම එක පොතක් හැදුවලු.ඔය වැඩේට දෙන්නම සෑහෙන්න මහන්සි වුණා.හොස්ටල් එකේ ස්ටඩි, ලේට් ස්ටඩි ටයිම් වල ඒ දවස්වල කළේ ඔය ටීන්බුක් එක ඩෙකරේට් කරන වැඩේ තමයි.ඉතිං මුල් පිටුවට ලස්සන පිටකවරයක් එහෙම දාලා, ඒ දවස්වල සංගීත ලෝකෙ වීරයා වෙච්ච එමිනම් ලොක්කගෙ සීඩී එකකුත් පිටකවරෙ අලවලා එහෙම තමයි අපේ යාලුවො දෙන්නගෙ ටීන්බුක් එක තිබුනෙ.

දැන් අපේ යාලුවන්ගෙ ප්ලෑන් එක තමයි මේ ටීන් බුක් එක දිලූශටයි හංසිනීටයි දීල සටහන් අරගන්න එක. ඇත්තටම මේ දෙන්නට ටීන්බුක් එක දෙන එක එච්චර තේරුමක් නැති වැඩක් වුණත්, ඒ මාර්ගෙන් හරි දෙන්නත් එක්ක ෆිට් වෙන්න තමයි අපේ යාලුවන්ට ඕනෙ වුණේ.අනිත් එක තවමත් ඔය ටීන්බුක් එකේ සමකාලීන කොල්ලො වැඩිය මොකුත් ලියලා තිබුනෙ නෑ.ඉතිං ඒක තවමත් ගෑනු ළමයෙක්ට දෙන්න පුලුවන් මට්ටමේ තිබුනා.දන්නවනෙ ඉතිං ඔයවගේ දෙයක් කොල්ලන්ට දුන්නම මොනවගේ දේවල්ද ලියන්නෙ කියලා.ඔය උඩ ‍ෆොටෝ එකේ තියෙන්නෙ ඒ වගේ ලිව්ව එකක් තමයි.

ඉතිං එක සෙනසුරාදා උදේ වරුවක ක්ලාස් එක පටන් ගන්න කලින් අපේ යාලුවො කට්ටිය උදේ පාන්දරම ක්ලාස් එකට ආවලු.මොකද දිලූශයි හංසිනියි උදේ පාන්දරම තමයි ක්ලාස් එ‍න්නෙ.ඉතිං පූසො ක්ලාස් ඇවිත් විනාඩි පහක්වත් යන්න හම්බවුණේ නෑ මෙන්න බොලේ මේ ගැනු ළමයි දෙන්නත් ක්ලාස් එකට ආවලු.දැන් ඉතිං මාලුකට්ටාගෙ චාන්ස් එක.පන්තියෙ වෙන කවුරුත් ඇත්තෙත් නෑ.මෑන්ස් වහාම බෑග් එක ඇතුලෙන් ටීන්බුක් එක එළියට ගත්තලු.

මාලුකට්ටා :- දිලූශා, හංසිනී, ගුඩ් මෝර්නිං...

දිලූශා සහ හංසිනී :- ගුඩ් මෝර්නිං මාලුකට්ටා

මාලුකට්ටා :- ම්.....මේ තියෙන්නෙ අපේ ටීන්බුක් එක. මේකෙ ඔය දෙන්නත් ලියල දෙනවද?

ඉතිං මාලුකට්ටා මෙහෙම කිව්වට පස්සෙ දිලූශයි හංසිනියි ටිකක් පුදුමෙන් වගේ බලලා, ඊට පස්සෙ ටීන්බුක් එක අතට ගත්තලු.දැන් ඉතිං අපේ මාලුකට්ටට රටක් රාජ්ජයක් පහළ වුණා වගේ! පො‍රට මාර හැපී.හැබැයි ඔය සතුට අබ්ලික් වෙලා යන්න වැඩි වෙලාවක් ගියෙ නෑ.මොකද කෙල්ලො දෙන්නා පූසන්ගෙ ටීන්බුක් එක පෙරළ පෙරළා බයිට් එකට හිනාවෙනවා.ඒ දෙන්නා කිව්ව ඒවා ඤාව්වටත් අතරින් පතර ඇහිලා තිබුනා.

Teen Book of Purupuru & Malukatta
Kurunduwaththta college Rox!
East or West Kurunduwaththta is the Best!

වගේ දේවල් තමයි ටීන්බුක් එකේ ලියලා තිබුනෙ.ඇයි ඉතිං ඔය වයසෙදි තමන්ගෙ ඉස්කෝලෙ වෙනුවෙන් කොල්ලො කොච්චරනං ගහ මරා ගන්නවද? හැමෝම හිතාගෙන ඉන්නෙ තමන්ගෙ ඉස්කෝලෙ තමයි සිරාම ඉස්කෝලෙ, අනිත් ඔක්කොම පීචං ඉස්කෝල කියලා නොවැ! (දැන්නං මරාගන්නෙ ෆේස්බුක් හරහානෙ! බලාගෙන ගියාම ඒ වැඩෙත් හොදයි.කාටවත් ෆිසිකල් හානියක් වෙන්නෑනෙ)

ඉතිං ඔය ලියලා තිබුන ඒවා බයිට් කර කර, හිනා වෙවී, එක එක ඒවා කියනවා තමයි ඤාව්වට ඇහිලා තිබුනෙ.ඉතිං පුරුපුරුට හරිම හිතට අමාරුයි.මදෑ මාලුකට්ටගෙ ආදරේ ගොඩයන්න ටීන්බුක් එක දීලා කරගත්ත වැඩේ!

මොනව වුණත් දිලූශයි හංසිනියි ටීන්බුක් එක ගෙදර අරන් ගියාලු.ඉතිං ඒක පොසිටිව් ලක්ෂණයක් විදිහට තමයි අපේ යාලුවන්ට පෙනුනෙ.මොකද පොත ආපහු බාරදුන්නෙ නෑ නොවැ! ඉතිං දැන් පූසො ලබන සතිය උදා වෙනකං නොඉවසිල්ලෙන් ඉන්නෙ.දිලූශයි හංසිනියි ටීන් බුක් එකේ මොනවා ලියලද දන්නෙ නෑනෙ.මාලුකට්ටත් ඒ සතියම හොස්ටල් එකට වෙලා මනෝ ගහගහ තමයි හිටියෙ.ඉතිං ඔහොම කාලෙ ගෙවිල ගිහිං ඊළග පන්ති දවසත් උදාවුණාලු.

එදත් පූසො පන්ති ගියෙ උදේ පාන්දරම.සුපුරුදු විදිහට ගෑනු ළමයි දෙන්නත් කුකුළා අතින් අරගෙන පන්තියට ආවලු.ඒත් වෙනදා වැඩිය කතාබහ කරන්නෙ නැති දෙන්නා එදා පන්තියට ආවෙම මාලුකට්ටට ගුඩ් මෝර්නිං පාරක් දාගෙන.ඉතිං වැඩේ ජෝන්බාස්ට ගිහිං නැති බව අපේ පූසො සෙට් එකට තේරුණාලු.කට්ටියටම බොහොම සතුටුයි.

බෑග් එක ඇරිය දිලූශා තමන් ළග තිබුන ටීන්බුක් එක මාලුකට්ටාට ආපහු දුන්නෙ ඔය වෙලාවෙ.ඉතිං ඊටපස්සෙ මොකද වුණේ කියලා ඊළග කොට‍සින් බලමුකො නේද යාලුවනේ!

Wednesday, August 25, 2010

BLOG ගඩොල්ගෙන් නොදැවී අර්ධ ශතකයක්




ඉතිං යාලුවනේ කොහොමද? ඔන්න අදනම් අපි කියන්න යන්නෙ වෙනදා වගේ හිනායන කතාවක් නෙවෙයි.මාතෘකාව දැක්කම හිතාගන්න පුලුවන්නෙ නේද?ඔව්...මේ තමයි BLOG ගඩොල් බ්ලොග් එකේ 50 වෙනි ලිපිය.ඉතිං මේ ලිපිය විශේෂ ලිපියක් විදිහට ලියන්න අපි තීරණය කළා.මුලින්ම කියන්න ඕනෙ අද ලිපිය ලියන්නෙ පුරුපුරු.

මම මුලින්ම සිංහල බ්ලොග් එකක් දැක්කෙ අහම්බෙන්.ඒ ෆේස්බුක් එකේ අයාලෙ යමින් ඉද්දි මේ අවුරුද්දෙ ජනවාරි මාසෙ.ඒ බ්ලොග් අඩවියෙ නම තමයි "Y පරම්පරාවේ කතා".මුලින්ම කියවන්න ලැබුනෙ අපේ ඒකොන් ලොක්කා ගැන ලියලා තිබුන ලිපියක්.දැන්නං ඒ බ්ලොග් එක ඇක්ටිව් නැහැ මම හිතන්නෙ.ඉතිං ඕක කියව කියව ඉන්නකොට තමයි දාල තිබුන ලින්ක් එකක් දිගේ ටැබූ සබ්ජෙක්ට් අඩවියට මාව ඉබේම යැවුනෙ.

ඔය සිද්දිය මගෙ බ්ලොග් ජීවිතේ ටර්නින් පොයින්ට් එකක් වුණා.මම කළේ දවස් දෙක තුනක් අරගෙන මුලු ටැබූ බ්ලොග් එකම එකදිගට කියවගෙන ගිය එක.ඒක මට හරිම රසවත් අත්දැකීමක් වුණා.ඉතිං අපිව සිංහල බ්ලොග්කරණයට වක්‍ර ආකාරයෙන් යොමුකිරීම ගැන ටැබූට මම ස්තුතිවන්ත වෙනවා.

හැබැයි මේ කාලෙ වෙද්දි මම බ්ලොග් අවකාශයක් ගැනවත්, සින්ඩිකේටර් ගැනවත් මෙලෝ හසරක් දැනගෙන හිටියෙ නෑ.ටික දවසක් යද්දි තමයි දැනගත්තෙ සිංහල බ්ලොග්අවකාශයක් කියල දෙයක් තියෙනවා, සිංහල බ්ලොග්කරුවන්ගේ සංගමය කියල දෙයක් තියෙනවා, සින්ඩිකේටර් කියල ජාතියක් තියෙනවා කියලා.මුලින්ම යැවුනෙ සිංහල බ්ලොග් කියවනයට සහ ලාංකිය සිතුවිලි බ්ලොග් කියවනයට.එහෙම ගියාම මට ගොඩක් පුදුම හිතුනා මෙහෙම දෙයක් අපි නොදැන මෙච්චරකල් කොහොමද තිබුනෙ කියලා.

මොකද මේ වෙද්දි මම ඉන්ටර්නෙට් පාවිච්චි කරන්න පටන් අරගෙන ගොඩක් කල්.ඉතිං තවමත් මට හිතෙන දෙයක් තමයි සිංහල බ්ලොග්අවකාශයට මීට වඩා පබ්ලිසිටි එකක් ඕනෙ කියලා.තවමත් ඉන්ටර්නෙට් පාවිච්චි කරන ගොඩක් දෙනෙක් සිංහල බ්ලොග් ගැන එච්චරම දන්නෙ නෑ.

කොහොමහරි සිංහල බ්ලොග්අවකාශය හිතට අල්ලලා යන්න මට එච්චර කල් ගියෙ නෑ.මොකද මේකෙ තියෙන්නෙ ලියන මිනිස්සුන්ගෙ අවංක අදහස්.ඒ වගේම ලියන අදහස මොකක් වුනත් බහුතරයක් දෙනා ගොංපාට් නැතුව බොහොම තර්කානුකුලව ඒ දේ ලියනවා.සමහරවිට සිංහල බ්ලොග්අවකාශයෙ ඉන්න ගොඩක් දෙනා හොද අධ්‍යාපන මට්ටමක් ඇතුව ඉන්න අය නිසා වෙන්න ඇති.කොටින්ම ලංකාවෙ අනිත් විද්‍යුත් මාධ්‍ය සහ මුද්‍රිත මාධ්‍ය එක්ක බලනකොට, සිංහල බ්ලොග්අවකාශයෙ ඉන්න හැමෝම වගේ ඊට වඩා ඉස්සරහින් ඉන්නවා.

ඔහොම ඉන්නකොට තමයි මටත් හිතුනෙ බ්ලොග් එකක් පටන්ගත්තොත් හොදයි කියලා.ඉතිං මමත් පටන්ගත්තා විද්‍යාත්මක කරුණු සම්බන්ධ බ්ලොග් එකක්.ඒ පෙබරවාරි මාසෙ.ඒ වුණාට ඒ වැඩේ එච්චර සතුටුදායක විදිහට නැගලා ගියෙ නෑ.අපේ හා පැටික්කි විතරයි ඕක කියවන්න ආවෙ.ඉතිං මහන්සිවෙලා ලියලා කට්ටිය කියවන්නෙ නැත්තං ඒ බ්ලොග් ලිවිල්ලෙන් වැඩක් නෑ නොවැ!ඉතිං මම තීරණය කළා කට්ටිය ගොඩදෙනෙක් කියවන බ්ලොග් එකක් පටන් ගන්න.

ආ...තව පොඩ්ඩෙන් කියන්න අමතක වෙනවා.හා පැටික්කි තමයි මට සිංහල බ්ලොග්අවකාශෙ මුල්ම පාඩම කියලා දුන්නෙ.ඒ තමයි බ්ලොග් එකක් ලියද්දි ලිපි වලට සිත්ඇදගන්නාසුලු මාතෘකාවක් දාන්න කියලා.ඒ උපදෙස මම එදා ඉදන් දිගටම පිළිපැද්දා.ඉතිං හා පැටික්කිටත් ගොඩක් ස්තුතියි.

ඔය දවස්වල මම කතන්දරගෙ බ්ලොග් එක කියව කියවා හිටියෙ.ඉතිං මටත් හිතුනා කසූ වගේම තමන්ගෙ ජීවන අත්දැකිම් පළකරන බ්ලොග් එකක් ලියන්න.ඉතිං අපේ බ්ලොග්කරණයට දායක වුණ කතන්දර සූරීන්ටත් ස්තුති කරන්න මේ වෙලාව යොදාගන්න කැමතියි.

මම පොඩි කාලෙ ඉදලම පිස්සු වැඩ කළේ අපේ පූසො සෙට් එකත් එක්කමයි.ඉතිං මම ගිහින් ඒ අයට මගෙ අයිඩියා එක කිව්වා.උන් සෙට් එකත් වැඩේට එක පයින්ම කැමති වුනා.මොකද අපි දැනගෙන හිටියා මේ බ්ලොග් එකට ගොඩදෙනෙක් කැමති වෙයි කියලා.ඊට පස්සෙ තිබුනෙ බ්ලොග් එකට නමක් යෝජනා කරන්න.ටික වෙලාවක් කල්පනා කර කර ඉදිද්දි උපාසක තමයි "BLOG ගඩොල්" කියන නම යෝජනා කළේ.ඉතිං පහුවදාම අපි එකතුවෙලා වැඩේ පටන්ගත්තා.

දැන් මාස හතරක් ගිහිල්ලා.මේ වෙද්දි ගොඩක් ලිපි ලිව්වෙ මම.ඒත් උපාසකත් සැලකිය යුතු ලිපි ගණනක් ලියල තියනවා.ඤාව්වත් දෙකතුනක් ලියලා තියනවා.අපි මුලින්ම හිතුවෙ අපි ලියන එව්වා අනුව මේ බ්ලොග් එක කාන්තා පාර්ශ්වයෙ අය පිළිගන්න එකක් නෑ කියලා.ඒත් කියන්න සතුටුයි, පහුගිය කාලෙ ඇතුලත ගෑනු පිරිමි භේදයක් නැතුව ගොඩක් යාලුවො අපි එක්ක එකතු වුණා.තමන්ගෙ අදහස් පළකළා.

ඇත්තටම කොමෙන්ට් බලාගෙනම බ්ලොග් නොලිව්වත්, ලැබෙන කොමෙන්ට් වලින් තමයි ඉස්සරහට ලිපි ලියන්න ඕනෙ කරන ධෛර්යය අපිට ලැබෙන්නෙ.මොකද මේ බ්ලොග් කෙරුවාව නිසා අපේ කාලය, මහන්සිය අපතෙ ගියාට, ඉන්ටර්නෙට් බිල් සහ කරන්ට් බිල් වැඩිවුණාට, ආත්ම තාප්තිය ඇරෙන්න වෙන කිසිම දෙයක් අපිට ලැබෙන්නෙ නෑ.ඉතිං හැමදාම ඇවිත් අපේ ලිපි බලලා තමන්ගෙ අදහස් දක්වලා යන අපේ යාලුවන්ටත් මේ වෙලාවෙ පූස් උත්තමාචාරය පිරිනමනවා.


ඒ වගේම ‍අපේ බ්ලොග් එකේ ලිපි කියෙව්වත් තමන්ගෙ අදහස් දක්වන්න සමහර යාලුවන්ට වෙලාවක් නැහැ.අපිට ඒ යාලුවන්ගෙ කාර්යබහුල බව තේරුම්ගන්න පුලුවන්.ඉතිං හැමදාම අපේ බ්ලොග් එක කියවන ඒ යාලුවන්ටත් අපේ ස්තුතිය පුද කරන්න ඕනෙ.

නම් වශයෙන් ස්තුති කරන්න ගියොත්, සමහර නම් අමතක වීම හින්දා අපේ සමහර යාලුවො තරහා වෙන්න බැරි නෑ.ඒත් ප්‍රසන්න, පිස්සා, ප්‍රියන්ත, රන්දිල්, හා පැටික්කි, ගයන්ත, අභීත, පුතා, හසිත ඇතුලු හසී ‍ෆැමිලි එක, වැම්පි, හේමලයා, දුමී, මකරා, කොඩී, බුරතෙනෝ, අන්ශ්, හෙළයා, සිකා, මාරයා, ඉලංදාරියා, මාතලන්, ඉබ්බා, කැන්ඩි, කුෂාන් , ළමයා , හන්සි වගේ යාලුවන්ගෙ නම් නොදා කොහොමද? ඔය හැමෝටම ගොඩක් ස්තුතියි අපිත් එක්ක මෙච්චරකල් රැදිලා හිටියට.අනේ නම් දාන්න බැරිවුණ යාලුවො තරහ වෙන්නනං එපා!


හැබැයි මුලු නම් ලැයිස්තුවම බ්ලොග් එකේ දකුණු පැත්තෙ යට ලින්ක් එක්කම දාල තියෙනවා.ඒ වගේම ඒ යාලුවන්ගෙ බ්ලොග් වලට අපේ බ්ලොග් එකෙන් ලින්ක් දාලා තියෙනවා.ඒ කලගුණ සැලකීමක් විදිහට.අපි තවමත් තමන්ගෙ බ්ලොග් එකට ලින්ක් දාලා නැති යාලුවො ඉන්නවානම් පොඩ්ඩක් ඊමේල් එකකින් මතක් කරන්න.

ඒ වගේම කියන්න ඕනෙ අපි ගොඩක් වෙලාවට ලියන්නෙම විහිලු කතා.සමහරුන්ට හිතෙන්න පුලුවන් ඒක හරිම ලේසි වැඩක් කියලා.ඒත් අපිට හිතෙන විදිහටනං ඒක තමයි අමාරුම වැඩේ.මොකද හොද කතා 100ක් ලිව්වත් එක මෝඩ කතාවක් නිසා මුලු බ්ලොග් එකම අදුරු වෙන්න පුලුවන්.

ඉතිං මෙච්චරකල් ආපු කෙටි කාලය ඇතුලුත අපිට මල් වගේම ගලුත් හම්බවෙලා තියනවා.අපි ඒ ඔක්කොම සාදරයෙන් පිළිගන්නවා.දැන් මේ බ්ලොග් එක පටන් ගත්තු කාලෙට වඩා අපි දැනුමෙන් සහ අත්දැකීම් වලින් පොහොසත්.ඉතිං ඉස්සරහටත් ඔයාලට අලුත් කතා ගේන්න තමයි අපේ බලාපොරොත්තුව.

ඉතිං යන්න කලින් මෙච්චරකල් ‍අපේ බ්ලොග් එකේ ඔයාලා වැඩිපුරම ආසාවෙන් කියවපු ලිපිය හරි සීරීස් එක හරි මොකද්ද කියලා මෙතන සදහන් කරලා යන්න හොදේ!අපිනං ආසම සීරීස් එක තමයි ගන කතා.

ඒ වගේම අපි ඉස්සරහට හදාගන්න ඕනෙ මොනවද? අපේ අඩුපාඩු මොනවද? කියලා ඔයාලට හිතෙන යෝජනා, චෝදනා එහෙමත් කියල යන්න හොදේ! සැබෑ නමින් බැරිනං ඇනෝ විදිහට හරි කමක්නෑ.

ප.ලි - තවත් කීපදෙනෙක් මතක් වුණා. සුපුන් සුදාරක, ඉසිඹුව, වීතරාගී , අශේන්, නදීස්තෝට්ස්, ටී සෝනර්, විහගි, නිශ්, හිගන්නා, ඉන්දික උපශාන්ත, ජයන්ත, තරංග යන යාලුවන්වත් ආදරයෙන් මතක් කරනවා.

හොස්ටල් ලයිෆ් - රාත්‍රී ප්‍රහාරක බලකාය 4 (අවසාන කොටස)


ඉතිං යාලුවනේ අද අපි කියන්න යන්නෙ අපේ රාත්‍රී ප්‍රහාරක බලකාය සිරීස් එකේ අන්තිම කොටස.මේක කියවන්න කලින්, මේ සීරීස් එකේ කලින් කොටස් කියවපු නැති යාලුවො ටික පහළ තියන ලින්ක් වලින් ගිහින් ඒවා කියවලා එන්නකො.

හොස්ටල් ලයිෆ් - රාත්‍රී ප්‍රහාරක බලකාය 1
හොස්ටල් ලයිෆ් - රාත්‍රී ප්‍රහාරක බලකාය 2
හොස්ටල් ලයිෆ් - රාත්‍රී ප්‍රහාරක බලකාය 3

අපි කලින් කො‍ටසෙ කතාව නැවැත්තුවෙ රාත්‍රී ප්‍රහාරක බලකාය මැදිහත්වෙලා ලයිමෝල්ගෙ කබඩ් එකේ පිටිපස්සෙ හොර දොරක් කපපු තැනින්නෙ.දැන් ඉතිං තියෙන්නෙ එතන ඉදන් කතාව.

ඔය කපපු දොර ගැන ලයිමෝල් කිසිම දෙයක් දැනගෙන හිටියෙ නෑ.මොකද මේ දොර පේන්නෙ බොහොම සැලකිලිමත්ව කබඩ් එකේ පිටිපස්ස චෙක් කළොත් විතරයි.ඉතිං ලයිමෝල් කවදාවත් බලාපොරොත්තු වුණේ නෑ තමන්ගෙ කබඩ් එකට පිටිපස්සෙන් ප්‍රහාරයක් එල්ල වෙයි කියලා.ඒක හින්දා මෑන්සුත් සුපුරුදු විදිහටම තමන්ගෙ කාලෙ ගතකළාලු.ඩෝම් එකේ ළමයි කළේ ලයිමෝල් කොහෙ හරි යනකං ඉදලා ෂේප් එකේ මෑන්ස්ගෙ කබඩ් එකෙන් සබන් කැටයක්, බිස්කට් කීපයක් වගේ ලයිමෝල්ට නොදැනෙන මට්ටමේ පොඩි හොරකමක් කරපු එක.

ඉතිං ලයිමෝල් ආපහු ඇවිත් බලනකොට කබඩ් එකේ සැලකියයුතු මට්ටමේ වෙනසක් පේන්න නෑලු.ඒකනිසා පොරත් සැටිස්.ඒ වගේම ඩෝම් එකේ ඉන්න කොල්ලො සෙට් එකත් සැටිස්.හැබැයි ඉතිං ඔය වැඩේ මාසයක් විතර එකදිගට කරගෙන යද්දි ලයිමෝල්ගෙ කබඩ් එකේ සබනුයි කෑමයි ගොඩගැහෙන රේට් එක අඩුවුණාලු.එතකොට තමයි මෑන්ස්ට ක්ලික් වුණේ මෙතන මොකක්හරි අංජබජල් කේස් එකක් තියනවයි කියලා.ඒකහින්දා අපේ යාලුවා තීරණය කළාලු කබඩ් එක ෆුල් චෙකප් එකකට ලක්කරන්න.

ඔය චෙකප් එක වෙලාවෙ පුරුපුරුලා හිටියෙ ඩෝම් එකෙන් එළියෙ ඒ කිට්ටුවමයි.එතකොට තමයි ඩෝම් එක ඇතුලෙන් ලයිමෝල්ගෙ මර ලතෝනි සද්දයක් ඇහුනෙ.


බුදු අම්මෝ! මගෙ කබඩ් එක කඩලෝ!! මුදලාලි.....මෙහෙ වරෙන් ******යෝ

සද්දෙ ඇහිච්ච පුරුපුරුයි, මාලුකට්ටයි ඇතුලු කොල්ලො සෙට් එක ඩෝම් එක ඇතුලට දුවලා යද්දිත් ලයිමෝල් මුදලාලිව අල්ලගෙන අම්බානක නෙලනවලු.පස්සෙ කට්ටිය එකතු වෙලා අමාරුවෙන් මුදලාලිව ගුටිකෑමෙන් බේරගත්තලු.බැලින්නං ලයිමෝල් තමන්ගෙ කබඩ් එක කැඩීම ගැන සැක කරලා තියෙන්නෙ මුදලාලිව.මොකද ඊට කලින් දවසෙ මේ දෙන්නා අතරෙ මොකද්ද එකකට ලොකු බහින්බස්වීමක් වෙලා තියනවා.ඇත්තටම මුදලාලි රාත්‍රී ප්‍රහාරක බලකායෙ මෙම්බර් කෙනෙක් වුණාට ලයිමෝල්ගෙ කබඩ් එක කඩන වැඩේට සහභාගි වුණේ නෑ.

ඉතිං මුදලාලි තමන්ගෙ නිදොස්බව කොච්චර කිව්වත් ලයිමෝල් නෙවෙයි ඒක පිළිගත්තෙ.ඊට පස්සෙ ලෝඩ් කොක් ඉදිරිපත්වෙලා ඇත්තටම වෙච්ච සිද්දිය මෑන්ස්ට කිව්වලු.ඒ වගේම මීට පස්සෙ තමන්ගෙ දේවල් ඩෝම් එකේ අනිත් අයත් එක්ක බෙදාහදාගන්නයි කියලත් මෑන්ස්ට උපදෙස් ලැබුනලු.ඒත් මේ දේවල් එකක්වත් ලයිමෝල් කනකට ගත්තෙ නෑ.

ඇත්ත කතාව ඇහුවට පස්සෙවත් ලයිමෝල්ගෙ හිතේ මුදලාලි ගැන තිබුන තරහා නැතිවුණේ නෑ.පොර ඊටපස්සෙ කිව්වෙ මේ වැඩේ මුදලාලිගෙ ලීඩර්ෂිප් එක යටතෙ රාත්‍රී ප්‍රහාරක බලකාය කරපු වැඩක් කියලා.ඉතිං ලයිමෝල් දවස තිස්සෙම කළේ පැත්තක හිටපු මුදලාලිගෙ හත්මුතු පරම්පරාවටම පින් දිදී හිටපු එක.ඒ වගේම ලබන ආත්මෙ මුදලාලි ඇතුලු රාත්‍රී ප්‍රහාරක බලකාය කුණුගොඩක ඉපදේවා කියලත් ලයිමෝල් කට්ටියට සාප කිරීමක් කළාලු.ඉතිං එදා රෑ වෙද්දි මුදලාලි හිටියෙ හරිම හිතේ අමාරුවෙන්.ඩිනර් එකෙන් පස්සෙ පුරුපුරුව හම්බවෙච්ච මුදලාලි, එදා රෑට ලයිමෝල්ට ගේමක් දෙන්න ඕනෙ බව කිව්වලු.

තමන්ට අරවගේ දෙයක් කිව්වට පස්සෙත්, ලයිමෝල්ට ගේමක් දීම ගැන රාත්‍රී ප්‍රහාරක බලකායට දෙපාරක් හිත හිතා ඉන්න ඕනෙ වුණේ නෑ.ඉතිං කට්ටිය ඒ වෙලාවෙම ගේමට බැස්සලු.මුලින්ම තිබුනෙ ප්ලෑන් කිරීම සහ ඔත්තු බැලීම.ඉතිං බුද්ධි අංශ ප්‍රධානී මාලුකට්ටා ඔත්තු බලන අතරෙ අනිත් කට්ටිය ගේම් එක ප්ලෑන් කළාලු.ප්ලෑන් එකේ හැටියට ගේම දෙන්න නියමිත වුණේ මහ රෑට.ඒ කියන්නෙ ලේට් ස්ටඩි ඉවර වෙලා කට්ටිය නිදාගත්තට පස්සෙ.

කොහොමහරි ඉතිං අපේ යාලුවො ටික බලාපොරොත්තුවෙන් හිටපු වෙලාවත් උදාවුණාලු.දැන් ඩෝම් එකේ ලයිට් එහෙම ඕෆ් කරලා කට්ටිය ගොරව ගොරවා නිදි.ඉතිං අපේ රාත්‍රී ප්‍රහාරක බලකායත් සුපුරුදු විදිහට රැස් වුණාලු.ප්ලෑන් එකේ හැටියට මුලින්ම කරන්න තිබුනෙ ලයිමෝල් ඇද පිටින් උස්සගෙන ගිහින් කුණුවල ළගින් තියන එක.ඉතිං මේ වැඩේට කලින් ලයිමෝල්ගෙ ඇදට දාලා තියන නෙට් එක ගලවන්න ඕනෙ.ඒ වැඩේ පැවරුනේ මුදලාලිට.මුදලාලිත් තමන්ගෙ ශිල්ප ඔක්කොම දාලා ලයිමෝල්ව නැගිට්ටෙන්නෙ නැතිවෙන්න නෙට් එක ගැලෙව්වලු.

ඊට පස්සෙ තිබුනෙ ඇද උස්සගෙන යන වැඩේ.දැන් ඇද උඩ ලයිමෝලුත් ඉන්න නිසා ඒක සෑහෙන බරයි.ඒ මදිවට ඇද හෙලවෙන්නෙ නැතිව උස්සන් යන්නත් ඕනෙ.ඉතිං මේ වැඩේ පැවරුනේ පුරුපුරු, වන්නියා, බෝරෙ සහ අමන්දානන්දට.අපේ යාලුවො හතරදෙනත් තමන්ට පැවරුන වැඩේ අකුරටම ඉෂ්ට කළාලු.ඒකෙ ප්‍රතිඵලයක් විදිහට ටික වෙලාවකට පස්සෙ ලයිමෝල් නිදාගෙන හිටියෙ හොස්ටල් එකේ කුණුවල අද්දරමයි.ඉතිං රාත්‍රී ප්‍රහාරක බලකාය කුණුවලක උපද්දවන්න සාප කරපු ලයිමෝල්ට එදා රෑ සිද්දවුණේ කුණුවලක් ළගම නිදාගන්න.

ඊට පස්සෙ රාත්‍රී ප්‍රහාරක බලකාය කළේ ලයිමෝල් හැමදාමත් ආදරය කරපු මෑන්ස්ගෙ කබඩ් එකත් උස්සගෙන ඇවිත් ඇද ළගින්ම තියපු එක.

හැබැයි රාත්‍රී ප්‍රහාරක බලකාය දැනගෙන හිටියා කුණුවලේ ගදටයි, රෑ හීතලටයි ටික වෙලාවක් යද්දි ලයිමෝල්ට නැගිට්ටවෙනවයි කියලා.ඒක නිසාම තමයි අපේ යාලුවො කට්ටිය තවත් ප්ලෑන් එකක් ලෑස්ති කරලා තිබුනෙ.ඉතිං ඒ ප්ලෑන් එකට අනුව කට්ටිය ඩෝම් එකේ දොර බාගෙට වහලා, දොරේ දාරෙ උඩින් ප්ලාස්ටික් බොග බකට් එකක් රැදෙව්වලු.නිකම්ම නෙවෙයි, හොදට වතුරත් පුරවලා.

ඉතිං බලාපොරොත්තු වෙච්ච විදිහටම ලයිමෝල්ට ටික වෙලාවකින් ඇහැරුනාලු.මෑන්ස් බලන්න ඇති ඔලුවට උඩින් වෙනදා තියෙන සීලිම වෙනුවට තරු තියෙන්නෙ ඇයි කියලා.ඒ මදිවට ඩෝම් එක ඇතුලෙ කුණු වළක්??? ටික වෙලාවකින් තමයි ලයිමෝල්ට ක්ලික් වුණේ තමන් ඉන්නෙ ඩෝම් එකෙන් එළියෙ, කුණුවළ අයිනෙ කියලා.මොකද්ද සිද්ද වෙන්න ඇත්තෙ කියලා මෑන්ස්ට තේරුම් ගියෙ එතකොට.ඉතිං ලයිමෝල් කළේ කුලප්පු වෙච්ච කගවේනෙක් වගේ දුම් දාගෙන, සාප කර කර ඩෝම් එක ඇතුලට කඩාගෙන ආපු එක.

මෙහෙම ආපු ලයිමෝල් ඩෝම් එකේ දොර අරිද්දිම

ජබෝස් !!!

අර දොර උඩ රදවලා තිබුන වතුර බකට් එකෙන් පොරව නෑවිලා ගියාලු.හැබැයි ඒ වැඩේනං පිනක් විදිහට තමයි පූසො සෙට් එක තවමත් සලකන්නෙ.මොකද ඉතිං දවස් හතරකට සැරයක් විතරක් වතුර බිංදුවක් දකින සරීර කුඩුව නොවැ!දැන්නං ලයිමෝල්ගෙ ෆ්ලවර් එක උපරිමෙන් ජම්ප් වෙලා.පොර ලෑස්ති වුණේ ඒ වෙලාවෙම කොටියා සර්ගෙ නිළ නිවාසෙට ගිහින් සර්ව මහ රෑ නැගිට්ටවන්න.එහෙම කළොත් රාත්‍රී ප්‍රහාරක බලකාය ඉවරෙටම ඉවරයි.

ඉතිං අපේ යාලුවො කට්ටිය කළේ ලයිමෝල් කොටියා සර්ව හම්බවෙන්න යන්න එලියට බහිනකොටම ගිහින් මෑන්ස්ට ෆ්‍රෙන්ඩ්ලි ටෝකක් දාපු එක.අන්තිමට

කබඩ් එක සහ ඇද ආපහු තිබුන තැන තැබීම
කඩපු කබඩ් එක ආපහු හැදීම

වගේ කොන්දේසි කීපයක් පිළිගත්තට පස්සෙ ලයිමෝල් කැමති වුණාලු සර්ට මේ සිද්දිය ගැන පැමිණිලි නොකර ඉන්න.ඒ වගේම ලයිමෝලුත් එකග වුණාලු තමන්ගෙ දේවල් බෙදාහදාගෙන පාවිච්චි කරන්න.ඉතිං ඔය සිද්දියෙන් පස්සෙ ලයිමෝලුත් රාත්‍රී ප්‍රහාරක බලකායෙ සාමාජිකයෙක් බවට පත්වුණාලු.එදා ඉදලා මෑන්ස්ගෙ කබඩ් එක ඩෝම් එක ඇතුලෙ මාතෘකාවක් වුණෙත් නෑ.මොකද එදා ඉදලා ලයිමෝල් කබඩ් එක ලොක් කළේ නැති නිසා...

ප.ලි - රාත්‍රී ප්‍රහාරක බලකාය සීරීස් එක මෙතනින් ඉවර වුණාට ඉස්සරහට එන සමහර කතාවලදි රාත්‍රී ප්‍රහාරක බලකායෙ වැඩකෑලි ගැන ආපහු අපේ යාලුවන්ට කියවන්න ලැබේවි.

ලයිමෝල් දැන් ඉන්නෙ කොළොම්පුර පැත්තෙ සක්වල තක්සලාවක 2 වසරෙ.පුරුපුරු ඉන්නෙත් ඒකෙම 4 වසරෙ.ඉතිං ඉස්සර ලයිමෝල්ට කරපු අරියාදු වෙනුවෙන් පුරුපුරුට පුලුවන් වුණා කීප පාරක්ම ලයිමෝල්ව රැග් එකෙන් බේරගන්න.හික්ස්...සුපර් සීනියර් නොවැ!

අනිත් කාරනේ, මේ රාත්‍රී ප්‍රහාරක බලකාය සීරීස් එකේදි කරපු වැඩ වැරදියි කියලා දැන් පූසො දන්නවා.ඒත් ඉතිං ඒ කාලෙ ඕව ගැන එච්චර දුරට හිතන එකක්යැ!

Monday, August 23, 2010

හොස්ටල් ලයිෆ් - රාත්‍රී ප්‍රහාරක බලකාය 3






ඉතිං යාලුවනේ පහුගිය දවස්වල අපි පළකරානෙ රාත්‍රී ප්‍රහාරක බලකාය 1 සහ 2 කොටස්.අද අපි කියන්න යන්නෙ මේ සීරීස් එකේ 3 වෙනි කොටස.ඊට කලින්, සීරීස් එකේ පරණ ලිපි බලපු නැති යාලුවන්ට මෙතනින් ගිහින් ඒවා බලලා එන්න පුලුවන්.

රාත්‍රී ප්‍රහාරක බලකාය 1
රාත්‍රී ප්‍රහාරක බලකාය 2

‍ඉතිං අපි කිව්වනෙ අන්තිමට කොහොමද රාත්‍රී ප්‍රහාරක බලකායයි, ලෝඩ් කොක් බලකායයි සාම ගිවිසුමක් ගැහුවෙ කියලා.දැන් මේ ක්‍රියාත්මක වෙන්නෙ සාම කාල සමය.දැන් ඉතිං දෙගොල්ලො හොද යාලුවොලු.ඔහොම ටික දවසක් යද්දි තමයි ලෝඩ් කොකුයි, පොන්ටිනුයි ඇවිත් පුරුපුරුලාට අපූරු යෝජනාවක් ඉදිරිපත් කළේ.යෝජනාවට කලින් ඉතිං බැක්ග්‍රවුන්ඩ් එක කියල ඉන්න එපායැ!

දැන් අපේ හොස්ටල් කතා කියවල කියවලාම, හොස්ටල් හිටපු නැති යාලුවොත් දල වශයෙන් දන්නවා හොස්ටල් එකක් කියන්නෙ මොකද්ද කියලා.ඉතිං ඒක හින්දා හොස්ටල් එකේ හැම ළමයෙකුටම කබඩ් එක ගානෙ තිබුනයි කියලා අපි අමුතුවෙන් කියන්න ඕනෙ නෑ නොවැ!ඉතිං අපේ ලයිමෝල්ටත් තිබුනලු ලස්සන කබඩ් එකක්.ඒක ඇරපු අතක් නෑ, ඔය උඩ රූපෙ තියෙන කබඩ් එක වගේමයි.හැබැයි අනිත් ළමයින්ගෙ කබඩ් වලට වඩා ලයිමෝල්ගෙ කබඩ් එකේ විශේෂත්වයක් තිබුනා.

සාමාන්‍යයෙන් කිසිම ළමයෙක් තමන්ගෙ කබඩ් එකේ ගොඩාක් වටින දේවල් දාගෙන හිටියෙ නෑ.ඒවයෙ තිබුනෙ ඇදුම්, පොත්පත් වගේ හොරකම් කළාට වැඩක් නැති දේවල්.ඉතිං තමන්ගෙ කබඩ් එක හැම තිස්සෙම ලොක් කරලා තියාගන්න කාටවත් ඕනෙකමක් තිබුනෙ නැහැ.තමන්ට වියදම් කරන්න අවශ්‍ය සල්ලි තිබුන ඇතුල් ලාච්චු විතරයි ගොඩක් වෙලාවට ලොක් කරලා තිබුනෙ.ඒත් ලයිමෝල්ගෙ කබඩ් එක තිබුනෙ හැම තිස්සෙම ලොක් කරලලු.නිකං නෙවෙයි, යතුරට අමතරව තඩි ඉබ්බෙකුත් දාලා.ඒ කියන්නෙ මෑන්ස්ගෙ කබඩ් එක කඩනවානං හොරාට ඉබ්බවත් කඩලා, යතුරු ලොක් එකත් කඩන්න වෙනවා.

ඒ වගේම ලයිමෝල් කවදාවත් කබඩ් එකේ දොර සම්පූර්ණයෙන් අරින්නෙ නෑ.කවුරුවත් බලන් ඉන්නවද කියලා දෙතුන් පාරක් වට පිට බලලා එහෙම තමයි දොර බාගෙට අරින්නෙ.ඒ වගේම ඇරපු හැටියෙම බොහොම ඉක්මනට දොර වහනවා.මේ ඔක්කොම කාරනා බලද්දි ඕන මනුස්සයෙකුට තේරෙනවා ලයිමෝල් තමන්ගෙ කබඩ් එක ඇතුලෙ මොනවා හරි වටින දෙයක් හංගගෙන ඉන්න බව.ඉතිං හොස්ටල් එකේ සගයොත් ලයිමෝල්ගෙ කබඩ් එක ගැන හිතුවෙ එහෙමයි.

ඔය ඕනෙම දෙයක් හංගගෙන ඉන්නකොට ඒක ගැන හොයන්න තියෙන කුතුහලය තව තවත් වැඩි වෙනවා නොවැ!ඉතිං ලයිමෝල්ගෙ කබඩ් එකට අපල කාලය උදාවුණේ ඔන්න ඔය හේතුව හින්දයි.මෑන්ස්ගෙ කබඩ් එක ඒ දවස්වල "ආදරය" වගේ මාතෘකාවක්.ඕක ගැන හැමෝම කතාකරන්න උනන්දු වෙනවා.ඒ වගේම කවුරුත් ඕක ගැන හරියට දන්නෙත් නෑ.ඉතිං කුතුහලය වැඩිකමටම ගොඩක් දෙනෙක් ලයිමෝල්ගෙ කබඩ් එක කඩලා බලන්න බලාගෙන හිටියලු.

ලයිමෝලුත් දැනගෙන හිටියෙ තමන්ගෙ කබඩ් එකට බැච් එකේ අනිත් ළමයින්ගෙ තිබුන ආදරේ.ඒක නිසා මෑන්ස් පුලුවන් හැම වෙලාවෙම කබඩ් එක ඇහැට පේන තෙක් මානෙ තමයි හිටියෙ.කොහෙහරි ගමනක් ගියත් ලයිමෝල් ආපු හැටියෙ කරන්නෙ ඇවිත් කබඩ් එක චෙක් කරලා බලන එක.කොටින්ම පොර තමන්ගෙ දිවි පරදුවට තියලා තමයි කබඩ් එක රැක්කෙ.ඒක හින්දම මීට කලින් මෑන්ස්ගෙ කබඩ් එක කඩන්න එක එක ළමයි කරපු මිෂන් ගණනාවක්ම ෆේල් වෙලා තිබුනා.

අපි කලින් ලිපියෙ කිවුවනෙ ලයිමෝල් හිටියෙ ලෝඩ් කොක් බලකායෙ කියලා.ඒ වුණත් බලකායෙ ඉතුරු සාමාජිකයො වෙච්ච ලෝඩ් කොක්වත්, පොන්ටින්වත් දැනගෙන හිටියෙ නෑ මෑන්ස්ගෙ කබඩ් එක ඇතුලෙ මොනවද තිබුනෙ කියලා.ඉතිං හිතාගන්න පුලුවන්නෙ ලයිමෝල්ගෙ සිකියුරිටි මෙෂර්මන්ට් ගැන.මේ දවස්වල පුරුපුරුටයි, මාලුකට්ටටයිත් මේ කබඩ් එක හිතට වද දෙන ලොකු ප්‍රශ්නයක් වෙලා තිබුනෙ.

ඔය අතරෙ තමයි ලෝඩ් කොකුයි, පොන්ටිනුයි ඇවිත් පුරුපුරුලාට අර අපූරු යෝජනාව ඉදිරිපත් කළේ.දැන් ඉතිං හිතාගන්න පුලුවන්නෙ මොකද්ද යෝජනාව කියලා.ඒක තමයි ලයිමෝල්ගෙ කබඩ් එක කඩන වැඩේ.කරන්න බැහැ කියලා සම්මත වෙච්ච, මෙච්චරකල් කාටවත් කරන්න බැරිවෙච්ච, කාගෙත් එකම හීනය වෙච්ච, ලයිමෝල්ගෙ කබඩ් එක කඩන වැඩේ.ඒ වගේම තවත් විශේෂත්වයක් තමයි ලෝඩ් කොක් බලකායයි, රාත්‍රී ප්‍රහාරක බලකායයි එකතු වෙලා කරන පළවෙනි මිෂන් එක.

ඉතිං මුලින්ම තෝරගන්න වුණේ ලයිමෝල් විතරක් ඩෝම් එකෙන් එළියට යන වෙලාවක්.මෑන්ස් කවදාවත් සෙල්ලම් කරන්න ගිය මනුස්පයෙක් නෙවෙයි.ස්පෝර්ට්ස් මොනවත් කළෙත් නෑ.ඉතිං ලයිමෝල් ඩෝම් එකෙන් චුත වෙන්නෙ එක්කො නාන්න ගියාම, නැත්තං බොගට ගියාම.ඒත් පොරට බොගට ගිහින් එන්න විනාඩි දෙකක්වත් යන්නෙ නැති නිසා කබඩ් එක කඩන වැඩේට බොග ටයිම් එක යොදාගන්න එක එච්චර ප්‍රැක්ටිකල් අයිඩියා එකක් වුණේ නැහැ.ඉතිං මේ විදිහට බැලුවාම වැඩේට සුදුසුම වෙලාව වුණේ මෑන්ස් නාන්න යන ටයිම් එක.

හැබැයි මෙතනත් පොඩි ප්‍රශ්නයක් තිබුනා.ලයිමෝල් සාමාන්‍යයෙන් නාන්නෙ දවස් හතරකට විතර සැරයක්.හික්ස්...සමහරවිට වතුර අපතේ යවන එක නරක වැඩක් හින්දා වෙන්නැති.ඉතිං පොර නාන්න යන වෙලාව මගඇරුනොත් වැඩේ තව දවස් ගානකට කල්දාන්න වෙනවා.ඒ වගේම ලයිමෝල්ට නාන්න යන්නෙත් විනාඩි කීපයක් විතරයි.ඉතිං අපේ යාලුවො ටික කළේ ලයිමෝල්ගෙ දිනචරියාව ගැන ඔත්තු බලන්න බුද්ධි අංශ ප්‍රධානී මාලුකට්ටාව යොදවපු එක.

ඉතිං ඔහොම දවසක් දෙකක් යනකොට හදිස්සියෙන්ම මාලුකට්ටාගෙන් සුභ පණිවිඩයක් ආවලු.ඒ තමයි ලයිමෝල් නාන්න ගියයි කියන පණිවිඩේ.වහාම ක්‍රියාත්මක වෙච්ච රාත්‍රී ප්‍රහාරක බලකාය සහ ලෝඩ් කොක් බලකාය කෙලින්ම ලයිමෝල්ගෙ කබඩ් එක ළගට දිව්වලු.ආ..කියන්න බැරිවුණානෙ.මේ මිෂන් එකට විශේෂ පුද්ගලයෙක් විදිහට සංජුවත් යොදාගෙනයි තිබුනෙ.මොකද මෑන්ස් වඩුවැඩ වලට බොහොම දක්ෂ ළමයෙක්.ඉතිං පුරුපුරුලා ප්ලෑන් කරපු විදිහට කබඩ් එක කඩන්න වඩුබාස් කෙනෙක්ගෙ සහයත් අත්‍යාවශ්‍යයි.

මීට කලින් ඔය කබඩ් එක කඩන්න ට්‍රයි කරපු හැමෝම ට්‍රයි කරලා තිබුනෙ ඉස්සරහ පැත්තෙන් කබඩ් එක කඩන්න.ඒ කියන්නෙ කබඩ් එකේ ලොක් කඩලා ඒක අරින්න.ඒත් අපේ යාලුවන්ගෙ ප්ලෑන් එක වුණේ කබඩ් එකේ පිටිපස්සෙන් ඒක කඩන්න.කඩන්න කිව්වට කපන්න.ඉතිං අපේ යාලුවො සෙට් එක ලයිමෝල්ගෙ කබඩ් එක ළගට ගිහින් වැඩේ පටන් ගත්තලු.මේකට ඕනෙ වුණේ නියනකුයි, නියනට ගහන්න ලොකු දෙකේ දෙකේ පොල්ලකුයි විතරයි.ඉතිං සංජු වගේ ප්‍රොෆෙෂනල් බාස් කෙනෙකුට කබඩ් එක පිටිපස්සෙන් පොඩි හොර දොරක් කපන්න වැඩි වෙලාවක් ගියෙ නෑ.

දැන් තමයි හැමෝම බලාපොරාත්තුවෙන් හිටපු වෙලාව.ලයිමෝල්ගෙ කබඩ් එක ඇතුලෙ තියෙන්නෙ මොනවද කියලා බලන්න මේ වෙද්දි ඩෝම් එකේ හිටපු හැමෝම ඇවිල්ලලු.ඉතිං සුබ මොහොතින් සංජු හොර දොර ඇරියට පස්සෙ තමයි කට්ටිය දැක්කෙ ලයිමෝල් මෙච්චර කල් හංගගෙන හිටියෙ මොනවද කියලා.

කබඩ් එකේ එක කොනක තිබුනෙ පුස්කාපු කේක්, පුස් බිස්කට් වගේ දේවල්.පුස්කාපු නැති බිස්කට් පැකට් දෙකකුත් තිබුනා.අනිත් කොනේ තිබුනෙ සන්ලයිට් වගේ රෙදි හෝදන සබනුයි, ඇගේ ගාන සබනුයි මහ ගොඩක්.ඊට අමතරව මෑන්ස්ගෙ ඇදුම් පොත්පත් වගේ දේවල් තමයි තිබුනෙ.මදෑ ඉතිං කට්ටිය වටින දේවල් දකින්න බලාපොරොත්තුවෙන් මහා මිෂන් එකක් කොළා!

බලාගෙන යද්දි වෙලා තියෙන්නෙ මේකයි.ලයිමෝල් කියන්නෙ ඒ දවස්වල නියම ලෝබයා.ඉතිං ගෙදරින් හම්බවෙන කේක්, බිස්කට් වගේ කෑම අනිත් ළමයින්ට දෙන්න වෙයි කියලා හොරෙන් තනියම කන එක තමයි මෑන්ස්ගෙ වැඩේ.කෑවට පස්සෙ ඉතුරු කෑම පස්සෙ කන්න කියලා තමයි කබඩ් එකෙන් අරන් තියල තියෙන්නෙ.ඒත් මෑන්ස් කන සීඝ්‍රතාවයට වඩා වේගෙන් කෑම ලැබෙන නිසා අන්තිමට වෙන්නෙ කබඩ් එකේ කෑම ගොඩගැහෙන එක.ඉතිං ලයිමෝල් වෙන කාටවත් කෑම දෙන්නෙ නැති නිසා ඒවා ටික දවසක් යද්දි පුස් කනවලු.

ඒ වගේම මෑන්ස් ලෝබයා නිසා සබන් කෑලිත් අනිත් ළමයින්ගෙන් තමයි ගන්නෙ.ඉතිං අනිත් ළමයිනුත් පොර ගාව සබන් නැහැයි කියලා හිතලා තමන්ගෙ සබන් මෑන්ස්ට දෙනවා.අන්තිමට ලයිමෝල්ගෙ සබන් කන්ද ටික ටික ගොඩගැහෙනවා.මේ දේවල් අනිත් අයට මාට්ටු වෙනවට තමයි ලයිමෝල් තමන්ගෙ කබඩ් එකේ ඇතුල මෙච්චරකල් අනිත් අයගෙන් හංගලා තිබිල තියෙන්නෙ.

ඉතිං මෙහෙම කබඩ් එක චෙක් කර කර ඉන්න අතරෙ තමයි, මාලුකට්ටාගෙන් මැසේජ් එකක් ආවෙ ලයිමෝල් නාලා ඉවර බව.ඉතිං කට්ටිය වහාම හොර දොර වහලා තමන් හිටිය තැන් වලට ආපහු ගියාලු.ලයිමෝලුත් නාල ඇවිත් කබඩ් එකේ ඉබ්බා යහතින් ඉන්නවා දැකලා සැනසීමට පත්වුණාලු.ඊට පස්සෙ තමයි හොද සිද්දි ටිකක් වුණේ.අපි ඒ සිද්දි මොනවද කියලා රාත්‍රී ප්‍රහාරක බලකාය 4 (අවසාන) කොටසින් බලමුකො නේද?

ප.ලි - අපි කලින් ලිපියෙ කියපු සරුංගලේ අද සවස් යාමයේ කඩාගෙන යන ලදී.

Friday, August 20, 2010

සරුංගල් කාලේ 2 - The Kite Season 2

හරිනං අපි මේ වෙලාවෙ දාන්න ඕනෙ රාත්‍රී ප්‍රහාරක බලකාය 3 ලිපිය.ඒත් ඉතිං ඊට කලින් මේක දාන්නම හිතුනා.

අපේ යාලුවන්ට මතකයිනෙ අපි දාපු සරුංගල් කාලේ 1 ලිපිය?ඒකෙදි අපි කිව්වනෙ ගියපාර වගේම මේ පාරත් සරුංගලයක් හැදීම ගැන සලකලා බලන්න ඕනෙ කියලා.ඉතිං කිව්වා වගේම අපි ඒ ගැන සලකලා බැලුවා.ඒකෙ ප්‍රතිඵලයක් විදිහට තමයි මේ යට ඉන්න මොණර පැටියා හැදුනෙ


හික් හික්!! පැටියා කිව්වට ඉතිං ටිකක් විතර ලොකුයි.

පුරුපුරුයි, උපාසකයි, ඤාව්වයි තමයි කිතුල් ලී කපන්න ගියෙ.හැමදේම ඉස්සරට වඩා වෙනස්වෙලා.වෙනදා බලන බලන තැන් වල කිතුල් පැල.ඒත් මේ පාර බොහොම අමාරුවෙන් රබර් වත්ත පහල ඇළ දිගේ පැය දෙකක් සර්ච් කරලා තමයි කිතුල් පැළයක් හොයාගත්තෙ.ඊට පස්සෙ ඒකෙන් පිති දෙකක් කපාගෙන ආවා.ඒවා සුද්ද කරලා දවස් දෙකක් වේලුවා.ඒ පිත්තක් තමයි සරුංගලේ දික් ලීයට ගත්තෙ.

ඔය අතරෙ උණ බම්බුවකුත් හම්බවුණා.ඒක පලලා තමයි සරුංගලේ හරස් ලීයට ඕනෙ කරන කෝටුවක් හදාගත්තෙ.ඊට පස්සෙ ඉතිං පට්ටම බැදලා කොළ ඇලෙව්වා.හැබැයි ඒ වැඩ ටිකනං එච්චර ලේසි වුණේ නෑ.මොකද ඤාව්වටයි, උපාසකටයි මේ දවස්වල ෆුල් බිසී.ඒ නිසා ඒ දෙන්නට ඒවාට සහභාගි වෙන්න ලැබුනෙ නෑ.

ඊටත් පස්සෙ කඩෙන් රුපියල් 100 නයිලෝන් නූල් පන්දුවක් ගෙනාවා.ඒකෙ නූල් ගොඩක් තියෙනවා.අන්තිමට සේරුව දාලා සරුංගලේ යැව්වා.


ඔය පේන්නෙ නූල් වලින් බාගයක් දුන්නට පස්සෙ ගඩොල් මොණරා පේන හැටි.අන්තිමට ඩොට් වෙන සයිස් එකටම මෙයා උඩ ගියා.අද හවසනං වැස්ස හින්දා සරුංගලේට පොඩි නිවාඩුවක් දෙන්න තමයි සිද්ද වුණේ.ඇයි මැච් එකත් තිබුනනෙ.හෙට තවත් රුපියල් 100 නූල් පන්දුවක් ගෙනත් මෙයාව නොපෙනෙන්නම යවන්න තමයි කල්පනාව.

හැබැයි දැන් මාර ප්‍රශ්නෙ.පුරුපුරු අයියගෙ සරුංගලේ දැකපු කොල්ලො කුරුට්ටො සෙට් එකක් තමන්ටත් සරුංගල් හදලා දෙන්න කියලා ජාත්‍යන්තර බලපෑම් කර කර ඉන්නෙ.දැන් තීරණය කරන්න වෙනවා හෙට රාත්‍රී ප්‍රහාරක බලකාය 3 ලියනවද? නැත්තං සරුංගල් හදනවද? කියලා.

ඉස්සරනං අපේ කොල්ලො සෙට් එක එකට එකතු වෙලා, වෙලට ගිහිං තමයි සරුංගල් යවන්නෙ.ඒත් ඉතිං දැන් වෙලා තියෙන්නෙ තනියම ගෙදර මිදුලට වෙලා සරුංගල් යවන්න.කොහොමද දෙයියනේ අර පොඩි එවුන් මැද්දට ගිහිං පුරුපුරුත් සරුංගල් යවන්නෙ?හෙට උපාසකවත් ආවොත් වෙලට යනවා.එහෙනං දැනට ටටා.පුලුවන් තරම් ඉක්මනට රාත්‍රී ප්‍රහාරක බලකාය 3 ලියන්නත් ඕනෙ.

ප.ලි - අපේ බ්ලොග් පේජ් එකේ උඩ

"මෙ‍ම බ්ලොගයේ අඩංගු ඇතැම් ක්‍රියාකාරකම් ඔබ ප්‍රායෝගිකව සිදු කිරීමට නුසුදුසු මට්ටමේ ඒවාය.එසේ සිදු කිරීමට ගොස් ඔබට වන අකරතැබ්බ වලට බ්ලොග් හිමිකරු කිසිදු ආකාරයකින් හෝ වගකියනු නොලැබේ"

කියලා වාක්‍යයක් තියනවනෙ.ඉතිං ඕක පේජ් එක හරහා යන වේගෙ වැඩියි කියලා පහුගිය දවස්වල අපේ යාලුවො කීප දෙනෙක්ම කිව්වා.ඔය වෙලාවෙ අපිත් දැනගෙන හිටියෙ නෑ ඕකෙ ස්පීඩ් එක වෙනස් කරන විදිහ.ඉතිං ඒ මෙතඩ් එක අපිට කියල දුන්නෙ චානක අරුණ මුණසිංහ හෙවත් අපේ මකර අධිරාජයා.ඒ වෙනුවෙන් මකරාට ගඩොල් පූසන්ගෙ ස්තුතිය පළ කරන්නත් මේක අවස්ථාවක් කර ගන්නවා.

ඒ වගේම මූණුපොතේ අපේ යාලුවෙක් වෙන්නත් ඔය සමහර යාලුවො කැමති ඇතිනෙ.ඒ යාලුවන්ට මේ ලින්ක් එකෙන් ගිහින් අපේ මූණුපොතේ යාලුවෙක් වෙන්න පුලුවන්

http://www.facebook.com/profile.php?id=100001156986448

Thursday, August 19, 2010

හොස්ටල් ලයිෆ් - රාත්‍රී ප්‍රහාරක බලකාය 2


ඉතිං යාලුවනේ අපි කලින් ලිපියෙන් කිව්වනෙ රාත්‍රී ප්‍රහාරක බලකාය කොහොමද ලයිමෝල්ට ක්ෂණික ඇටෑක් එකක් දුන්නෙ කියලා.අද අපි කියන්න යන්නෙ මේ සීරීස් එකේ දෙවෙනි කොටස.

කොහොමහරි ඉතිං පහුවදාට එළිවුණාලු.දැන් පුරුපුරුලා දන්නවා ලෝඩ් කොක්ගෙ සෙට් එක කොයි වෙලාවෙ හරි තමන්ට ගේමක් දෙනව කියලා.හැබැයි උදේ වරුවෙනං ලෝඩ්ලගෙන් කිසිම රියැක්ෂන් එකක් පේන්න තිබුනෙ නෑ.ඉතිං රාත්‍රී ප්‍රහාරක බලකාය හිතුවෙ තමන්ට සටනට මුහුණ දෙන්න වෙන්නෙ රෑ කාලෙදි කියලලු.කට්ටිය එදා ඉස්කෝලෙ යන ගමන් කතා වුණෙත් ලෝඩ්ලගෙ ඇටෑක් එකට ෆේස් කරන ආකාරය ගැනලු.

ඉතිං ඔහොම කාලය ගෙවිල ගිහිං හවස් වරුවත් උදා වුණේ බොහොම ඉක්මනට.ඉස්කෝලෙ ගිහින් ආපු පුරුපුරු ලන්ච් එකටත් ගිහින් ආපහු ඩෝම් එකට ආවලු.ඊට පස්සෙ මෑන්ස් ඇදේ වාඩි වුණේ සපත්තු ගලවන්න හිතාගෙන.ඒත් එකපාරටම තමන්ගෙ පශ්චාත්භාගය තෙත්වෙලා යනවා වගේ දැනීමක් පුරුපුරුට ඇතිවුණාලු.එකපාරටම ඇදෙන් නැගිටපු පූසා ඊටපස්සෙ ඇද චෙක් කරලා බලද්දි මෙන්න බොලේ මුලු ඇදම අම්බානට තෙමිලා.වටපිටාවෙ බලද්දි තමයි මෑන්ස් දැක්කෙ රාත්‍රී ප්‍රහාරක බලකායෙ තවත් මෙම්බර්ස්ලා කීප දෙනෙක්ගෙම පස්සවල් තෙමිලයි කියලා.

බලද්දි වෙලා තියෙන්නෙ මේකයි.කවුරුහරි ගෝතයෙක් ලන්ච් එක වෙලාවෙ රාත්‍රී ප්‍රහාරක බලකායෙ සාමාජිකයන්ගෙ ඇදවල මෙට්ට වතුරෙන් තෙමලා.ඊටපස්සෙ ඒක උඩින් කලින් තිබුන බෙඩ්ෂීට් එකම දාලා.ඉතින් වාඩිවෙනකන් කාටවත් වැඩේ මීටර් වෙන්නෙ නෑ.අනිත් එක ඔය කොහු මෙට්ට තෙමුනම ලේසියෙන් වේලෙන්නෙත් නැහැ.ඉතිං මේ ත්‍රස්තවාදී ප්‍රහාරයෙ ප්‍රධාන සැකය එල්ලවුණේ ලෝඩ් කොක් බලකායට.පස්සෙ විශේෂ විමර්ශනයක් කරලා බලද්දි තමයි එළිවුණේ එදා ලන්ච් එකට පොන්ටින් සහ ලෝඩ් කොක් ඇවිත් නැති බව.ඉතිං රාත්‍රී ප්‍රහාරක බලකාය තීරණය කළාලු මේක ඊයෙ කරපු වැඩේට තමන්ගෙ ප්‍රතිවාදින්ගෙන් ආපු රිටර්න් එකක් කියලා.

ඊට පස්සෙ අපේ ‍යාලුවො කට්ටිය තීරණය කළේ තමන්ට කරපු අපහාසෙට එදා රෑටත් ලෝඩ්ලට ගේමක් දෙන්න ඕනෙ කියලා.ඉතිං ඔහොම වෙලාව ගිහිල්ලා රෑ කාලෙත් උදා වුණාලු.දැන් පුරුපුරුලයි, ලෝඩ්ලයි දෙගොල්ලොම දන්නවා අද රෑට මොකක් හරි විශේෂ දෙයක් අනිවා වෙනවා කියලා.ගොඩක් වෙලාවට ඒක මහා කොට්ට සංග්‍රාමයක් වෙන්න පුලුවන්.(තමන්ගෙ බැච් එකේ ළමයි එක්ක අතින් පයින් ගහගන්න එක නොහොබිනා වැඩක් කියල තමයි කට්ටිය සැලකුවෙ) ඉතිං රාත්‍රී ප්‍රහාරක බලකායනං හවස් වරුවෙ පොඩි ට්‍රේනින් සෙෂන් එකකුත් තිබ්බා.ලෝඩ් කොක් බලකාය මොනවා කළාද දන්නෙ නෑ.

ඔහොම වෙලාව ගිහින් රෑ එකොලහමාර විතර වුණා.ඔය අතරෙ කට්ටියට තිබුනෙ ස්ටඩි ටයිම්, ඩිනර් එක සහ ලේට් ස්ටඩි ටයිම් එක.ඉතිං ඔය වෙලාවල් වල සටන් කරන්න බෑ නොවැ!දැන් තමයි ගේමක් දෙන්න නියම වෙලාව.සුපුරුදු පරිදි ගරිල්ලා ඇටෑක් එකක් දෙන්න තමයි එදත් අපේ යාලුවො කතා වුණේ.ඉතිං කට්ටිය එක තැනකට හොරෙන් එකතු වෙලා ප්‍රී ඇටෑක් ඩිස්කෂන් එක තිබ්බා.දැන් තියෙන්නෙ ඇටෑක් එක ක්‍රියාත්මක කරන්න.හැබැයි තවමත් ඩෝම් එකේ ලයිට් ඕෆ් කරලා නැහැ.ඒ මදිවට පොන්ටිනුයි, ලෝඩ් කොකුයි ඩෝම් එක ඇතුලෙ පේන්නත් නැහැ.හැබැයි ලයිමෝල්නං ගොරව ගොරවා නිදිලු.

අපේ රාත්‍රී ප්‍රහාරක බලකායට මේ සීන් එක එච්චරම ඇල්ලුවෙ නෑලු.මොකද වෙනදට ලයිමෝල්ට ලයිට් දාලා තියෙද්දි නින්ද යන්නෙ නෑ.පුරුපුරුලා වැඩිපුර ටිකක් වෙලා ලයිට් දාල තිබුනත් ඒක ඕෆ් කරන්න කියලා බෙරිහන් දෙන එක තමයි මෑන්ස් කරන්නෙ.ඉතිං අපේ කට්ටිය කළේ සිටුවේෂන් රිපෝට් එකක් ගේන්න කියලා බුදධි අංශ ප්‍රධානියා වෙච්ච මාලුකට්ටව පිටත් කරල යවපු එක.මේ 11 වසර ඩෝම් එකේ තිබුන විශේෂ ලක්ෂණයක් තමයි ඇදන් සහ කබඩ් තිබුන විදිහට, ඒවා අස්සෙන් රිංග රිංග සතුරාට නොපෙනී ළගටම යන්න පුලුවන් වෙච්ච එක.

ඇදන් සහ කබඩ් තිබුන විදිහ
ඉතිං ටික වෙලාවකින් මාලුකට්ටා ඉන්ටෙලිජන්ස් රිපෝට් එක අරගෙන ආපහු ආවා.මෑන්ස් කියපු විදිහට ලයිමෝල් බොරුවට තමයි නිදාගෙන ඉදලා තියෙන්නෙ.පොන්ටිනුයි, ලෝඩ් කොකුයිත් ඩෝම් එක ඇතුලෙ ඉන්නවලු.පොන්ටින් වතුර බකට් එකක් තියාගෙන ලයිමෝල්ගෙ ඇද ළග හැංගිලා ඉන්නවලු රාත්‍රී ප්‍රහාරක බලකාය එතනට එද්දි ගහන්න.ඒ වගේම ලෝඩ් කොක් තවත් වතුර බකට් එකක් තියාගෙන හැංගිලා ඉන්නවලු ලයිට් එකේ ස්විච් එක තිබුන තැන.ඒ රාත්‍රී ප්‍රහාරක බලකායෙ කවුරුහරි ලයිට් ඕෆ් කරන්න ආවොත් ගහන්න.බලන් ගියාම ලයිමෝල්ව තමයි ඇම විදිහට පාවිච්චි කරල තියෙන්නෙ.

දැන් මේ වෙද්දි ඩෝම් එකේ ඉන්න අනිත් ළමයිනුත් දන්නවා සිද්දිය.කොයිකාගෙත් සපෝට් එක ඉතිං රාත්‍රී ප්‍රහාරක බලකායට තමයි.ඒක නිසා මාලුකට්ටාට බුද්ධි තොරතුරු රැස් කරන එක එච්චර අමාරු වැඩක් වෙලා නැහැ.

ඉතිං රාත්‍රී ප්‍රහාරක බලකාය තීරණය කළාලු තමන්ගෙ ඇටෑක් ප්ලෑන් එක වෙනස් කරන්න.ඒ අනුව පුරුපුරුයි අමන්දානන්දයි එක පැත්තකින් ලයිමෝල්ගෙ ඇදට කිට්ටු කළාලු.ඒ වගේම වන්නියයි බෝරෙයි යුගලෙයි, මුදලාලියි සෝමෙ අයියයි යුගලෙයි, තවත් පැති දෙකකින් ලයිමෝල්ගෙ ඇදට කිට්ටු කළාලු.හැබැයි කිට්ටු කළේ නිකං නෙවෙයි, ජාතික ආයුදේ වෙන කොට්ටෙත් අරගෙන.

දැන් තියෙන්නෙ ලයිට් ඕෆ් කරලා ඇටෑක් එක දෙන එක.මොකද දැන් පුරුපුරුලා තමන්ගෙ ප්‍රතිවාදියො ඉන්න තැන් දන්න නිසා කලුවරේම වුණත් ගේම දෙන්න පුලුවන්.ඒ වගේම පොන්ටින්ලා රාත්‍රී ප්‍රහාරක බලකාය ස්ථානගත වෙලා ඉන්න තැන් දන්නෙ නැති නිසා, එතකොට මෑන්ස්ලට කලුවරේ හිතාගන්න බෑ මොකද්ද වෙන්නෙ කියලා.හැබැයි ලයිට් ඕෆ් කළේ නැත්තං පොන්ටින්ලට පුරුපුරුලව හොදට පේනවා.එහෙම වුණොත් ඉතිං වතුර නාලා තමයි නවතින්න වෙන්නෙ.ඒත් ඉතිං ලෝඩ් කොක්ට නොපෙනී ස්විච් එක තියෙන තැනට යන්නෙ කොහොමද?

ඉතිං අපේ රාත්‍රී ප්‍රහාරක බලකාය මේ ප්‍රශ්නෙ විසදන්න අපූරු උපායක් යෙදුවලු.ඒ තමයි මාලුකට්ටව යවලා ඩෝම් එකට කරන්ට් එක දෙන මේන් ස්විච් එක ඕෆ් කරන එක.ඉතිං මෑන්සුත් නිකං වෙන වැඩකට එළියට යනවා වගේ ගිහිල්ලා මේන් ස්විච් එක ඕෆ් කළාලු.ඒ එක්කම 10, 11 වසරවල ඔක්කොම ඩෝම් වල කරන්ට් එක ගියාලු.වහාම ක්‍රියාත්මක වෙච්ච රාත්‍රී ප්‍රහාරක බලකාය, ලෝඩ් කොක් බලකායට තමන්ගෙ මාරාන්තික කොට්ට ඇටෑක් එක දුන්නලු.

ඩෝං.....ඩෝං.....ඩෝං.....ඩෝං.....ඩෝං.....ඩෝං.....ඩෝං.....ඩෝං.....

ලෝඩ් කොක් බලකායට හිතාගන්න බැහැ කොහෙන්ද ඇටෑක් එක එන්නෙ කියලා.
රාත්‍රී ප්‍රහාරක බලකායටත් හිතාගන්න බෑ තමන් මෙච්චර ලොකු ඇටෑක් එකක් දෙනවද කියලා.ටික වෙලාවකින් බලද්දි තමයි කට්ටියට තේරුනේ රාත්‍රී ප්‍රහාරක බලකායට අමතරව තව වොලන්ටියර්ස්ලා කීප දෙනෙකුත් ඇටෑක් එකට සෙට් වෙලයි කියලා.ඒ ලෝඩ් කොක් බලකායත් එක්ක ෆ්ලවර් ජම්ප් වෙලා හිටපු ස්ටඩි සෙට් එකේ කීපදෙනෙක්.

කොහොම හරි ලෝඩ් කොක්ලාට හොදට බැස්ටිය දුන්න අපේ යාලුවො සෙට් එක කලුවරේම දුවලා ගිහිං ඇදන් වලට නැග්ගලු.ඒ එක්කම මාලුකට්ටා ආපහු මේන් ස්විච් එක දැම්මලු.දැන් ලයිට් ඇවිත්.ලෝඩ් කොක් බලකාය වටපිට බලද්දි ගහපු එවුන් එක්කෙනෙක්වත් පේන්න නෑ.හැමෝම නිදි.වතුර පුරවපු බාල්දි වලින් වැඩක් ගන්නත් බැරි වුණා නොවැ!ඉතිං රාත්‍රී ප්‍රහාරක බලකායට පස්සෙ වෙලාවක ගේමක් දෙනවා කියල හිතපු ලෝඩ් කොක්, පොන්ටින් සහ ලයිමෝල් නින්දට ගියාලු.

පුරුපුරුලා ඇදට පැන්නට මොකද, ඇදන් තවම තෙතයිනෙ.ඉතිං කට්ටියට නින්ද යන්නෙ නෑ.මේ වෙද්දි ලෝඩ් කොක්ලා ඇත්තටම ගොරව ගොරවා නිදි.ඉතිං නැගිටලා හිටපු රාත්‍රී ප්‍රහාරක බලකායෙ කට්ටියට මතක් වුණාලු ලෝඩ් කොක් බලකායෙ කට්ටිය ගෙනාපු, අර වතුර පුරවපු බාල්දි ටික.අපේ පැරකුම්බා මහරජතුමත් කියල තියෙන්නෙ අහසින් වැටෙන එක දිය බිදක්වත් අපතේ යවන්න එපා කියල නොවැ!ඉතිං වතුර බාල්දි පිටින් අපතේ යවන එක එහෙම බලද්දි මහම පවුකාර වැඩක්.ඒ හින්දා රාත්‍රී ප්‍රහාරක බලකාය තීරණය කළාලු ඒ වතුර අපතේ නොයවා ලෝඩ්ලාට ස්නානයක් ලබල දෙන්න.

ඉතිං කට්ටිය කළේ හොරෙන් හොරෙන් ගිහිල්ලා අර වතුර බාල්දිවල තිබුන "පිරිසිදු" වතුර ටික ‍ලෝඩ් කොක්ගෙ සහ පොන්ටින්ගෙ නෙට් උඩට වක්කරන එක.පිරිසිදු කියලා කිව්වෙ මේ බකට් බොගේ තිබිලා අරගෙන ආපුවා හින්දා.ලයිමෝල්ට කලින් දවසෙත් ඇටෑක් කරපු නිසා මෑන්ස්ට මොනවත් කළේ නැහැ.අනික ලයිමෝල් කොහොමත් නාන්න ටිකක් හොරයි.

මේ නෙට් එක උඩට වතුර වක්කරාම ඇතුලෙ ඉන්න මනුස්පයා දෙපාරක් නානවා.පළවෙනියට නාන්නෙ අර මුලින්ම ඇගට වැටෙන මහ වතුර කන්දරාවෙන්.ඊට පස්සෙ නාන්නෙ නෙට් එකේ රැදිලා තිබිලා වැටෙන වතුර බින්දු වලින්.නෙට් එක හදලා තියෙන දැල් රෙද්දෙන් වතුර වැටෙන්නෙ හරියට ස්වභාවික වැස්සක් වහිනවා වගේ.ඉතිං යාලුවො දෙන්නට ස්වභාවික වැස්සක් වස්සපු අපේ රාත්‍රී ප්‍රහාරක බලකාය වහාම එතනින් අතුරුදහන් වුණාලු.

පහුවදා වෙද්දි කට්ටියටම ‍තේරුම් ගිහිං තිබුනෙ ගැටුම් වලින් ප්‍රශ්න විසදන්න අමාරුයි කියලා.ඉතිං ලෝඩ් කොක් සහ පුරුපුරු ද්විපාර්ශවීය සාකච්ඡා පවත්වලා තීරණය කළාලු සාමයේ පරවියා ඩෝම් එකට ගේන්න.ඒ අනුව රාත්‍රී ප්‍රහාරක බලකාය සහ ලෝඩ් කොක් බලකාය විසුරුවා හරින්නත් කට්ටිය එකග වුණාලු.ඉතිං ඔයින් මෙයින් වුණේ දෙගොල්ලො හොද යාලුවො බවට පත්වෙච්ච එක.

හැබැයි මේ සාමකාමී තත්ත්වෙ හැමදාටම තියෙන්න ඇද්ද? ඊට පස්සෙ මෙකද වුණේ? රාත්‍රී ප්‍රහාරක බලකාය 3 කොටසෙන් අපි කියන්නං මේ ගැන.

Wednesday, August 18, 2010

හොස්ටල් ලයිෆ් - රාත්‍රී ප්‍රහාරක බලකාය


ඉතිං යාලුවනේ දැන් අපේ පුසො ඉන්නෙ 11 වසරෙ නොවැ! ඒ කියන්නෙ හොස්ටල් එකෙත් කට්ටිය දැන් ඉන්නෙ අලුත් ඩෝම් එකක.අලුත් 11 වසර ඩෝම් එක 10 වසර ඩෝම් එකට වඩා ගොඩක් ලොකුයි.ඕන තරං ඉඩත් ඉතුරුයි.මොකද පුරුපුරුලගෙ බැච් එකේ හිටියෙ විසිපස් දෙනයිනෙ.කොටින්ම කියනවනං ඩෝම් එක ඇතුලෙ වන් බම්ප් ක්‍රිකට් ගහන්නත් කට්ටියට පුලුවන්කම ලැබුනා.ඉතිං කලින් අවුරුද්දෙ වගේම මේ අවුරුද්දෙත් පුරුපුරු හිටියෙ ජනේලයක් අයිනෙ තිබුන ඇදකලු.හැබැයි මේ පාරනං ගියපාර වගේ නෙවෙයි, මෑන්ස් කැමැත්තෙන්මයි ප්ලේස් එක තෝරගත්තෙ.

11 වසරට යද්දි දන්න කියන හැම බැච් එකකටම වුණ සන්තෑසියක් තමයි බැච් එක කෑලි කෑලි වලට කැඩිල යන එක.ඒ කියන්නෙ ඔය කැම්පස් වල වගේ වෙන වෙනම කටයුතු කරලා ගහ මරා ගැනිල්ලක් නෙවෙයි.මොන දේ කළත් බැච් එකම එකට ඉන්නවා.මෙතන බැච් එක කැඩෙනවා කියලා අදහස් කළේ මතවාදී වශයෙන් බෙදෙන එකට.හැබැයි ඉතිං සමහර වෙලාවට ඔය මතවාදී ගැටුම් දුරදිග ගිය වෙලාවලුත් නැතුවාමත් නෙවෙයි.

11 වසරෙදි හැම බැච් එකක්ම සංගීත ප්‍රසංගයක් පවත්වන්න ඕනෙ.මේ සංගීත ප්‍රසංගයෙ නම තමයි "මි"යන්න.ඉතිං පුරුපුරුලගෙ බැච් එකත් ඔය විදිහට මහා පරිමාණයෙන් "මි"යන්න පැවැත්තුවලු.ගායනය වගේම වාදනයත් හොස්ටල් එකේ ළමයින්ගෙන්මයි.මේ "මි"යන්න ගැන වෙනම ලිපියක් පස්සෙ වෙලාවක දාන්නංකෝ.ඉතිං "මි"යන්න ඉවර වුණාට පස්සෙ තමයි හොදට තිබුන බැච් එක ටික ටික දෙදරලා යන්න පටන් ගත්තෙ.


කොහොම හරි ටික දවසක් යද්දි වෙන වෙනම සෙට් හතරක් 11 වසරෙ බැච් එක ඇතුලෙ හිටියා.ජුවාන්, පොල්පොට්, සලා, සකයා, සංජු, බටිල්ලා අයිති වුණේ "ආතල්" සෙට් එකට.මේ කට්ටියට ලෝකෙ පෙරලුනත් ගානක් නෑ.තමන්ගෙ පාඩුවෙ ආතල් එකේ තමයි ඉන්නෙ.


ඊළග සෙට් එක තමයි "ස්ටඩි" සෙට් එක.මේ සෙට් එකට අයිති වුණේ වවුලා, සෙන්සිටිව්, මැණික්, පැන්ඩා, හොං කොං, තාරාවා වගේ කීපදෙනෙක්.නමේ හැටියටම මේ අයගෙ ප්‍රධාන වැඩේ වුණේ අධ්‍යාපනය.අනික් ඒවා ඊට පස්සෙ.


ඊළග සෙට් එක තමයි පුරුපුරුලගෙ සෙට් එක.මේ සෙට් එකේ හිටියෙ පුරුපුරු, මාලුකට්ටා, වන්නියා, අමන්දානන්ද, මුදලාලි, සෝමෙ අයියා සහ බෝරෙ.මේ අයත් ඉතිං ‍ලක්ෂණ වලින් ගොඩක් කිට්ටු ස්ටඩි සෙට් එකට වඩා ආතල් සෙට් එකට.


අන්තිම සෙට් එක තමයි ලෝඩ් කොක්ගෙ සෙට් එක.මේ සෙට් එකේනං හිටියෙ තුන් දෙනයි.ඒ තමයි ලෝඩ් කොක්, පොන්ටින් සහ ලයිමෝල්.ඒ වගේම ඔය කිව්ව එක සෙට් එකකටවත් අයිති නැති ළමයිනුත් කීප දෙනෙක් හිටියා.


ඉතිං මෙහෙම සෙට් වලට බෙදිල හිටියත් හැමෝම බොහොම සහයෝගයෙන් ප්‍රශ්නයක් නැතුව තමයි හිටියේ.කෑවෙ බිව්වෙ, සෙල්ලං කළේ එකට.ඔය සෙට් භේදය මතුවුණේ හොස්ටල් එකෙන් හොරෙන් එළියට පනිද්දි වගේ වැඩ වලදි.එක සෙට් එකක් කවදාවත් සෙට් එකෙන් පිට කෙනෙක්ව ඔය වගේ වැඩ වලට එකතු කරගත්තෙ නැහැ.හැබැයි මුලින්ම කියපු සෙට් තුනම ලෝඩ් කොක්ගෙ සෙට් එකත් එක්ක තරහින් හිටියෙ.මේකට හේතුව වුණේ ලෝඩ් කොක්ගෙ ඒ දවස්වල තිබුන පණ්ඩිත වැඩයි, පොන්ටින්ගෙ අයහපත් කල්ක්‍රියාවයි.


විශේෂයෙන්ම පුරුපුරුලගෙ සෙට් එකයි, ලෝඩ් කොක්ගෙ සෙට් එකයි අතරෙ බරපතල විදිහට මත ගැටුම් ඇතිවෙන්න වැඩි කල් ගතවුණේ නෑ.ටික දවසක් යද්දි මේ මත ගැටුම් වලියක් යන මට්ටමටම දුර දිග ගියා.ඉතිං ලෝඩ් කොක්ගෙ සෙට් එකත් එක්ක තරහ පිට හිටපු අනිත් කට්ටියත් කළේ පුරුපුරුලගෙ සෙට් එකට සහයෝගය දුන්න එක.

ඔය අතරෙ තමයි තීරණාත්මක් සිද්දියක් වුණේ.ඩෝම් එකේ වැඩිය කට්ටිය නැති වෙලාවක ලෝඩ් කොක්ගෙ සෙට් එක මාලුකට්ටගෙ ඇග වැහෙන්න බෙඩ් ෂීට් එකක් දාලා මෑන්ස්ට තඩිබාලා තිබුනා.ඉතිං මේ සිද්දිය නිසා පුරුපුරුලගෙ සෙට් එක හිතේ අමාරුවෙන් තමයි හිටියෙ.ඔහොම ඉන්න අතරෙ තමයි මාලුකට්ටගෙ කබඩ් එකේ හුණු වලින් මෙතන කියන්න බැරි මට්ටමේ රුවන් වැකියක් ලියවිලා තිබුනෙ.ඉතිං ඕක කළේලෝඩ් කොක්ගෙ සෙට් එක කියලා ඔප්පු කරන්න බැරිවුණත්, පුරුපුරුලා දැනගෙන හිටියා ඔය වැඩේ කළේ ඒ අයමයි කියලා.


ඉතිං පුරුපුරුලගෙ සෙට් එක තීරණය කළාලු ලෝඩ් කොක්ගෙ සෙට් එකට විරුද්ධව වහාම නැගී සිටින්න ඕනෙ කියලා.එදා රෑ කට්ටිය සෙට් වෙලා මේ ගැන ඩිස්කෂන් එකක් දැම්මලු.එතනදි තීරණය වුණේ ලෝඩ් කොක්ලා වගේම පුරුපුරුලත් තමන්ගෙ හතුරන්ට විරුද්දව කොමාන්ඩෝ ගේම් දෙන්න ඕනෙ කියලා.ඉතිං එදා රෑම කට්ටිය "රාත්‍රී ප්‍රහාරක බලකාය" පිහිටෙව්වලු.

රාත්‍රී ප්‍රහාරක බලකායෙ අරමුණ තමයි සතුරාට නොදැනී ගිහිල්ලා ක්ෂණික ප්‍රහාර එල්ල කරලා ආපහු එන එක.ඉතිං නමේ තියනවා වගේම ඇටෑක් එකට යොදාගත්තෙ රෑ කාලය.මුල්ම ඇටෑක් එක කරන්න තීරණය වුණේ ලයිමෝල්ට විරුද්ධව.මොකද මෑන්ස් තමයි ලෝඩ් කොක්ගෙ සෙට් එකේ බුද්ධි අංශ ප්‍රධානියා.ඒ කියන්නෙ පුරුපුරුලා කතා කරන ඒවා හොරෙන් අහගෙන ඉදලා ලෝඩ් කොක්ටයි, පොන්ටින්ටයි රිපෝට් කරන්නෙ ලයිමෝල්.

ඉතිං මේ වෙද්දි ලෝඩ් කොක්ගෙ සෙට් එක, පුරුපුරුලා තමන් කරපු දේට විරුද්දව මොකක් හරි ඇටෑක් එකක් දෙයි කියලා බලාපොරොත්තුවෙන් හිටියෙ.ඒක පුරුපුරුලත් දැනගෙනයි හිටියෙ.ඉතිං ලයිමෝල්ට විරුද්දව දෙන ඇටෑක් එක ගොඩක් පරිස්සමෙන් කරන්න ඕනෙ කියලා රාත්‍රී ප්‍රහාරක බලකාය දැනගෙන හිටියා.


එදත් සුපුරුදු විදිහට ලයිට් ඕෆ් කරලා කට්ටිය නිදාගත්තා.ඊට පස්සෙ කතා කරගත්තු විදිහට රාත්‍රී ප්‍රහාරක බලකාය පුරුපුරුගෙ ඇද ළගට එකතු වුණා.මුලින්ම කළේ රාත්‍රී ප්‍රහාරක බලකායෙ බුද්ධි අංශ ප්‍රධානී මාලුකට්ටව ඔත්තු බලන්න යවපු එක.මෑන්සුත් ඇදන් අස්සෙන් බඩගාගෙන ලයිමෝල්ගෙ ඇද තිබුන හරියට ගියා.ලයිට් ඕෆ් කළාට යන්තම් වටපිටාව පේන ගානට එළියක් ඩෝම් එක ඇතුලෙ තිබුනා.මොකද ඉතිං කොළඹ කියන්නෙ රෑට සම්පූර්ණයෙන් කලුවර වෙන නගරයක් නෙවෙයි නොවැ!


ටික වෙලාවකින් මාලුකට්ටා ආපහු ආවා.බුද්ධි වාර්තා අනුව ලයිමෝල් ගොරව ගොරව නිදිලු.කොහොමත් ලෝඩ් කොකුයි, පොන්ටිනුයි හිටියෙ ඩෝම් එකේ වෙන කෙළවරක.ඒක හින්දා ලයිමෝල් කියන්නෙ ඊසි ටාගට් එකක්.දැන් තමයි රාත්‍රී ප්‍රහාරක බලකාය ක්‍රියාත්මක වෙන්න ඕනෙ වෙලාව.ඉතිං කට්ටියම තමන්ගෙ ආයුධ ටික ලෑස්ති කර ගත්තලු.


ආ.. කියන්න අමතක වුණානෙ.පුරුපුරුලගෙ බැච් එකේ හැම ළමයෙකුටම වගේ කොට්ට දෙක ගානෙ තිබුනා.එකක් නිදාගන්න පාවිච්චි කරන්න.අනික ආයුධයක් විදිහට.ඒ කියන්නෙ කොට්ට පොර වලට.හැම මා‍ස දෙක තුනකට පාරක්ම ඩෝම්ු එක ඇතුලෙ පැවැත්වෙන කොට්ටපොර ටූනමන්ට් එකට සහභාගි වෙන්න කියලා හැමෝම තමන්ගෙ කොට්ට ආයුදේ ලස්සනට හදාගෙනයි තිබුනෙ‍.පුරුපුරුගෙ කොට්ටෙත් යටට පුලුන් ඇට පුරවලා නියම යගදාවක් වගේ හදාගෙනයි තිබුනෙ.ඒකෙන් එක පාරක් හරියට කෑවොත් ඉතිං වන්ෂොට් නොකවුට්.

රාත්‍රී ප්‍රහාරක බලකාය පස්සෙ කාලෙක ප්‍රසිද්දියේ එල්ල කරන ප්‍රහාරයක් (2003).රතුපාට බොටමක් ඇදගෙන ඉන්නේ පුරුපුරු
ඉතිං ඊටපස්සෙ කොට්ට ආයුධ ටික ගත්තු රාත්‍රී ප්‍රහාරක බලකාය ඇදන් අතරින් රිංගලා ගිහින් පැති කීපෙකින් ලයිමෝල්ගෙ ඇද වට කළාලු.මෙහෙම යද්දි කට්ටියට යන්න වුණේ බිම දිගේ බඩගාගෙන.මොකද කවුරුහරි කෙනෙක් තවමත් නිදි නැතුව ඇහැරිලා ඉදලා පුරුපුරුලව දැක්කොත් ඒක මිෂන් එකට බාධාවක් වෙන්න තිබුනා.


දැන් රාත්‍රී ප්‍රහාරක බලකාය ප්‍රහාරයට සියල්ල සූදානම්! ඉතිං හොරෙන් හොරෙන් ඉස්සරහට ගිය අමන්දානන්ද ලයිමෝල් ඇදට දාල තිබුන නෙට් එක ගැලෙව්වලු.ඒ එක්කම පුරුපුරු දුන්න සිග්නල් එකට අනුව ඉතුරු හය දෙනාම තමන්ගෙ කොට්ට වලින් නිදාගෙන හිටපු ලයිමෝල්ට දරුණු ප්‍රහාරයක් එල්ල කළාලු.කොහොම හරි මේ වැඩේට විනාඩියක් විතර යන්න ඇති.දැන් ලයිමෝල්ට මොකද්ද වෙන්නෙ කියලා හිතාගන්න බෑ.හතර අතින් කුලුගෙඩි වගේ කොට්ට පාරවල් වැදෙද්දි තමයි පොර නින්දත් නොනින්දත් අතර තත්ත්වෙකින් ඇස් දෙක ඇරියෙ.

මේ වෙද්දිත් ලයිමෝල්ට හිතේ හැටියට තඩිබාලා හිටපු රාත්‍රී ප්‍රහාරක බලකාය මෑන්ස් ඇස් අරිද්දිම කලුවර අතරින් අතුරුදහන් වුණේ විදුලි වේගෙන්.ඉතිං ඔලුව උස්සලා ලයිමෝල් වටපිට බලද්දි මෑන්ස්ගෙ ඇද කිට්ටුවකවත් ගහපු මනුස්පයෙක් හොයාගන්න නෑ.පොර ඊට පස්සෙ නැගිටලා ගිහින් ලයිට් එක දාල බලද්දි මුලු ඩෝම් එකම නිදි.ඒ කියන්නෙ අපේ බලකායෙ කට්ටියත් හොරාට නිදි.දැන් ඉතිං කට්ටියට කරපු මිෂන් එකටත් වඩා අමාරු හිනාව තද කරගෙන ඉන්න එකලු.

කොහොමහරි ඉතිං ටික වෙලාවක් තමන්ට ඇටෑක් කරපු එවුන්ගෙ අම්මලාට පින් දිදී හිටපු ලයිමෝල් ආපහු ගිහිං නිදා ගත්තලු.ඊට පස්සෙ පුරුපුරුලත් නිදාගත්තලු.

පහුවදා මොකද වුණේ? අපි යාලුවනේ ඒ ගැන ඊළග ලිපියෙන් බලමුකො නේද?

Tuesday, August 17, 2010

හා ද? බෑ ද?


ඉතිං යාලුවනේ අද ඉදන් අපි අපේ පූසො 11 වසරෙදි ෆේස් කරපු සිද්දි කියන්න පටන් ගන්නවා.අපි මුලින්ම කියන්න යන්නෙ අපේ උපාසකට වෙච්ච සිද්දියක්.මේකට සම්බන්ධ පූසන්ගෙම වයසෙ ගෑනු ළමයෙක්.මේ ගෑනු ළමයා ඉගෙන ගත්තෙ කොළඹ දෙලොවක් අතර බාලිකාවෙලු.

අපි කවුරුත් ඕ ලෙවල් කරද්දි සෞන්දර්ය විෂයක් තෝරගන්න එපැයි.ඉතිං සංගීතෙ කරලා හොදටම නසරාණි වෙලා හිටපු පුරුපුරු සහ උපාසක මේ සෞන්දර්ය විෂය විදිහට තෝරගත්තෙ ඉංග්‍රීසි සාහිත්‍ය විෂය.සිංහලෙන්ම කියනවනං "ලිට්".ඒ වගේම නැටුම් කර කර හිටපු මාලුකට්ටත් නිකං ඇගපත තලාගන්නෙ මොකටද කියල හිතලා ලිට් වලට එකතු වුණාලු.හැබැයි ඤාව්වානං කර කර හිටපු චිත්‍ර විෂය දිගටම කරගෙන ගියාලු.ඒ වුණාට මෑන්සුත් ඔප්ෂනල් සබ්ජෙක්ට් එකක් විදිහට තෝරගත්තෙ ලිට් කරන එක.ඉතිං පූසො සෙට් එක ලිට් වලට ක්ලාස් ගියෙ අර බියර් බීපු පන්තියට.

හැබැයි 11 වසරට එනකොට ඉංග්‍රීසි සාහිත්‍ය ගැන තිබුන නොලේජ් එකේ හැටියට තවත් පන්තියකට යන්න වෙන බව උපාසක තේරුම් ගත්තලු.ඉතිං මෑන්ස් කළේ ගම්පහ ජයවඩන සර්ගෙ ඉංග්‍රීසි සාහිත්‍ය පන්තියටත් ගිය එක.මේ පන්තිය තිබුනෙ සෙනසුරාදා හවස, ගල් වලින් හදපු පල්ලියක් තියෙන පාරකලු.

උපාසකත් ඉතිං පළවෙනි දවසෙම සුපුරුදු විදිහට අන්තිම පේළිය හොයලා ඒකෙන් ඉදගත්තා.ටික වෙලාවකට පස්සෙ එහා පැත්තෙන් හිටපු ළමයත් එක්ක ෆිට් වෙන්නත් මෑන්ස්ට පුලුවන් වුණා.පොරගෙ නම දසුන්.ඔය සමහර කොල්ලො ඉන්නවනෙ තමන්ගෙ යාලුවට මොකක් හරි උදව්වක් කරන්න ඕනෙ කියලා හිතුනොත් යාලුවා කැමති වුණත් අකමැති වුනත් කොහොම හරි ඒ උදව්ව කරන.ඉතිං දසුන් කියන්නෙත් ඒ වගේ කොල්ලෙක්.අපි එහෙම කියන්නෙ ඇයි කියලා අපේ කියවන යාලුවන්ට තව පොඩ්ඩකින් තේරෙයි.

ඔය දසුන් ඉස්කෝලෙ ගියෙ ලොකුනමට.ඉතිං අපේ ඤාව්වත් ඔය ඉස්කෝලෙ හින්දා උපාසක දසුන්ගෙන් අහල බැලුවලු ඤාව්වාව දන්නවද කියලා.බැලින්නං දසුනුයි ඤාව්වයි ඉස්කෝලෙ එකම පන්තියෙ හිටපු හොද යාලුවො.ඉතිං එදා දවස ඉවර වෙද්දි දසුන් එක්ක විතරක් නෙවෙයි, ඒ පේළියෙ හිටපු ඔක්කොම කොල්ලො එක්ක ෆිට් වෙන්න උපාසකට පුලුවන් වුණාලු.ඊට පස්සෙ සතියෙත් උපාසක ඇවිත් වාඩිවුණේ දසුන්ලගෙ සෙට් එකත් එක්කමයි.

දැන් පන්තියෙ සර් උගන්නනවා.අපේ යාලුවො පිටිපස්සෙ පේලියට වෙලා කතාව

දසුන් :- මචං උපාසක, උඹට කෙල්ලෙක් ඉන්නවද?

අපේ උපාසකත් ඉතිං හොදටම පිස්සු පූසෙක්.ඒ දවස්වල පිස්සු වැඩ කර කර ඉන්නවා මිසක් කෙල්ලො වෙනුවෙන් වැය කරන්න මෑන්ස්ට එච්චර වෙලාවක් තිබුනෙ නෑ.ඉතිං උපාසකත් මෑන්ස්ට කෙල්ලෙක් නෑ කියලා උත්තර දුන්නලු.

දසුන් :- අවුලක් නෑ බං! අපි පස් දෙනා මේ ක්ලාස් එකේ ඉන්න කෙල්ලො පස් දෙනෙක්ට ට්‍රයි.උඹත් හොද කෙල්ලෙක් බලලා තෝරගනිං.අපි ෆුල් සප් එක දෙන්නං.

මෙහෙම කියපු දසුන්, සෙට් එකේ කොල්ලො පස් දෙනා ට්‍රයි කරන කෙල්ලන්ව උපාසක‍ට පෙන්නලා ඒ ඇරෙන්න ඕනෙ කෙල්ලෙක්ව පෙන්නන්න කිව්වලු.ඉතිං උපාසක‍ මුලු ක්ලාස් එකම දෙතුන් පාරක් ස්කෑන් කරල බැලුවත් හිතට අල්ලලා යන තැනක මීටරේ නැවතුනේ නැති නිසා වැඩේ අතඇරලා දාන්න තීරනය කළාලු.උපාසක‍ වැඩේ අතෑරියත් දසුන් කීයටවත් වැඩේ අතඅරින්න සූදානම් වුණේ නෑ.ඉතිං මෑන්සුත් පටන් ගත්තලු ක්ලාස් එක ස්කෑන් කරන වැඩේ.

දසුන් :- මචං අර බලපං මගෙ එක්කෙනාට එහා පැත්තෙන් ඉන්න කෙල්ල.එයාගෙ නම ශානි.දෙලොවක් අතර බාලිකාවට යන්නෙ.එයා ලස්සන නැද්ද? පොඩ්ඩක් ලයින් පාරක් දාල බලපං...

බැලින්නං උපාසකගෙ ස්කෑනරේට අහු නොවිච්ච කෙල්ලෙක් ක්ලාස් එකේ අයිනක යාලුවොත් එක්ක හිනාවෙවී ඉන්නවලු.මේ ගෑනු ළමයව දැක්ක පාර උපාසකටත් හිතුනලු පොඩි ට්‍රයි එකක් දාල බැලුවොත් හොදයි කියලා.හැබැයි ඉතිං මෑන්ස්ට මේ සම්බන්ධයෙන් එච්චරම උනන්දුවක් තිබුනෙ නෑ.අනිත් සතියෙ ක්ලාස් එකට එද්දි පොරට ශානි ගැන මතක නැහැලු.පිස්සු නට නටා ඉන්න එකමලු වැඩේ.මේක දැකපු දසුන්ට ටිකක් ෆ්ලවර් ජම්ප් වෙලා.

දසුන් :- බලපං බං! ඔහොම පුලුවන්ද කෙල්ලෙක් දාගන්න?උඹ කාඩ් එක කුඩු කරගන්නවනෙ. උඹට බැරිනං පැත්තකට වෙලා හිටපං.අපි උඹට විස්තර හොයල දෙන්නං.

දැන් උපාසක කොච්චර ඕනෙ නෑ කිව්වත් දසුන් කියන දේ අහන්නෙ නෑ.පොරගෙ ඒකායන අරමුණ උපාසකට ‍ශානිව යාලු කරල දෙන එක.ඉතිං දසුන්ගෙ සෙට් එකම දැන් උපාසක වෙනුවෙන් බැහැල වැඩලු.කට්ටියම ශානිගෙ අවධානෙ ගන්න මහන්සි වෙනවා.හැබැයි උපාසක ඇරෙන්න.

ක්ලාස් පටන් ගන්න කලින් කට්ටිය මගට වෙලා උපාසකවත් තියාගෙන ශානි එනකං බලාගෙන ඉන්නවලු.ඒ වගේම ක්ලාස් ඉවරවෙලා ශානි ගම්පහ බස්ටෑන්ඩ් එකට යද්දි කොල්ලො සෙට් එක උපාසකවත් ඇදගෙන පස්සෙන් යනවලු.ඉතිං මේ විදිහට මාසයක් දෙකක් ගියාට පස්සෙ දසුන්ගෙ සෙට් එකටත් මේ වැඩේ අම්බානට බෝරිං වෙලා.ඇයි ඉතිං ඒ අයට උනන්දුව තිබුනට අපේ උපාසකට මේ ගැන තඹ දොයිතුවක උනන්දුවක් නෑ නොවැ!

ඔහොම කාලෙ ගිහිල්ලා එක දවසක් පන්ති ඉවරවෙලා කට්ටිය බස්ටෑන්ඩ් එකට යද්දි, ශානි ඉන්නවලු බස්ටෑන්ඩ් එක ගාව තියන නිමාකා ෆුඩ් ෂොප් එක ඉස්සරහට වෙලා.මේක දැකපු ගමන් දසුන්ගෙ ඇල්මැරිලා තිබුන උනන්දුව එකපාරටම ආයෙත් මතුවෙලා ආවලු.

දසුන් :- අන්න මචං ශානි ඉන්නවා!අදනං උඹ ගිහිං ඒකිගෙන් අහන්නම ඕනෙ.

උපාසක :- අදනං බෑ මචං! ඕනෙනං වෙන දවසක අහමුකො.

දසුන් :- ඇයි උඹ මේකිගෙන් අහන්න නැකැත් බලනවද? මගෙන් හොදවයින් දෙකක් අහගන්නෙ නැතුව ගිහිං අහල දාපං!

උපාසක :- ඕනෙ නෑ බං, අතඇරලා දාමු. මට බෑ මුංගෙ ගණන් බලන්න.

දසුන් :- අනේ පලයං බං යන්න.උඹ ඒකිගෙන් අහන්න බයයිනෙ.

උපාසක :- බය නෑ බං.ඇහුවම මුංගෙ බොරු ගනන් බලන්න වෙනවනෙ.

ඇත්තටම මේ වෙද්දි උපාසක කිසිම ගෑනු ළමයෙකුගෙන් යාලු වෙන්න අහල තිබුනෙ නෑ.

දසුන් :- බොරු නොකියා හිටපං.උඹ අහන්න බයයි.මම ඕන ඔට්ටුවක් දානවා උඹට ඒකිගෙන් අහන්න බෑ.

උපාසක :- ඔට්ටුවක් ? මොකද්ද උඹේ ඔට්ටුව ??

දසුන් :- උඹ දැන් ඒකිගෙන් ඇහුවොත් මම උඹට නිමාකා එකෙන් කන්න අරන් දෙනවා.හැබැයි උඹ එතනට ගිහිල්ලා ශානිගෙන් අහන්නෙ නැතුව ආපහු ආවොත් උඹ අපි හැමෝටම කෑම අරන් දෙන්න ඕනෙ.

උපාසක ටිකක් කල්පනා කළාලු.දැන් මෑන්ස් ශානිගෙන් ඇහුවොත් එයා හා කිව්වත් බෑ කිව්වත් අනිවා කෑම එකක් හම්බවෙනවා.ඉතිං කෙල්ල වගේද කෑම එක කියලා හිතපු පූසා තීරණය කළාලු චැලේන්ජ් එක බාරගන්න.

දැන් උපාසක ශානි ඉන්න පැත්තට කිට්ටු වෙනවා.කලින් පොර ටෝක්ස් දුන්නට දැන්නං මෑන්ස්ට නිකං මොකද්ද වගේ.ආපහු හැරිලා යන්නමයි හිතදෙන්නෙ.ඒත් අපහු යන්නත් බෑ නොවැ! අරුන් ටිකට කෑම අරන් දෙන්න ගියොත් ඊළග මාසෙ පන්ති කාඩ් එක ගන්නවා බොරු.ඇයි ඉතිං වැඩිය කන්න දන්නෙම නැති මිනිස්සුනෙ.ඉතිං කොහොමහරි වැඩේ කරනවා කියල හිතාගත්තු උපාසක හිතට පූස් ධෛර්ය අරගෙන කෙලින්ම ගියාලු ශානි ළගට.

උපාසක :- ශානි, මට ඔයාගෙන් දෙයක් අහන්න තියනවා...

ශානි :- (එකපාරටම උපාසක දිහාට හැරිලා) ඇයි මොකද්ද?

උපාසක :- මම ඔයාට කැමතියි.ඔයා මොකද කියන්නෙ?

ශානි :- ඔයාට විකාරද ????

උපාසක :- විකාර නෑ.ඔයා මට හා හරි බෑ හරි කියන්නකෝ.

ශානි :- මම ඔයාව හරියට දන්නෙත් නෑ.මම කොහොමද එහෙම එක පාර උත්තරයක් දෙන්නෙ?

උපාසක :- නෑ නෑ, ඔයා එක පාර කියන්නම ඕනෙ. මම උත්තරේ "හා" කියල හිතාගන්නද?

ශානි :- මම හිතලා බලල ඔයාට කියන්නං

උපාසක :- බෑ බෑ, ඔයාට බැරිනං කෙලින්ම බෑ කියන්න.

ශානි :- හරි, එහෙනං බෑ තමයි

උපාසක :- එළකිරි! එහෙනං මං ගියා...

මෙහෙම කියපු උපාසක හිනා වෙවී යාලුවො ළගට ඇවිල්ලා කට්ටියවත් ඇදගෙන නිමාකා එකට රිංගුවලු.දසුන්ගෙ මූණ හතරැස් වෙලා ගියාලු.එදායින් පස්සෙ කවදාවත් දසුන් උපාසකට කෙල්ලො සෙට් කරන්න හැදුවෙත් නැහැලු.ශානිත් කවදාවත් උපාසකගෙ මූණ බැලුවෙවත් නැහැලු...

Monday, August 16, 2010

හොස්ටල් ලයිෆ් - තණකොළ ගලවපු හැටි


ඉතිං යාලුවනේ අද අපි කාලෙකට පස්සෙ හොස්ටල් කතාවක් කියන්නයි යන්නෙ.ඒ වගේම මේක තමයි පූසන්ගෙ 10 වසරෙ සිද්දි වලින් අපි කියන්න බලාපොරොත්තු වෙන අන්තිම කතාව.මේ වෙද්දි පුරුපුරුලගෙ 10 වසරෙ බැච් එක තමයි හොස්ටල් එකේ සීනියර් බැච් එක වෙලා තිබුනෙ.මොකද මැර සතියෙදි කංජිනාත් ගුටි කෑවට පස්සෙ මුලු 11 වසරම හොස්ටල් එකෙන් අස් කළා නොවැ!

මේ වෙද්දි 2002 අවුරුද්ද ඉවර වෙන්නත් ළගයිලු.ඉතිං හැම ඉස්කෝලෙම වගේම කුරුදුවත්ත ඉස්කෝලෙත් දැන් එන්ඩ් ටර්ම් ටෙස්ට් එක ළං වෙලා.ඉතිං හොස්ටල් එකේ හිටපු ළමයි හැමෝම වගේ දැන් ගජරාමෙට පාඩම් කරනවලු.ඔය අධ්‍යාපන පැත්ත සැලකුවොත් හොස්ටල් එකේ හිටපු ළමයි කොටස් තුනකට බෙදන්න පුලුවන්.

පළවෙනි කොටස තමයි හැමදාම මහන්සිවෙලා පුරුද්දක් වශයෙන් පාඩම් කරන ළමයි.මෙහෙම අයනම් මුලු හොස්ටල් එකටම හිටියෙ කීප දෙනයි.ඊළග කොටස තමයි විභාගෙ කාලෙට විතරක් පාඩම් කරන ළමයි.හොස්ටල් එකේ ගොඩක් හිටියෙ මේ ජාතියෙ මෑන්ස්ලා.පුරුපුරුයි මාලුකට්ටයි අයිතිවුණෙත් මේ ගොඩටමයි.තුන්වෙනි කොටස තමයි ජීවිතේට පොතක් අතින් අල්ලන්න කැමති නැති ළමයි.කොටියා සර්ගෙ උවමනාවට ස්ටඩි ටයිම් එකේ පොතක් පෙරලගෙන හිටියට මේ අය කවදාවත් උනන්දුවෙන් ඉගෙනගත්තෙ නෑ‍.පොන්ටින්, සකයා වගේ අය අයිති වුණේ මේ ගොඩ‍ට.

ඉතිං ටර්ම් ටෙස්ට් එක කිට්ටු වෙද්දි අර කලින් කිව්ව පළවෙනි සහ දෙවෙනි කොටස් වලට අයිති ළමයි ඩයිනින් හෝල් එකට ගිහිං පාඩම් කරනවලු.තුන්වෙනි කොටසෙ ළමයි ඩෝම් එකට වෙලා මොකක් හරි පිස්සුවක් නට නටා ඉන්නවලු.

පුරුපුරුට තිබුන අප්සෙට් එක තමයි ඩයිනින් හෝල් එකේ පාඩම් කරන්න බැරි එක.මොකද මෑන්ස්ට පාඩම් කරන්න පුලුවන් නිදාගෙන විතරයි.ඉතිං ඇදේ පෙරළිලා නිදාගෙන පාඩම් කරන්න පුලුවන් ඩෝම් එක ඇතුලෙ විතරයි නිසා, පුරුපුරු ස්ටඩි ටයිම් එකේ ඇර අනිත් වෙලාවට පාඩම් කළේ ඩෝම් එක ඇතුලෙ.මොකද ස්ටඩි ටයිම් එකේදි ඩයිනින් හෝල් එක ඇතුලෙ පාඩම් කරන එක අනිවාර්ය කටයුත්තක්.

ඉතිං එක දවසක් පුරුපුරු හවස් වරුවක මෙහෙම ඇදේ පෙරලිලා පාඩම් කර කර ඉන්නවලු.බැච් එකේ පාඩම් කරන අනිත් ඔක්කොම කට්ටිය ඒ වෙලාවෙ ඩයිනින් හෝල් ගිහිල්ලයි හිටියෙ.ඩෝම් එකේ ඉතුරු වෙලා හිටියෙ පොන්ටින්, සකයා, පොල්පොට්, ජුවාන් වගේ කීප දෙනෙක් විතරයි.පහුවදා විභාගෙ විදිහට තියන්න නියමිත වෙලා තිබුන විද්‍යාව විෂය තමයි පුරුපුරු පාඩම් කර කර හිටියෙ.

ඉතිං මෑන්ස් පාඩම් කර කර හිටපු දර්ශනය පොන්ටින්ට පෙනුනලු.පොන්ටින් කියන්නෙ කොහොමත් එක විදිහකට ඉන්න පුලුවන් කොල්ලෙක් නෙවෙයි.ඒකනෙ අර පූසන්ගෙ රැවුල කපලා කොටියා සර්ගෙන් ගුටි කෑවෙ.ඉතිං පොන්ටින්ට අයිඩියා එකක් ආවලු පුරුපුරුට මොකක් හරි අරියාදුවක් කරන්න ඕනෙ කියලා.මෑන්ස් කළේ එලියට ගිහිං පොඩි ගල් කැට ටිකක් අරගෙන ඇවිත් ඈත ඉදන් පුරුපුරුට ගහන එක.පුරුපුරුටත් මොන දේ ඉවසන්න පුලුවන් වුණත් පාඩම් කරන වෙලාවෙ කරදර කරන එක ඉවසන්න බෑ.මේ බව පොන්ටිනුත් හොදට දැනගෙන හිටියලු.

ඉතිං පුරුපුරු කළේ ගල් ගහන වාරයක් ගානෙ නැගිටලා පොන්ටින්ගෙ ඥාති සමූහයාට පුන්‍යානුමෝදනා කරපු එක.ඇයි දෙයියනේ විද්‍යාව කියන්නෙ ඒ දවස්වල ඉදන්ම බලාපොරොත්තු තියාගෙන හිටපු සබ්ජෙක්ට් එක නොවැ!කොහොම හරි පොන්ටිනුත් වැඩේ අතඇරියෙම නැහැලු.දැන් පුරුපුරුට නස්තාර් වෙන්න ෆ්ලවර් ජම්ප් වෙලා තියෙන්නෙ.මේ අතරෙ තමයි පොන්ටින්ගෙ තියුණු ඇස් වලට ඩෝම් එකේ කෙළවරක තිබුන හොකී බෝලයක් පෙනුනෙ.ඒ දවස්වල ඉතිං බැච් එකේ එක එක ක්‍රීඩා කරපු ඈයො හිටපු නිසා ඩෝම් එක ඇතුලෙ හොකී බෝල, බේස් බෝල, ක්‍රිකට් බෝල, ටෙනිස් බෝල වගේ දේවල් ඕන තරම් තිබුනා.

දැන් ඉතිං අපේ කියවන යාලුවන්ට හිතාගන්න පුලුවන්නෙ පොන්ටින්ගෙ ටිකිරි මොළේට‍ ආපු අයිඩියා එක ගැන.ඉතිං පොන්ටිනුත් කෙරුවෙ අර හොකී බෝලෙ අරගෙන පාඩම් කර කර හිටපු පුරුපුරුගෙ ඔලුවට දමලා ගැහුව එක.හොකී බෝලයක් තියන්නෙත් ලේසි පාසු බෝලයක් නෙවෙයිනෙ.හරියට නිකං ගල් ගෙඩියක් වගේ.

පොන්ටින් හොකී බෝල පාර එල්ල කරපු තැන ඉදන් ගත්තු ෆොටෝ එකක්.පුරුපුරු හිටියේ ඈත ජනේලය ළගයි.

ඉතිං මේක වැදුන පාරටනං පුරුපුරුට අම්බානට රිදුනා.ඒ වගේම හිරකරගෙන හිටපු කේන්තිය එළියට පැන්නා.එදා තමයි මෑන්ස්ගෙ ජීවිතේ වැඩියෙන්ම ෆ්ලවර් ජම්ප් වෙච්ච දවස.

"පොන්ටි.......න්............"

වහාම පොත පැත්තකට විසි කරලා දැම්ම පුරුපුරු කෑ ගහගෙන නැගිට්ටා.හික්...දන්නවනෙ ඉතිං පූසන්ට තරහ ගියාම.පුරුපුරුගෙ මූණෙ තිබුන ලුක් එක දැක්කට පස්සෙ තමයි පොන්ටින්ට තේරුනේ වැඩේ ජෝන් බාස්ට ගියයි කියලා.ඉතිං මෑන්ස් කළේ වහාම ඩෝම් එකෙන් එළියට පැනලා දුවපු එක.දැන් පුරුපුරුගෙ එකම බලාපොරොත්තුව තමයි පොන්ටින්ව අල්ල ගන්න එක.

මේ වෙලාවෙ පුරුපුරු උඩට කිසිම ඇදුමක් ඇදලා තිබුනෙ නෑ.‍හොස්ටල් එකේ නීතියට අනුව උඩට ඇදුමක් නැතුව ඩෝම් එකෙන් එළියට බැසීම දඩුවම් ලැබිය හැකි වැරැද්දක්.ඒ වුණාට පුරුපුරුට ජම්ප් වුණ ෆ්ලවර් එකේ හැටියට මොන නීතිද?ඉතිං මෑන්ස් කළේ ඇදගෙන හිටපු කොට කලිසම පිටින්ම ඩෝම් එකෙන් එළියට පැනලා පොන්ටින් පස්සෙන් පන්නපු එක.ඩෝම් එකෙන් එළියට යන්න හදද්දිම සකයයි, සලයි පැනලා පුරුපුරුව නවත්තන්න ට්‍රයි එකක් දුන්නා.ඒත් පුරුපුරු කළේ ඒ දෙන්නවත් තල්ලු කරගෙන එළියට පැනපු එක.

දැන් පොන්ටින් පණ කඩාගෙන දුවනවා.පුරුපුරු අඩ නිරුවතින් මෑන්ස් පස්සෙ පන්නනවා.ඔහොම දුවද්දි එක පාරටම බිල්ඩින් එකක් ගාව වංගුවකින් හැරුන පොන්ටින් අතුරුදහන් වුණාලු.දැන් පුරුපුරුට පොන්ටින්ව හොයාගන්න බැහැ.මෙහෙම ටික වෙලාවක් ගියාට පස්සෙ තමයි මෑන්ස්ට තේරුනේ ටී ෂර්ට් එකක් නැතුව ඇවිල්ලා කරගත්තු මෝඩකම ගැන.ඉක්මනට ගිහිං ටී ෂර්ට් එකක් දාගෙන ඇවිත් පොන්ටින්ව හොයන්න ඕනෙ කියලා හිතාගෙන ආපහු හැරෙද්දිම තමයි පුරුපුරු අතිශය භයංකාර දර්ශනයක් දැක්කෙ.

හත්වලාමයි.....වේවැලක් අතේ තියාගෙන හිටියෙ වෙන කවුරුත් නෙවෙයි, කොටියා සර්...

උඩට ඇදුමක් නැතුව එළියට බැහැල හිටපු පුරුපුරුව දැකපු කොටියා සර්ගෙ ඇස් උඩ ඉන්දවුණා.බරපතල වැරැද්දක් නොවැ!ඉතිං අපේ පූසාට නිදහසට කාරනා කියන්නත් කලින් සිද්දවුණේ සර්ගෙන් වේවැල් පාරක් කාල ඉන්න.

"පුරුපුරු, මොකද මේ ඔය ළමයා උඩට ඇදුමක් නැතුව එළියට බැහැලා?"

කොටියා සර් එහෙම ඇහුවලු.දැන් ඉතිං බේරෙන්න තියෙන එකම ක්‍රමේ ඇත්ත කියන එක කියලා හිතාගත්තු පුරපුරු සර්ට වෙච්ච සිද්දිය කිව්වලු.

"ආ..දැන් ඔය ළමයා ගිහිල්ලා උඩට ඇදුමක් දාගෙන එනවා.එද්දි පොන්ටින්වත් එක්කගෙනම එන්න"

එහෙම කියපු සර් යන්න ගියාලු.ඔය තරමින්වත් බේරෙන්න ලැබීම ගැන පුරුපුරුට හරි සතුටුයි.ආපහු ඩෝම් එකට ගිය පුරුපුරු ටී ෂර්ට් එකකුත් ඇදගෙන වෙච්ච සිද්දිය සගයන්ට කිව්වලු.ඉතිං කට්ටියම තීරණය කළාලු පොන්ටින්ව හොයන්න යන්න.හැබැයි ගිහිං ගොඩ වෙලාවක් හෙව්වත් මෑන්ස් ගැන කිසිම නිව්ස් එකක් හොයාගන්න කට්ටියට බැරි වුණාලු.හවස් වෙද්දි තමයි පොන්ටින් ආපහු ඩෝම් එකට ආවෙ.බැලින්නං මෑන්ස් හැංගිලා ඉදලා තියෙන්නෙ 11 වසර ඩෝම් එකේ.ඇයි 11 වසරෙ ළමයින්ව හොස්ටල් එකෙන් අස් කළාට පස්සෙ ඩෝම් එක හිස් වෙලානෙ තිබුනෙ.මේ වෙද්දි පුරුපුරුගෙ කේන්තියත් නැති වෙලා තිබුනෙ.

ඉතිං ඊට පස්සෙ පුරුපුරුයි පොන්ටිනුයි ගියාලු කොටියා සර්ව හම්බවෙන්න.නඩුව අහපු සර් කළේ පොන්ටින්ට වේවැල් පාර කීපයක් දෙන එක.ඊට අමතරව පහුවදා විභාගෙ ඉවරවෙලා ඇවිත් පැය බාගයක් 10 වසර ඩෝම් එක ඉස්සරහා තණකොළ ගලවන්නත් මෑන්ස්ට නියම වුණාලු.ඇදුම් නැතුව ආකිමිඩීස් වගේ දුවපු වැරැද්දට පුරුපුරුට ලැබිච්ච පනිෂ්මන්ට් එක තමයි තණකොළ ගලවන වැඩේට පොන්ටින්ට සපෝට් කරන්න වෙච්ච එක.ඉතිං පහුවදා යාලුවො දෙන්නා එකතු වෙලා ඩෝම් එක ඉස්සරහා තිබුන තණකොළ ටික ඔක්කොම ගලවලා දැම්මලු.

ප.ලි - අපේ බ්ලොග් එකේ කොමෙන්ට්ස් වල ෆොන්ට් සයිස් එක වැඩි කරන්න මග පෙන්නපු නිදහස් සිතුවිලි ලියන රන්දිල් අක්කාට බ්ලොග් ගඩොල් උත්තමාචාර!!!

Thursday, August 12, 2010

කලු කුමාරි 4 (අවසන් කොටස) - ඇටබෝල තුවක්කුව



කලින් ලිපියෙන් අපි කිව්වනෙ අපේ පූසො ටික අම්බානක සංග්‍රහයක් භුක්ති විදින්න ලෑස්ති වෙද්දි රෝහණදීර ඇවිල්ල සතුරන්ට සද්දෙ දාපු හැටි.ඉතිං අපේ කලින් ලිපි බලන්න බැරිවුණ යාලුවන්ට පුලුවන් දැන් ගිහින් බලලා එන්න


කලු කුමාරි - 1
කලු කුමාරි - 2
කලු කුමාරි - 3


ඉතිං පුරුපුරුට හිතාගන්න බැහැ මොන පූරුවෙ පිනකටද රෝහණදීර මේ වෙලාවෙම මෙතනට පාත් වුණේ කියලා.පස්සෙ බැලින්නං ඤාව්වට කලින් දවසෙ හවස පූස්ගම ටවුමෙදි රෝහණදීරව හදිස්සියෙ මුණගැහිලා.ඉතිං ඤාව්වත් කරල තියෙන්නෙ වලියෙ විස්තරේ ගැන අකුරක් නෑර රෝහණදීරට කියපු එක.කොහොම හරි ඉතිං ඤාව්වගෙ වැඩේ හින්ද පූසො ටික යන්තං බේරුනා.


ඉතිං අපි කිව්වනෙ රෝහණදීරගෙ සද්ද දැමීම ඉස්සරහ දිගාගෙ සෙට් එකේ කොල්ලො ශේප් එකේ මාරු වෙලා ගියයි කියලා.අන්තිමට ඉතුරු වුණේ දිගායි, තව කොල්ලො දෙතුන් දෙනෙකුයි විතරයි.කලින් පොර ටෝක්ස් දුන්නට මොකද දැන්නං දිගාගෙ මූණ දිහා බලන්නත් දුකයිලු.මෑන්ස් ඇස්වල කදුලු පුරෝගෙන පූසො දිහා ආයාචනාත්මක් බැල්මක් දැම්මලු.


සාමාන්‍යයෙන් රෝහණදීර වගේ වෘත්තීය මට්ටමේ තග් ඩයල් එකක් වලියකට ආවොත් එතන අනිවා ගහගැනිල්ලක් සිද්ද වෙනවාමයි.ඒක පූසොත් දන්නවා, දිගාත් දන්නවා.ඉතිං දැන් දිගාට ෂුවර් පොරට තියෙන්නෙ හොද ගුටි කෑමක් තමයි කියලා.රෝහණදීරත් ඉතිං තමන්ගෙ කටහඩ අවදි කළාලු.


රෝහණදීර :- පුරුපුරු මල්ලි, මොකද කියන්නෙ? මූට නෙලමු නේද??


පුරුපුරුට දිගාත් එක්ක තිබුනෙ එදා කම්මුල් පාරවල් දෙකක් කාපු තරහ විතරයි.ඒත් දැන් රෝහණදීර දිගාට ගැහුවොත් මෑන්ස්ට අම්බානට ගුටිකන්න වෙනවා.ඉතිං දිගා ගැන අනුකම්පා කරපු පුරුපුරු මෙහෙම කිව්වලු


පුරුපුරු :- නෑ අයියෙ! එදා මූ මට ගහපු එකට හරියන්න අපි මූට ටිකක් ගහල යවන්නං.අවුලක් නෑනෙ?


එහෙම කියපු පුරුපුරු කළේ අත දිගඇරලා දිගාට කම්මුල් පාරවල් දෙකක් දුන්න එක.ඊට පස්සෙ පුරුපුරු ඤාව්වට පොඩි සිග්නල් එකක් දුන්නලු.ඉස්සරහට පැනපු ඤාව්වා දිගාගෙ කම්මුලට තවත් වේගවත් හයේ පහර දෙකක් එල්ල කළාලු.පුරුපුරු ඤාව්වටත් චාන්ස් එක දුන්නෙ දිගා එක්ක තමන්ට තියනවටත් වඩා තරහක් ඤාව්වගෙ හිතේ තිබුන බව දැනගෙන හිටපු නිසා.ඒත් අන්තිමට සිද්ද වුණේ වෙන දෙයක්.ඤාව්වගෙනුයි පුරුපුරුගෙනුයි දිගා ගුටි කනවා දැකපු රෝහණදීරත් ෆෝම් වෙලා ඉස්සරහට පැනලා දිගාට අම්බානට නෙලන්න ගත්තලු.


දැන් පූස්ගම ටවුම මැද්දෙ දිගා මදි නොකියන්න ගුටි කනවා.මිනිස්සුත් බලාගෙන ඉන්නවා.අන්තිමට වුණේ පූසන්ටයි, එතන හිටපු පූසන්ගෙ යාලුවන්ටයි එකතු වෙලා රෝහණදීරව පැත්තකට අරගෙන දිගාව බේරගන්න වෙච්ච එක.මදෑ කොළා! අන්තිමට ගහගන්න ආපු මනුස්පයව බේරන්න වුණෙත් පූසන්ටමයි.වලිය ඉවරවෙන මොහොතෙම තමයි උපාසක අතිශය භයානක දර්ශනයක් දැකල තියෙන්නෙ.උපාසක කෑ ගැහුව පාර අනිත් අයත් ඒ පැත්ත බැලුවලු.


දෙයියන්ටම ඔප්පු වෙච්චාවෙ! මෙන්න කලු කුමාරි රා බීපු ඇතින්නක් වගේ පිඹගෙන එනව කට්ටිය හිටපු දිහාට.ඒක දැකපු පූස් සෙට් එකයි, රෝහණදීරයි ටිකක් පැත්තකට ගියාලු.දැන් වලිය ගිය තැන ඉතුරු වෙලා හිටියෙ මූණ රතු කරගත්තු දිගායි, මෑන්ස්ගෙ යාලුවො දෙන්නෙකුයි විතරයි.වහාම එතනට ගිය කලු කුමාරි දිගාව අඩගහගෙන වෙන පැත්තකට ගියාලු.දැන් පූසො හිටපු තැනට කලු කුමාරියි දිගායි මොනවද කරන්නෙ කියල පේන්නෙ නෑ.


කොහොම හරි ඉතිං බලාපොරොත්තු රහිතව වෙච්ච මේ වැඩෙන් පූසො ටික අම්බානට අප්සට් ගියාලු.විශේෂයෙන් ඤාව්වට.මොකද දැන් දිගා අසරණ වෙලා ඉන්න මොහොතෙ කලු කුමාරිගෙ අනුකම්පාව මෑන්ස්ට හම්බවෙන්න පුලුවන්.ඊට පස්සෙ අනුකම්පාව භූමිකම්පාවක් වුනොත් එහෙම ඤාව්වගෙ බලාපොරොත්තු කෙලින්ම චකබ්ලාස් වෙලා යනව නොවැ!දැන් කට්ටිය එබි එබී බලනවා කලු කුමාරි දිගා එක්ක කතා කරන්නෙ මොනවද කියලා.


ඉතිං ටික වෙලාවකින් කලු කුමාරි තනියම යන්න යනවා අපේ පූසො සෙට් එක දැක්කලු.වටින් ගොඩින් එබිකම් කරල බලද්දි මෙන්න දිගා ඉන්නවා අත් දෙකෙන් මූණ වහගෙන.බැලින්නං මෙන්න මේ යකා හොටු පෙරාගෙන අඩනවා.ඉතිං මෑන්ස්ට අඩ අඩා ඉන්න දීල පූසොයි යාලුවොයි ගියාලු පොඩි ප්ලේන්ටි පාරක් ගහන්න.


පස්සෙ තමයි හරියටම සිද්දිය ආරංචි වුණේ.ඒ වෙලාවෙ වෙන ක්ලාස් එකකට යන්න පූස්ගමට ඇවිත් හිටපු කලු කුමාරිට කවුද වලිය ගැන බ්‍රේකින් නිව්ස් එකක් දිලා.හැබැයි ආරංචිය දීල තියෙන්නෙ දිගා සෙට් එකක් අරන් ඇවිත් පූසන්ට නස්තාර් වෙන්න නෙලනවයි කියලා.ඉතිං කලු කුමාරිත් කරල තියෙන්නෙ ආපු ගමන් දිගාව පැත්තකට අරගෙන ගිහිං කිසිම හෙවිල්ලක් බැලිල්ලක් නැතුව මෑන්ස්ට බැන්න එක.ඒ මදිවට මෑන්ස්ට කැමති නැහැ කියල මීට පස්සෙ කලු කුමාරිත් එක්ක වචනයක්වත් කතා කරන්නත් එපා කියලා.ඉතිං ගුටිකාපු දුකටත් වඩා කලු කුමාරිගෙන් බැනුම් අහපු දුකට තමයි දිගා අඩල තියෙන්නෙ.

කොහොම හරි ඉතිං පූසන්ගෙ වියදමෙන් ඔක්කොම යාලුවන්ට ප්ලේන්ටි අරන් දුන්නලු.මෙතනදි තමයි කතාවෙ හොදම සීන් එක සිද්ද වුණේ.

ප්ලේන්ටි බොන අතරෙ අපේ මාලුකට්ටා අත් දෙක හොදට උඩට දිග ඇරලා ඈනුමක් යැව්වලු.ඕක දැකපු රෝහණදීර හොදටම බය වුණාලු.මෑන්ස් කළේ පුරුපුරුට පැත්තකට අඩගහපු එක.


රෝහණදීර :- පුරුපුරු මල්ලි, කවුද බං මූ???


පුරුපුරු :- මේ අපේ මාලුකට්ටනෙ අයියෙ! ඇයි මොකද?


දැන් පුරුපුරුට හිතාගන්න බෑ රෝහණදීර වගේ ඩයල් එකක් ඇයි මාලුකට්ටව දැකල බය වෙන්නෙ කියලා.


රෝහණදීර :- ඇයි මල්ලි පොරගෙ ඉනේ පිස්තෝලයක් ගහගෙන ඉන්නෙ? අන්ඩර්වර්ල්ඩ් ඩයල් එකක්ද? මේ ඒරියා එකේ අපි දන්නෙත් නැතුව? දැක්කහමනං ෆුල් අහිංසක ශේප් එකක්‍ තියෙන්නෙ!!


රෝහණදීර ෆුල් අප්සෙට් ගහලා.පුරුපුරුටත් අබ්ලික් කෝටියයිලු මූ මේ මොනවද කියවන්නෙ කියලා.මාලුකට්ටා අන්ඩර්වර්ල්ඩ් තියා මීට කලින් ජීවිතේටවත් වලියක් තිබුන තැනකින් ගියෙවත් නැති පූසෙක්.


පුරුපුරු ගිහිල්ලා සීන් එක මොකද්ද කියල බැලුවලු.බැලින්නං රෝහණදීර කියල තියෙන්නෙ ඇත්ත.මෙන්න බොලේ මාලුකට්ටගෙ ඉනේ පිස්තෝලයක්.පොර ඈනුම් අරිද්දි ටී ෂර්ට් එක උඩට ඉස්සුනාම තමයි රෝහණදීර මේක දැකල තියෙන්නෙ.දැන් කට්ටියටම ෆුල් හොල්මන්.මොකද දන්නවද වෙලා තියෙන්නෙ?


ඒ දවස්වල තිබුන මතකයිනෙ ඔය ඇටබෝල තුවක්කු කියන ජාතිය.ඒ කියන්නෙ බුලට් විදිහට චූටි ප්ලාස්ටික් බෝල පාවිච්චි කරන්න තියෙන සෙල්ලම් පිස්තෝල.සමහර කොල්ලොනං ඒ දවස්වල ප්ලාස්ටික් බෝල වෙනුවට බයිසිකල් යකඩ බෝලත් ඔය පිස්තෝල වලට දාන්න පුරුදු වෙලා හිටියලු.ඔය සමහරක් ඇටබෝල තුවක්කු පෙනුමෙනුයි, සයිස් එකෙනුයි ඇත්තම පිස්තෝල වගේ.ඉතිං මාලුකට්ටා ළගත් තිබුනලු ඔය කියන ජාතියෙ ඇටබෝල තුවක්කුවක්.

පොර ඉතිං ජීවිතේට වලියක් දැකල නැතෙයි කියලා අපි කලින් කිව්වනෙ.ඉතිං ඉමර්ජන්සි කේස් එකක් වුණොත් පාවිච්චි කරන්න කියලා මාලුකට්ටා ඇටබෝල තුවක්කුවට බයිසිකල් බෝල ලෝඩ් කරගෙන ඉනේ ගහගෙන ඇවිල්ලා.මේක දැනගත්තු රෝහණදීරට බිබී හිටපු ප්ලේන්ටියත් ඉස්මෝල්ලෙ ගියා.පොර දැන් බඩ අල්ලගෙන හිනා වෙනවලු.අපේ පූසන්ගෙ මූණු ටික රතු වෙලා ගිහිං.මාලුකට්ටා ඇටබෝල තුවක්කුවත් නැතුව සවලක්වත් ගෙනත් තිබුනනං බිම හාරගෙනවත් යන්න තිබුන නොවැ! ඒත් දැන් ඉතිං මොනව කියල කරන්නද?

කොහොම හරි ඉතිං දීර්ඝ බයිටකට පස්සෙ කට්ටිය විසිරිලා ගියාලු.ඊට පස්සෙ කාලයක් යනකම්ම රෝහණදීරව මුණගැහුනොත් මෑන්ස් ඇහුවෙම මාලුකට්ටගෙ ඇටබෝල තුවක්කුව ගැන.


අන්තිමේදි වුණේ අසරණ දිගා ගුටිත් කාල කලු කුමාරිවත් නැති කරගත්ත එක.දැන් අපේ කියවන යාලුවො හිතයිද දන්නෙ නෑ ඤාව්වා කලු කුමාරිත් එක්ක යාලු වෙලා සියලු දෙනා සතුටින් විසිරිලා ගියා කියලා.එහෙම වුණේ නෑ.ඒ කියන්නෙ ඤාව්වට වැඩේ හරිගියෙත් නෑ.කලු කුමාරි ඒ ලෙවල් ඉවර වෙනකංම කොල්ලෙක් එක්ක යාලු වුණේ නැහැලු.හැබැයි පස්සෙ කාලෙකනං ඇස්.ඇස්.සී පිට්ටනිය අද්දර කොම්පියුටර් ආයතනෙට ගිහිං කොල්ලෙක් එක්ක යාලු වෙලා හිටියා.ඊට පස්සෙ ළගකදිනං කලු කුමාරි ගැන ආරංචියක් ලැබුනෙ නෑ...


එහෙනං ඉතිං අපේ කලු කුමාරි සීරීස් එක මෙතනින් අහවරයි.කියවපු අපේ යාලුවො ඔක්කොටම ස්තුතියි


ප.ලි - දැන් රෝහණදීර වැඩ කරන්නෙ ප්‍රමුඛ පෙළේ දුරකථන සමාගමක කොළඹ බ්‍රාන්ච් එකක.පොර ඒ වුණාට ඉන්නෙම කොළොම්තොට කැම්පස් එක ඇතුලෙලු.කෑම කන්නෙ කැම්පස් කැන්ටිමෙන්.පාවිච්චි කරන්නෙත් කැම්පස් ජිම් එක.වැඩේ ලාබයි නොවැ!කොටින්ම පුරුපුරුට වඩා හොදට මෑන්ස් දැන් කැම්පස් ඩයල් අදුනනවා.


හැම ෆැකල්ටියකම කට්ටිය හිතන්නෙ මෑන්ස් වෙන ෆැකල්ටියක ඩයල් එකෙක් වෙන්න ඇති කියලා.කොහොමද රෝහණදීරගෙ ටිකිරි මොළේ?

Wednesday, August 11, 2010

කලු කුමාරි 3 - රෝහණදීර සහ මංගල වලිය


ඉතිං යාලුවනේ ඔයාලා කලු කුමාරි - 2 කොටස කියවන්න ඇතිනෙ.අද අපි කියන්න යන්නෙ ගම්පහ බාලක විද්‍යාලෙ දිගාගෙන් ගුටිකාපු පුරුපුරු සහ අනිත් පූසො ඊළගට මොකද්ද කළේ කියලා.

ඊට කලින් අපේ අලුත් යාලුවො ගිහිල්ලා

කලු කුමාරි - 1
කලු කුමාරි - 2

කොටස් කියවල එන්නකෝ!

ඉතිං කොහොම හරි පුරුපුරු දිගාගෙන් ගුටි කාපු කේස් එක මුලු පූස්ගම පුරාම පැතිරිලා යන්න ගතවුණේ බොහොම සුළු කාලයයි.මේ හින්ද පුරුපුරු තීරණය කළා තමන්ගෙ ගෞරවය වෙනුවෙන් වහාම ක්‍රියාත්මක වන පරිදි දිගාට පහර දෙන්න ඕනෙ කියලා.ඒත් ඒකට උදව් ගන්න පුරුපුරු දන්න ප්‍රොෆෙෂනල් මැරයෙක්ට කියල පූස්ගම හිටියෙ එකම එක්කෙනයි.ඒ තමයි රෝහණදීර.


රෝහණදීර කියන්නෙ පූසන්ට වඩා අවුරුදු දෙකක් වැඩිමල් කොල්ලෙක්.මෑන්ස් ගැන අපේ බ්ලොග් කියවන යාලුවන්ට පොඩි ඉන්ට්‍රොඩක්ෂන් එකක් දෙන්න වචන හොයාගන්න දහ අතේ කල්පනා කළත්, අපිට හිතට හරියන වචන සෙට් එකක් හොයා ගන්නම බැරි වුණා.ඉතිං කෙටියෙන් සරලව කියනවනං මෙහෙම කියමුකො.රෝහණදීර කියන්නෙ මුලින්ම කොළඹ මරියකඩේ ඉස්කෝලෙට ගිහිල්ලා, ඒකෙන් අස් කළාට පස්සෙ ගම්පහ බාලක විද්‍යාලෙට ගිහිල්ලා, ඒකෙනුත් අස් කළාට පස්සෙ පූස්ගම සෙන්ට්‍රල් එකට ගිහිල්ලා, අන්තිමට ඒ ඉස්කෝලෙනුත් අස් කරපු දීප්තිමත් ශිෂ්‍යයෙක්.


දැන් ඉතිං යන්තමින් හරි මෑන්ස් ගැන අයිඩියා එකක් ගන්න පුලුවන්නෙ නේද? ඉතිං රෝහණදීර ජීවත් වුනෙත් පූස්ගම ටවුමෙ හරි මැද.පොරගෙ තාත්තත් ඒ පැත්තෙ නොම්මර එකේ ගණන්කාරයෙක්ලු.ඉතිං පූස්ගම රෝහණදීර කිව්වම ගම්පහ ඉදලා පූස්ගමට යනකං ඕන එකෙක් දන්නවා.මේ දවස්වල මෑන්ස්ගෙ හොදම යාලුවා පුරුපුරුලගෙ එහා ගෙදර ගෑනු ළමයත් එක්ක පොඩි ලව් එෆෙයාර් එකක් පටන් අරගෙන තිබුනා.ඉතිං ගැනු ළමයගෙ ගෙදරින් මේ සම්බන්දෙට ඇමරිකාව උතුරු කොරියාවට දානවටත් වඩා සම්බාධක දාලලු තිබුනෙ.


පුරුපුරු ඉතිං හැමදාමත් ලව් එෆෙයාර් වලට සපෝට් පූසා නොවැ!ඉතිං මේ ආදරවන්තයො දෙන්නගෙ පණිවිඩ හුවමාරු ක්‍රමය බවට පත් වුණේ පුරුපුරු.කොහොමත් ඒ දවස්වල දැන් වගේ මොබයිල් ෆෝන් ප්‍රසිද්ද වෙලා තිබුන යුගයක් නෙවෙයිනෙ.ඉතිං පෙම්වතා කරන්නෙ පෙම්වතියට ලියුමක් ලියලා ඒක රෝහණදීරට දෙන එක.රෝහණදීර ඒ ලියුම ගෙනත් පුරුපුරුට දෙනවලු.ඊට පස්සෙ පුරුපුරු තමයි ගිහිල්ලා ලියුම පෙම්වතිය අතට දෙන්නෙ.ඉතිං මේ ලියුම් වැඩේ හින්දා රෝහණදීර පුරුපුරු ගැන හොදට ඉම්ප්‍රෙස් වෙලාලු හිටියෙ.

මේ එක්කොම කාරනා ගැන බලද්දි පුරුපුරුට තිබුන හොදම විසදුම වුණේ දිගාට විරුද්ධව කරන්න යන සටනට රෝහණදීරගෙ සපෝට් එක ලබාගන්න එක.ඒ වුණාට ඉතිං රෝහණදීර වගේ ප්‍රොෆෙෂනල් මැරයෙක් පූසො වගේ අමැර සෙට් එකක පොඩි පොඩි වලි වලට බහී කියල පුරුපුරු හිතුවෙ නෑ.ඒ හින්දා වෙන සෙට් කීපයක සපෝට් එක අරගෙන වලිය ක්‍රියාත්මක කරන්න පූසො සෙට් එක තීරනය කළාලු.

මේ අතරෙ දිගාටත් ආරංචි වුණාලු පූසො මෑන්ස්ට ගහන්න සේනා සංවිධානව කරනවයි කියලා.ඉතිං මෑන්සුත් තමන්ගෙ ඉදිරි ආරක්ෂක වළලු තර කරගන්න පටන් ගත්තලු.දැන් මේ වෙද්දි තුම්මුල්ලෙ අලයා, මරියකඩේ බෙන්සන් ඇතුලු කොළඹ ඉස්කෝලෙ ගිය කොල්ලො සෙට් එක පූසන්ගෙ දෑත් ශක්තිමත් කරන්න එකතු වෙලාලු.ඒ වගේම වේයන්ගොඩයා, චාමර ඇතුලු වේයන්ගොඩ ඉස්කෝලෙ ගිය කොල්ලො සෙට් එකත් හිටියෙ පූසන්ගෙ පැත්තෙ.

දිගාගෙ පැත්තෙ හිටියෙ සුපුරුදු පරිදි ගම්පහ බාලක විද්‍යාලෙ කොල්ලො සෙට් එක.ඒ වගේම පූස්ගම සෙන්ට්‍රල් එකේ කොල්ලො සෙට් එකකුත් දිගාගෙ දෑත් ශක්තිමත් කරන්න එකතු වෙලා හිටියලු.ඉතිං කොහොම හරි වලිය පැවැත්වෙන්න නියමිත වෙලා තිබුනෙ ඊළග දවසෙ සමාජ අධ්‍යයනය ක්ලාස් එක ඉවර වෙන වෙලාවට.දැන් පොතේ හැටියට මහා වලියක් යන්න තමයි නියමිත වෙලා තිබුනෙ.

මේ විදිහට දවසින් දවස ගෙවිල ගිහිං වලි දිනය උදා වුණේ පූසන්ගෙ පපුවලට බිත්තර තම්බන්න පුලුවන් ගානට ගින්දරක් දීලා.මොකද ගම්පහ බාලක විද්‍යාලෙත් එක්ක හැප්පෙන එක බොහොම භයානක වැඩක්.අන්තිමට වෙන්නෙ ගුටිත් කාලා ගම්පහ ටවුන් එක තහනම් කලාපයක් කරගන්න වෙන එක.ඒත් ඉතිං දැන් පරක්කු වැඩියි නොවැ!අපේ පූසො සෙට් එකත් හොදට ඇද පැළදගෙන එදා සමාජ අධ්‍යයනය ක්ලාස් එකට ගියාලු.පැය දෙකකින් විතර ක්ලාස් එකත් ඉවර වුණාලු.


ආ...කලින් කියන්න බැරි වුණානෙ.මේ තමයි අපේ පූසො සෙට් එකේ මංගල වලිය.විශේෂයෙන් අපේ මාලුකට්ටා එහෙම මීට කලින් වලියක් තියෙන තැනකින් ගිහිල්ලවත් නැහැලු.


දැන් අපේ පූසොත් ක්ලාස් ඉවර වෙලා පූස්ගම ටවුන් එකට ගියාලු.යනකොට මෙන්න පූස් හිතවාදී සෙට් එකත් ටවුන් එකේ.නිකං නෙවෙයි, සූ ගාලා දහ දෙනෙක් විතර ඉන්නවලු.එහා පැත්තෙ හිටපු දිගාගෙ සෙට් එකේ තිහක් විතර ඉන්නවලු.

මළ සේකරයි! දැන් ඉතිං පූසන්ට අම්බානට කන්න තමයි වෙන්නෙ.පුරුපුරු ඇතුලු පූසො ටවුමට ආපු බව දැක්ක දිගා ඇතුලු සෙට් එක පූසො හිටපු තැනට හිමින් හිමින් එන්න ගත්තලු.මේක දැක්ක පූස් හිතකාමී සෙට් එකට තරු පෙනිලා.දැන් පූසො අම්බානට කන්න තව විනාඩි කීපයයි.....


ඔය අතරෙ තමයි පාරෙ කොනකින් සගයො දෙන්නෙකුත් පිරිවරාගෙන රෝහණදීර මතුවුණේ.ඉක්මන් ගමනින් වලිය යන්න ගිය තැනට ආපු රෝහණදීර දිගාගෙන් මෙහෙම ඇහුවලු.


රෝහණදීර :- කවුද කවුද මේ පුරුපුරුලට ගහන්න ඉන්නෙ? උඹලද? පුලුවන්නං එකෙක් අත තියපං බලන්න...

රෝහණදීරගෙ වචන ඇහුව විතරයි මෙච්චර වෙලා ජයග්‍රාහී ලීලාවෙන් හිටපු දිගා ඇතුලු කොල්ලො සෙට් එකගෙ මූණු ටික බෙරි වෙලා ගියාලු.මොකද ඉතිං රෝහණදීරව තරහ කරගෙන ආපහු පූස්ගම පැත්තෙ එන්නයැ!පුරුපුරුටත් හිතාගන්න බැහැ රෝහණදීර කොහොමද මේ වෙලාවෙම මෙතනට ආවෙ කියලා.කොහොමහරි ඉතිං දිගාගෙ සෙට් එකේ මැරගහනය සීඝ්‍රයෙන් අඩු වෙලා යන්න විනාඩි දෙකක්වත් ගියෙ නැහැ.


දිගාලා පූසන්ට ගහයිද? පූසො දිගාලාට ගහයිද? නැත්තං වලිය ශේප් වෙයිද? රෝහණදීර මොනව කරයිද? ඉතිං ඊට පස්සෙ මොකද වුණේ කියල අපි ඊළග ලිපියෙන් බලමුකො නේද?ඊළග ලිපිය තමයි කලු කුමාරි සීරීස් එකේ අන්තිම කොටස.

Tuesday, August 10, 2010

කලු කුමාරි 2 - කවුද යකෝ පුරුපුරු??


ඔන්න මුලින්ම අපි සමාව ඉල්ලනවා කලු කුමාරි - 1 කොටස දාලා ගොඩක් කල් ගිහින් කලු කුමාරි - 2 කොටස පළ කරන්න සිද්ද වෙච්ච එක ගැන.ඉතිං කලු කුමාරි - 1 කියවල නැති යාලුවො මුලින්ම ගිහිං ඒක කියවල එන්නකො.එහෙම ගිහිං කියවන්න වෙලාවක් නැති යාලුවො වෙනුවෙන් අපි කලු කුමාරි - 1 කොටසෙ සිද්ද වෙච්ච දේ කෙටියෙන් කියන්නම්.

***********************************************************************************
කලු කුමාරි කියන්නෙ අපේ පූසන්ගෙම වයසෙ, හේනවිලේජ් කොලේජ් එකේ ඉගෙන ගත්තු ගෑනු ළමයෙක්.එයා පූසො ගිය විද්‍යාව පන්තියටත් ආවා.ඉතිං අපේ ඤාව්වගෙ රේඩාර් එකට කලු කුමාරිව අහුවුණා.ඊට පස්සෙ මෑන්ස්ට කලු කුමාරි එක්ක යාලු වෙන්න ඕනෙ වුණත් ඒකට අවශ්‍ය ගට්ස් තිබුනෙ නෑ‍.ඔය අතරෙ තමයි ආරංචි වුණේ දුෂ්ටයෙකුත් ඤාව්වට විරුද්ධව ගේමට බැහැලයි කියලා.

ඉතිං පූසො කට්ටිය තීරණය කළේ ඤාව්වා වහාම කලු කුමාරිගෙන් අහන්න ඕනෙ කියලා.ඒ වුණාට කලු කුමාරිගෙන් යාලු වෙන්න අහන්න ගිය ඤාව්වා ආපහු ආවෙ අහන්නෙ නැතුව.ඉතිං ඒ ගමන පුරුපුරුටයි උපාසකටයි වුණාලු ගිහිල්ලා කලු කුමාරිගෙන් ඤාව්වට කැමතිද කියල අහන්න.

උපාසක :- ඇයි කුමාරි, ඤාව්ව කොච්චර හොදද?එයාට අකමැති වෙන්න මොකද්ද එයාගෙ තියෙන අඩුව???

කලු කුමාරි :- (ආපසු හැරී) ඇත්තද?? එහෙනං එයාට තියෙන දේවල් එකක් කියමු බලන්ඩ??

පුරුපුරුටයි උපාසකටයි වුණේ එතනම ඌර්ධවපාතනය වෙන්න.ඤාව්වට තියන දේවල් කියන්න ගියානං ගුටිත් කාල තමයි එන්න වෙන්නෙ.

**********************************************************************************

ඉතිං ඔන්න ඔහොමයි වැඩේ සිද්ද වුණේ.දැන් අපි කලු කුමාරි - 2 කොටසට යමු.

අපේ පූසන්ට ආරංචි වුණානෙ කලු කුමාරිට දුෂ්ටයෙකුත් බැල්මට් එක දානවයි කියල.මේ දුෂ්ටයා තමයි ගම්පහ බාලක විද්‍යාලයේ හිටපු දිගා.මැන්ස් හිටියෙත් පූස්ගමට කිට්ටු ගමක් වෙච්ච කක්කිගම.ටිකක් මැර ඩයල් එකක් කියල තමයි ඒ දවස්වල ප්‍රසිද්ද වෙලා හිටියෙ.දැන් මේ කාලෙ වෙද්දි කලු කුමාරි ඤාව්වට බෑ කියල ඉවර වෙලත් සති දෙක තුනක් ගිහින් තිබුනා.හැබැයි අපේ ඤාව්වගෙ හිතේනං කලු කුමාරි ගැන තිබුන අදහස සම්පූර්ණයෙන් නැතිවෙලා ගිහින් තිබුනෙ නැහැලු.

මේ අතරෙ තමයි දිගාට ආරංචි වෙලා තිබුනෙ ඤාව්වත් කලු කුමාරිට ට්‍රයි කියලා.ඒ මදිවට මෑන්ස් කලු කුමාරිගෙන් යාලු වෙන්න ඇහුව කියලත් දිගාට ආරංචි වෙලා.දන්නවනෙ ඉතිං, ඔය කාලෙට කොල්ලො වලි හොය හොයානෙ ඉන්නෙ.ඉතිං පූසොත් එක්ක වලියක් දාගන්න ඕනෙ කියල දිගාත් තීරණය කෙරුවලු.

එක දවසක් ඔන්න පූසො කට්ටිය අර බියර් බීපු ඉන්ග්ලිෂ් ලිට් ක්ලාස් එකේ ඉන්නකොට මෙහෙම සිද්දියක් වුණාලු.ක්ලාස් එකේ ඉන්ටර්වල් එක සාමාන්‍යයෙන් විනඩි දහයක් පහළවක් විතර දෙනවා.ඉතිං මේ ඉන්ටර්වල් එක වෙලාවෙ ගම්පහ බාලක විද්‍යාලයෙම ළමයෙක් වෙච්ච දුහුල් පූසො ළගට ආවලු.

දුහුල් :- ඤාව්වා, උඹ කලු කුමාරිට ට්‍රයි කියන්නෙ ඇත්තද?

ඤාව්වා :- ඔව්, ඇයි ?

දුහුල් :- උඹ ඒකිගෙන් යාලු වෙන්නත් ඇහුවලු නේද?

ඤාව්වා :- ඔව්, ඇයි ඉතිං? උඹත් ඒකිට ට්‍රයිද?

දුහුල් :- මම ට්‍රයි නැහැ.ඒ වුණාට අපේ දිගා ට්‍රයි.උඹ දන්නවනෙ දිගා ට්‍රයි කරන කෙල්ලට උඹ ට්‍රයි කරන්න ගියොත් වෙන්නෙ මොකද්ද කියල?ඒ හින්ද උඹ වැඩේ අතඇරල දාපං.දිගා තමයි මේ පණිවිඩේ කියන්න කිව්වෙ.ඊළග පාර උඹත් එක්ක මේ ගැන මෙහෙම හොදින් කතා කරන්නෙ නෑ කියලත් කියන්න කිව්වා.

දැන් දුහුලා පට්ට පොර ටෝක්ස් ටිකක් දීගෙන දීගෙන යනවා.ඤාව්වගෙ මූණත් කලු වෙලා.පුරුපුරු ඉතිං පූස්ගමට ආවෙ 7 වසරෙ අගදිනෙ.ඉතිං මෑන්ස් දිගා ගැනවත්, වෙන මැරයො ගැනවත් දන්නෙ නෑ.(එක මැරයෙක්ව විතරක් දැනගෙන හිටියා.ඒ ගැන පස්සෙ කියන්නංකො) ඒ වුණාට අපේ සිකාට වගේ මේ වගේ අවස්ථාවලදි ෆ්ලවර් ජම්ප් වෙන ගතියක් පුරුපුරුට තිබුනා.ඉතිං දැන් මෑන්ස්ට අම්බානට ෆ්ලවර් ජම්ප් වෙලා.

පුරුපුරු :- මචං දුහුල්, උඹේ යාලුවත් ඤාව්වා වගේම කලු කුමාරිට තාම ට්‍රයි විතරයිනෙ.තවම ඒකිව දාගෙන නෑනෙ.ඉතිං ඌට අයිතියක් නෑ ඤාව්වට මේ විදිහට පණිවිඩ එවන්න.ඔන්න මිනිහා කලු කුමාරිව දාගෙන ඉවරයිනං කමක් නෑ.මුං දෙන්නම කලු කුමාරිට ට්‍රයි කරපුදෙන්.කලු කුමාරි තමන් කැමති කොල්ලා එක්ක යාලු වෙයිනෙ.

දුහුල් :- මේ පුරුපුරු, අපිට උගන්නන්න උඹ කවුද?උඹ වැරදි මිනිස්සුත් එක්ක හැප්පෙන්න හදන්නෙ.අපි ගම්පහ බාලක විද්‍යාලෙ කොල්ලො.මේ ගම්පහ දිස්ත්‍රික්කෙ අපිත් එක්ක ගේමට කවුරුත් නැහැ.උඹලට පව් කියල මෙහෙම කලින් වෝනින් එකක් දුන්නෙ.ඒත් ඒක පිළිගන්න බැරිනං අපි දන්නවා උඹලට කතා කරන්න ඕනෙ විදිහ.

ඒ පාරනං පුරුපුරුට පැන්නෙ අන්කොන්ට්‍රෝලබල් මලක්.දුහුල් කියන්නෙ එච්චර ලොකු ඇගක් තිබුන ඩයල් එකක් නෙවෙයි.ඒ වුනාට පුරුපුරු කියන්නෙ ඒ දවස්වල තමන්ගෙ වයසෙ අනිත් ළමයින්ට සාපේක්ෂව ලොකු ඇගක් තිබුන ළමයෙක්.ඉතිං දුහුල්ගෙ ටෝක්ස් වලට කේන්ති ගිය පුරුපුරු මෑන්ස්ගෙ ෂර්ට් එකේ කොලර් එකෙන් අල්ලලා තාප්පෙකට හේත්තු කරල මෙහෙම ටෝකක් දුන්නලු

පුරුපුරු :- අඩෝ මේ, උඹේ මහලොකු දිගාට කියපං අපි ඌ කියන දේවල් අහන්නෙ නෑ කියලා.මේ වැඩේ ඤාව්වා නවත්තන්නෙ කලු කුමාරි කිව්වොත් විතරයි.

මෙහෙම කියපු පුරුපුරු දුහුල්ව අතඇරියා.දුහුලුත් බය වෙච්ච පාර වචනයක්වත් කියන්නෙ නැතුව යන්න ගියා.අනිත් කට්ටියගෙ අදහස වුණේනං ගම්පහ බාලක විද්‍යාලෙත් එක්ක හැප්පෙන්න ගිහිල්ලා පුරුපුරු කරගත්තෙ මහ නස්පැත්තියක් කියලා.

කොහොම කොහොම ඒ සතියෙ අපේ පූසො ටික අර ඤාව්වා හීන දැකපු සමාජ අධ්‍යයනය පන්තියටත් ගියා.පන්ති ඉවර වුණේ මතක විදිහට හවස පහමාරට.ඉතින් එදා උපාසකත් පන්ති ආවෙ නෑ.දැන් පුරුපුරුයි, ඤාව්වයි, මාලු කට්ටයි පූස්ගම ටවුන් එක පැත්තට යනවලු.මේ අතරෙ ආපු දේවගම බස් එකකට ගොඩවෙච්ච මාලුකට්ටත් ගෙදර ගියාලු.ඉතුරු වුණේ පුරුපුරුයි ඤාව්වයි විතරයි.දැන් අපේ පූසො දෙන්නා පූස්ගම බස්ටෑන්ඩ් එකටම ගිහිං.එක පාරටම විසිපහක තිහක විතර සෙට් එකක් පූසො ඉන්න පැත්තට ආවලු.

මේ දවස් වෙද්දි අර වෙච්ච කතාබහ නිසා කොයි වෙලාවෙ හරි ගම්පහ බාලක විද්‍යාලෙන් ඇටෑක් එකක් එයි කියල තමයි අපේ පූසො බලාපොරොත්තුවෙන් හිටියෙ.ඒත් ඒක මෙච්චර ඉක්මනට සිද්ද වෙයි කියලා කවුරුත් හිතුවෙ නෑ.ඉතිං අර ආපු සෙට් එක අපේ පුරුපුරුවයි, ඤාව්වවයි වට කරගත්තලු.හිතපු විදිහටම ඇවිල්ල හිටියෙ පූස්ගම හිටපු ගම්පහ බාලක විද්‍යාලෙ කොල්ලො සෙට් එක.ඒත් දුහුල් පේන්න හිටියෙ නෑ.සෙට් එකේ මූලිකත්වය ගත්ත කොල්ලා ගොඩක් උස කෙනෙක් හින්දා ඒ හිටියෙ දිගා කියල හිතාගන්න පුරුපුරුට අමාරු වුණේ නෑලු.

"කවුද යකෝ පුරුපුරු කියන්නෙ??"

මෑන්ස් ගෝරනාඩු දුන්නා.එදා පොර ටෝක්ස් දුන්නට මොකද, දැන්නං පුරුපුරුටත් බය හිතිල තියෙන්නෙ.එසේ මෙසේ කෑමක් නෙවෙයි නොවැ සෙට් වෙලා තියෙන්නෙ.ඒත් බය පෙන්නුවොත් අමු චාටර් හින්දා මෑන්සුත් ඩයල් එක වගේ උත්තර දුන්නලු‍.

පුරුපුරු :-මම තමයි පුරුපුරු.


දිගා :- ආ.. ඇත්තද? මම උඹව හම්බවෙන්න තමයි හිටියෙ, කවුද මේ පූස්ගමට ඇවිල්ල ඉන්න අලුත් චන්ඩියා කියල බලන්න.උඹ දැනගනිං මට තමයි ගම්පහ බාලක විද්‍යාලෙ දිගා කියල කියන්නෙ.මට ගහන්න එකෙක් මේ පූස්ගම නෑ.


දැන් මේකා පුරුපුරට ගහන්නෙ නැතුව පොර ටෝක්ස් දෙනවා.එතන හිටපු කොල්ලන්ගෙන් දෙතුන් දෙනෙක් ඇරෙන්න අනිත් ඔක්කොම පුරුපුරුට වඩා පොඩි කොල්ලො.ඉතිං අර පූසාගෙ කරේ බෙල් එක එල්ලන්න කතා වෙච්ච මීයො ටික වගේ මේ අයත් බලාගෙන ඉන්නෙ මුලින්ම මීයෙක් ගිහිං බෙල් එක එල්ලනකං.කවුරුත් ඉස්සර වෙන්න බයයි.

පුරුපුරු ඒ දවස්වල (වම් පැත්තේ) හොස්ටල් එකේදි ගත්තු ෆොටෝ එකක්
අනිත් කාරනේ පුරුපුරු පූස්ගමම ජීවත් වෙච්ච කොල්ලෙක් වීම.පූස්ගමට ඇවිල්ලා පූස්ගම කොල්ලෙක්ට ගහල යන එක කොහොමත් නුවණට හුරු වැඩක් නෙවෙයි.ඉතිං දිගා ඊට පස්සෙ ඤාව්වටත් හොද තර්ජනයක් දැම්මලු කලු කුමාරි පස්සෙන් යන එක නවත්තන්න කියලා.ඒත් ඉතිං කට්ටිය සෙට් බැහැල ආවට පුරුපුරුවත්, ඤාව්වවත් ගුටි කෑවෙ නෑ නොවැ.ඉතිං ඒක ගම්පහ බාලක විද්‍යාලෙ නමට හොද නෑනෙ.ඉතිං යන්න කලින් පුරුපුරු ළගට ආපු දිගා අත දිග ඇරලා මෑන්ස්ට හොද කම්මුල් පාරවල් දෙකක් දුන්නලු


චටාස් !.....පටාස් !!

දිගා :- උඹට දැන් රිදුනා නේද? මීට පස්සෙ ඔය වගේ ටෝක්ස් දීල තිබුනොත් උඹට හොද වැඩක් කරනව මම.උඹ කුරුදුවත්තෙ කියල අපිට ලොකු නෑ දැනගනිං.

පුරුපුරුට පශ්චාත්භාගයෙන් හිනා යන්නත් ආවලු.ඇයි ඉතිං මැර සතියෙදි හොස්ටල් එකේ අයියලගෙන් කම්මුල පැලෙන්න කාපු පුරුපුරුට මේ කම්මුල් පාරවල් දෙකත් මහලොකු දෙයක්ද?වෙහෙර ගිලපු පූසාට අග්ගලා කජ්ජක් නෙවෙයිනෙ නේද? ඒ වුණාට පුස්ගම බස්ටෑන්ඩ් එක මැද්දෙ කාපු කම්මුල් පාරෙන් පුරුපුරුගෙ හිතනං සෑහෙන්න රිදුනා.පූස් අභිමානයට මරු පහරක් නොවැ!ඉතිං ලබන සතියෙම කොහොමහරි දිගාට ගේමක් දෙනව කියල අධිෂ්ටාන කරගත්තු පුරුපුරු ගෙදර ගියා.

අන්තිමට ඉතිං කලු කුමාරිට ට්‍රයි කළේ ඤාව්වා.හැබැයි ගුටි කෑවෙ පුරුපුරු.ඉතිං ඊළග ලිපියෙන් බලමුකො ඊට පස්සෙ අපේ පූසො ටික මොකද කළේ කියලා.....